Virat Kohli Record: சச்சின் டெண்டுல்கர் சாதனையை முறியடிக்கும் விராட்கோலி...? கோலியின் மகுடத்தில் மற்றுமொரு வைரக்கல்..!
மேற்கிந்திய தீவுகள் அணிக்கு எதிராக வரும் ஞாயிற்றுக்கிழமை நடைபெற உள்ள ஒருநாள் போட்டியில் சச்சின் டெண்டுல்கரின் சாதனையை விராட்கோலி முறியடிக்க உள்ளார்.
மேற்கிந்திய தீவுகள் அணி இந்தியாவில் சுற்றுப்பயணம் மேற்கொண்டு மூன்று ஒருநாள் மற்றும் மூன்று டி20 போட்டிகளில் ஆடவுள்ளது. இரு அணிகளும் மோதும் முதலாவது ஒருநாள் கிரிக்கெட் போட்டி வரும் ஞாயிற்றுக்கிழமை அகமதாபாத்தில் நடைபெற உள்ளது.
இந்த போட்டியில் இந்திய அணியின் முன்னாள் கேப்டன் விராட்கோலி புதிய சாதனையை படைக்க உள்ளார். இந்திய அணிக்காக டெஸ்ட், ஒருநாள் மற்றும் டி20 போட்டிகளில் அபாரமாக ஆடியுள்ள விராட்கோலி சொந்த மண்ணில், அதாவது இந்தியாவில் ஆடிய ஒருநாள் போட்டிகளில் மட்டும் 5 ஆயிரம் ரன்களை எட்டிய வீரர் என்ற சாதனையை படைக்க உள்ளார். இந்த சாதனையை படைக்க விராட்கோலிக்கு இன்னும் 6 ரன்கள் மட்டுமே தேவைப்படுகிறது.
விராட்கோலிக்கு முன்பாக, இந்த சாதனையை கிரிக்கெட் உலகின் ஜாம்பவான் சச்சின் டெண்டுல்கர் மட்டுமே படைத்துள்ளார். அவர் மட்டுமே இதுவரை இந்தியாவில் ஆடிய ஒருநாள் போட்டிகளில் 5 ஆயிரம் ரன்களை எட்டிய வீரர் ஆவார். விராட்கோலி வரும் ஞாயிற்றுக்கிழமை நடைபெறும் போட்டியில் இந்த சாதனையை படைப்பார் என்று எதிர்பார்க்கப்படுகிறது.
சச்சினுக்கு அடுத்து இந்த சாதனையை படைக்க உள்ள விராட்கோலிக்கும், சச்சினுக்கும் இடையே ஒற்றுமை உள்ளது. சச்சின் டெண்டுல்கர் மேற்கிந்திய தீவுகளுக்கு எதிராக தனது 121வது ஒருநாள் போட்டியில் இந்த சாதனையை படைத்தார். விராட்கோலியும் மேற்கிந்திய தீவுகளுக்கு எதிராக இந்த சாதனையை படைக்க உள்ளார். விராட்கோலிக்கு இது 96வது ஒருநாள் போட்டி ஆகும். இந்த சாதனையை படைத்தால் சொந்த மண்ணில் 5 ஆயிரம் ரன்களை குவித்த இரண்டாவது இந்திய வீரர் என்ற சாதனையுடன், குறைந்த ஒருநாள் போட்டிகளில் சொந்த மண்ணில் 5 ஆயிரம் ரன்களை குவித்த இந்திய வீரர் என்ற சாதனையையும் படைப்பார்.
விராட்கோலி இதுவரை 257 ஒருநாள் போட்டிகளில் ஆடி 12 ஆயிரத்து 285 ரன்களை குவித்துள்ளார். அவற்றில் 43 சதங்களும், 64 அரைசதங்களும் அடங்கம். ஒருநாள் போட்டிகளில் அதிகபட்சமாக 183 ரன்களை குவித்துள்ளார். இவற்றில் 39 முறை ஆட்டமிழக்காமல் இருந்துள்ளார். ரன்மெஷின் என்று ரசிகர்களால் செல்லமாக அழைக்கப்படும் விராட்கோலி இதுவரை சச்சின் டெண்டுல்கரின் பல சாதனைகளை முறியடித்து கிரிக்கெட் உலகின் நம்பர் 1 வீரராக வலம் வருகிறார்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
