Pro Kabaddi 2024: பலமான புனேரி பல்தன் அணி! புது யுக்திகளுடன் களம் இறங்கும் தமிழ் தலைவாஸ்! வெற்றி கிட்டுமா?
புள்ளிப்பட்டியலில் முதல் இடத்தில் இருக்கும் வலுவான புனேரி பல்தன் அணியை தமிழ் தலைவாஸ் அணி எதிர்கொள்ள உள்ளது.
விறுவிறுப்பான கபடி லீக்:
10-வது புரோ கபடி லீக் திருவிழா கடந்தாண்டு டிசம்பர் 2 ஆம் தேதி தொடங்கி இந்தியாவில் விறுவிறுப்பாக நடந்து வருகிறது. இந்த தொடரில் பெங்கால் வாரியர்ஸ், பெங்களூரு புல்ஸ், தபாங் டெல்லி, குஜராத் ஜெயன்ட்ஸ், அரியானா ஸ்டீலர்ஸ், ஜெய்ப்பூர் பிங்க் பாந்தர்ஸ், பாட்னா பைரேட்ஸ், புனேரி பல்தன், தமிழ் தலைவாஸ், தெலுங்கு டைட்டன்ஸ், யு மும்பா மற்றும் உ.பி. யோத்தாஸ் ஆகிய 12 அணிகள் களமாடி வருகின்றன.
இதில், கடந்த டிசம்பர் 3 ஆம் தேதி நடைபெற்ற முதல் போட்டியில் தமிழ் தலைவாஸ் அணி தபாங் டெல்லி அணியுடன் மோதியது. இதில், அசத்தலாக விளையாடிய தமிழ் தலைவாஸ் அணி தங்களது பயணத்தை வெற்றியுடன் தொடங்கியது. அதன்படி, 31 - 42 என்ற அடிப்படையில் தபாங் அணியை வீழ்த்தியது. அதேபோல், கடந்த டிசம்பர் 10 ஆம் தேதி நடைபெற்ற போட்டியில் பெங்கால் வாரியர்ஸ் அணியை எதிர்கொண்டது தமிழ் தலைவாஸ் அணி.
7 தொடர் தோல்வி:
இந்த போட்டியில் பெங்கால் வாரியர்ஸ் அணி 48 புள்ளிகளை பெற்று வெற்றி பெற்றது. பின்னர், கடந்த டிசம்பர் 13 ஆம் தேதி நடைபெற்ற போட்டியில் தெலுங்கு டைட்டன்ஸ் அணியை எதிர்கொண்டது. இதில் அதிரடியாக விளையாடிய தமிழ் தலைவாஸ் அணி 36- 38 என்ற கணக்கில் வெற்றி பெற்றது. இப்படி கடந்த மூன்று போட்டிகளில் இரண்டு போட்டிகளில் வெற்றி பெற்ற அந்த அணி, பின்னர் விளையாடிய 7 போட்டிகளிலும் தோல்வியை தழுவியது.
வலுவான புனேரி பல்தன்:
இந்நிலையில் தான் புள்ளிப்பட்டியலில் முதல் இடத்தில் இருக்கும் வலுவான புனேரி பல்தன் அணியை தமிழ் தலைவாஸ் அணி எதிர்கொள்ள உள்ளது. அதன்படி, புனேரி பல்தன் அணி 8 போட்டிகளில் விளையாடி 7 போட்டிகளில் வெற்றியை ருசித்துள்ளது. மேலும், ஒரே ஒரு போட்டியில் தான் தோல்வியை சந்தித்தது. அந்த வகையில் கடந்த டிசம்பர் 4 ஆம் தேதி நடைபெற்ற தங்களது முதல் போட்டியில் ஜெய்ப்பூர் பிங்க் பாந்தர்ஸ் அணியுடன் விளையாடிய புனேரி பல்தன் அணி 37 - 33 என்ற புள்ளிக்கணக்கில் வெற்றி பெற்றது. அதேபோல், கடந்த டிசம்பர் 8 ஆம் தேதி யு மும்பா அணியிடம் மோதிய அந்த அணி 43 - 32 என்ற கணக்கில் வெற்றி பெற்றது.
அதேநேரம், கடந்த டிசம்பர் 15 ஆம் தேதி நடைபெற்ற அரியானா ஸ்டீலர்ஸ் அணியிடம் மட்டுமே தோல்வியடைந்தது. மேலும், பெங்கால் வாரியர்ஸ், தபாங் டெல்லி, பெங்களூரு புல்ஸ், பாட்னா பைரேட்ஸ்,தெலுங்கு டைட்டன்ஸ் ஆகிய அணிகளை அதிக புள்ளிகள் வித்தியாசத்தில் வீழ்த்தி இருக்கிறது புனேரி பல்தன் அணி.
புதிய யுக்தியை செயல்படுத்தும் தமிழ் தலைவாஸ்:
இச்சூழலில் தன் வரும் ஜனவரி 7 ஆம் தேதி நடைபெற உள்ள போட்டியில் புனேரி பல்தன் அணி தமிழ் தலைவாஸ் அணியுடன் விளையாட உள்ளது. இதனிடையே தொடர் தோல்விகளை சந்தித்து வரும் தமிழ் தலைவாஸ் அணி பலமான புனேரி பல்தன் அணியை வீழ்த்த வேண்டும் அதேபோல் தங்களது வெற்றிப் பயணத்தை தொடங்க வேண்டிய சூழலில் உள்ளது தமிழ் தலைவாஸ். இதனால் பல்வேறு யுக்திகளை அந்த அணி செயல்படுத்தும். இதனால் இந்த போட்டி நிச்சயம் அனல் பறக்கும் என்று எதிர்பார்க்கலாம்.
தலைப்பு செய்திகள்
ட்ரெண்டிங் செய்திகள்
