என் அம்மாவைக் கூப்பிடுங்கள்... விபத்துக்குப் பின் ரிஷப் பந்த் பேசிய முதல் வார்த்தை!

விபத்திலிருந்து மீண்ட மறு நிமிடமே ரிஷப் பந்த் தனது தாயாரை போனில் அழைக்குமாறு கோரிக்கை விடுத்ததாகக் கூறியுள்ளார் அவருக்கு முதலில் உதவிய ஹரியானா பேருந்து ஓட்டுநர்.

விபத்துக்குள்ளான காரும், சிகிச்சை பெறும் ரிஷப் பந்தும்

விபத்திலிருந்து மீண்ட மறு நிமிடமே ரிஷப் பந்த் தனது தாயாரை போனில் அழைக்குமாறு கோரிக்கை விடுத்ததாகக் கூறியுள்ளார் அவருக்கு முதலில் உதவிய ஹரியானா பேருந்து ஓட்டுநர்.

கிரிக்கெட் வீரர் ரிஷப் பந்தின் கார் விபத்துக்குள்ளானதும் முதலில் அவ்வழியாக சென்ற ஹரியானா போக்குவரத்து ஊழியர்கள் இருவர் தான் பார்த்துள்ளனர். காரில் இருந்து ரிஷப் பந்த் வெளியேறியதும் அவரை அடையாளம் கண்டு கொண்ட பஸ் ஊழியர்கள் குளிரில் நடுங்கிக் கொண்டிருந்த அவருக்கு பேருந்து பயணி ஒருவரிடமிருந்து ஒரு கம்பளியைப் பெற்று போர்த்தியுள்ளனர். அப்போது ரிஷப் பந்த் முதலில் பேசிய வார்த்தை, என் அம்மாவுக்கு போன் செய்யுங்கள் என்பது தான் என்று பேருந்து ஓட்டுநர் பேட்டியில் கூறியுள்ளார். ஆனால் ரிஷப் பந்த்தின் தாயாரின் போன் அந்த நேரத்தில் ஸிவ்ட்ச் ஆஃபாக இருந்ததாகவும் அந்த பேருந்து ஓட்டுநர் கூறியுள்ளார். 

ஆசை ஆசையாய் பயணம்:

25 வயதான கிரிக்கெட் வீரர் ரிஷப் பந்த் உத்தராகண்டில் உள்ள ரூர்க்கி பகுதிக்கு மெர்சிடிஸ் பென்ஸ் காரில் தனியாக புறப்பட்டுச் சென்றார். தனது தாய்க்கு இன்ப அதிர்ச்சி கொடுக்க வேண்டும் என்பதற்கு முன்கூட்டியே தகவல் ஏதும் கொடுக்காமல் கிளம்பி உள்ளார். காலை 5.30 மணி அளவில் உத்தரகாண்ட் மாநிலம் ஹரித்வார் மாவட்டத்தில் உள்ள மங்களூர் பகுதியில் சென்ற போது சாலை தடுப்பின் மீது கார் பயங்கரமாக மோதி விபத்துக்குள்ளானது.

மோதிய வேகத்தில் கார் திடீரென தீப்பற்றி உள்ளது. இதை அந்த வழியாக சென்ற ஹரியானா போக்குவரத்து கழக ஒட்டுநர் பார்த்து அதிர்ச்சி அடைந்துள்ளார். அவரும் அவருடன் பணியாற்றிய ஊழியரும் விரைந்து செயல்பட்டு காரில் படுகாயங்களுடன் சிக்கியிருந்த ரிஷப்பண்டை மீட்டு அருகில் உள்ள சக்சாம் மருத்துவமனையில் அனுமதித்தனர். அங்கு அவருக்கு அவசர பிரிவில் சிகிச்சை அளிக்கப்பட்டது.

காயங்களுடன் சிகிச்சை:

ரிஷப் பந்தின் நெற்றியில் இரண்டு இடங்களில் கீறல் ஏற்பட்டுள்ளது. வலது முழங்காலில் தசைநார் கிழிந்துள்ளது. வலது மணிக்கட்டு, கணுக்கால், கால்விரலில் காயமும் முதுகில் சிராய்ப்பும் ஏற்பட்டிருப்பது தெரியவந்தது. அதேவேளையில் தீக்காயங்கள் ஏதும் ஏற்படவில்லை. இதைத் தொடர்ந்து மேல் சிகிச்சைக்காக ரிஷப் டேராடூனில் உள்ள மேக்ஸ் மருத்துவமனையில் அனுமதிக்கப்பட்டுள்ளார். தற்போது ரிஷப் பண்ட் உடல் நிலை சீராக இருப்பதாகவும், ஆபத்தான நிலை எதுவும் இல்லை என்று மருத்துவமனை தரப்பில் கூறப்பட்டுள்ளது. 

பயங்கரமான விபத்திலிருந்து மீண்டு வந்த ரிஷப் பண்ட்டின் உடல் நிலை விரைவில் குணமடைய வேண்டும் என்று முன்னாள், இந்நாள் வீரர்கள், ரசிகர்கள் மற்றும் கிரிக்கெட் உலகமே பிரார்த்தனை செய்து வருகின்றது.

இதற்கிடையில் ரிஷப் பந்த் மது அருந்திவிட்டு தனது காரை ஓட்டினார். அவர் அளவுக்கு அதிகமான வேகத்தில் கார் ஓட்டினார் என்றெல்லாம் எழுந்த தகவல்களை அடுத்து, ரிஷப் பந்த் அவரது காரை போதையில் இயக்கவில்லை. அதுபோல் அவர் அந்த காரை வேகமாகவும் இயக்கவில்லை என்று காவல்துறை தெரிவித்துள்ளது.