Suryakumar Yadav ICC Rankings: அடுக்கடுக்கான சாதனை.. மிரளும் எதிரணிகள்..டி20யை ஆட்டிப்படைக்கும் சூர்யகுமார் யாதவ்..!

இந்திய வீரர் சூர்யகுமார் யாதவ் 883 ரேட்டிங் புள்ளிகளிலிருந்து 908 புள்ளிகள் பெற்று, டி20 பேட்டிங் தரவரிசையில் தொடர்ந்து முதலிடத்தில் வலம் வருகிறார். 

சூர்யகுமார் யாதவ் (image credit: ICC)

இந்திய அணியின் நட்சத்திர பேட்ஸ்மேன் சூர்யகுமார் யாதவ் அறிமுகமானதில் இருந்து தொடர்ந்து ஏதாவது ஒரு சாதனையை படைத்து வருகிறார். தற்போது, மேலும் ஒரு சாதனையை தனது பெயரில் பதிவு செய்துள்ளார். 

நேற்று இரவு ஐசிசி டி20 பேட்டிங் தரவரிசையை வெளியிட்டது. அதில், இந்திய வீரர் சூர்யகுமார் யாதவ் 883 ரேட்டிங் புள்ளிகளிலிருந்து 908 புள்ளிகள் பெற்று, டி20 பேட்டிங் தரவரிசையில் தொடர்ந்து முதலிடத்தில் வலம் வருகிறார். 

சூர்யகுமாஎ யாதவ் 908 புள்ளிகள் பெற்றதன் மூலம் டி20 சர்வதேச போட்டிகளில் எந்த ஒரு இந்திய பேட்ஸ்மேனும் பெற்ற அதிகபட்ச ரேட்டிங்காக பதிவானது. இதற்கு முன்னதாக விராட் கோலி டி20யில் அதிகபட்சமாக 897 ரேட்டிங் புள்ளிகளும், கேஎல் ராகுல் 854 ரேட்டிங் புள்ளிகளும் பெற்று இருந்தனர். இதன்மூலம் சர்வதேச டி20 போட்டிகளில் 900 ரேட்டிங்கை கடந்த முதல் இந்திய பேட்ஸ்மேன் என்ற பெருமையை சூர்யா பெற்றுள்ளார். 

சர்வதேச டி20 அரங்கில் இதுவரை 915 ரேட்டிங் புள்ளிகள் வரை பெறப்பட்டுள்ளது. அதை இங்கிலாந்து வீரர் டேவிட் மலன் மட்டும் பெற்று இருந்தார். இவருக்கு அடுத்த இடத்தில் ஆஸ்திரேலியா கேப்டன் ஆரோன் பின்ச் 900 ரேட்டிங் புள்ளிகளை பெற்று இருந்தார். 

தற்போது, ஆரோன் பின்சையும் சூர்யகுமார் யாதவ் பின்னுக்கு தள்ளி இரண்டாம் இடம் பிடித்தார். இன்னும், டேவிர் மலனை முந்த சூர்யகுமாருக்கு 7 புள்ளிகளே மீதம் உள்ளது. அதையும் முந்தினால் இதுவரை டி20 போட்டிகளில் யாரும் எடுக்காத ரேட்டிங் புள்ளிகளை பெற்ற முதல் வீரர் என்ற பெருமையை சூர்யகுமார் யாதவ் பெறுவார். 

இதுவரை அதிகபட்ச ரேட்டிங் புள்ளிகள் பெற்ற வீரர்கள்: 

• டேவிட் மலன் (இங்கிலாந்து) - 915
• சூர்யகுமார் யாதவ் (இந்தியா) - 908
• ஆரோன் பின்ச் (ஆஸ்திரேலியா) - 900
• விராட் கோலி (இந்தியா) - 897
• பாபர் ஆசாம்(பாகிஸ்தான்)  - 896

சமீபத்தில் ஐசிசி வெளியிட்ட டாப் 10 டி20 பேட்ஸ்மேன்:

1	சூர்யகுமார் யாதவ்	இந்தியா	908
2	முகமது ரிஸ்வான்	பாகிஸ்தான்	836
3	டேவான் கான்வே	நியூசிலாந்து	788
4	பாபர் ஆசாம்	பாகிஸ்தான்	778
5	ஐடன் மார்க்கரம்	தென்னாப்பிரிக்கா	748
6	டேவிட் மாலன்	இங்கிலாந்து	719
7	க்ளென் பிலிப்ஸ்	நியூசிலாந்து	699
8	ரிலீ ரோசோவ்	தென்னாப்பிரிக்கா	693
9	ஆரோன் பிஞ்ச்	ஆஸ்திரேலியா	680
10	அலெக்ஸ் ஹேல்ஸ்	இங்கிலாந்து	655

மூன்றாவது சதம்:

இலங்கைக்கு எதிரான கடைசி டி20 போட்டியில் இந்திய வீரர் சூர்யகுமார் யாதவ் 51 பந்துகளில் 112 ரன்கள் குவித்தார். சூர்யாவின் டி20 சர்வதேச கிரிக்கெட் வாழ்க்கையில் இது மூன்றாவது சதம். இந்த சதத்திற்கு பிறகு தான் சூர்யா தரவரிசையில் இந்த ரேட்டிங் புள்ளிகளை பெற்றார். சர்வதேச டி20 போட்டிகளில் 3 சதங்கள் அடித்த இரண்டாவது இந்திய வீரர் என்ற பெருமையை சூர்யா பெற்றுள்ளார். ரோஹித் சர்மா மட்டும் 4 சதங்களுடன் முதலிடத்தில் உள்ளார்.