Rahane Half Century: ஆபத்பாந்தவனாக மாறிய ரஹானே... ஃபாலோ - ஆனை தவிர்க்குமா இந்தியா?
Rahane Half Century: உலகடெஸ்ட் சாம்பியன்ஷிப் இறுதிப் போட்டியில் இந்திய அணியின் ரஹானே அரைசதம் விளாசியுள்ளார்.
WTC Final 2023: ஐசிசி தரப்பில் கடந்த 2021ஆம் ஆண்டு முதல் தொடங்கப்பட்ட இரண்டாவது உலக டெஸ்ட் சாம்பியன்ஷிப் போட்டித் தொடர் தற்போது இறுதி கட்டத்தினை எட்டியுள்ளது. இதன் இறுதிப் போட்டியில் இந்தியா மற்றும் ஆஸ்திரேலிய அணிகள் விளையாடி வருகின்றன. லண்டனில் உள்ள ஓவல் மைதானத்தில் நடைபெற்று வரும் இந்த போட்டியில் டாஸ் வென்ற இந்திய அணி பந்து வீச முடிவு செய்தது.
முதல் நாள் ஆட்ட நேர முடிவில் ஆஸ்திரேலிய அணி 85 ஓவர்களை எதிர்கொண்டு 3 விக்கெட்டுகளை இழந்து 327 ரன்கள் சேர்த்திருந்த நிலையில் வெளிச்சமின்மை காராணமாக போட்டி நிறுத்தப்பட்டது. ஆஸ்திரேலிய அணி சார்பில் ஹெட் 156 பந்தில் 146 ரன்களுடனும் ஸ்டீவ் ஸ்மித் 227 பந்துகளில் 95 ரன்களுடனும் களத்தில் இருந்தனர். அதன் பின்னர் இரண்டாவது நாள் இரண்டாவது பாதியில் ஆஸ்திரேலிய அணி அனைத்து விக்கெட்டுகளையும் இழந்து 469 ரன்கள் சேர்த்தது. அதன் பின்னர், களமிறங்கிய இந்திய அணி ஆஸ்திரேலிய அணியின் வேகத்துக்கு தாக்குபிடிக்காமல் அடுத்தடுத்து விக்கெட்டுகளை இழந்து தடுமாறி வந்தது. இதனால் இந்திய அணி முதல் இன்னிங்ஸை இரண்டாவது நாளிலேயே முடித்துக்கொள்ளும் எனும் நிலை ஏற்பட்டது. அதன் பின்னர் இணைந்த ரஹானே ஜடேஜா ஜோடி இந்திய அணியை மெல்ல மெல்ல சரிவில் இருந்து மீட்டு வந்த நிலையில் ஜடேஜா 48 ரன்களில் தனது விக்கெட்டை இழந்து வெளியேறினார்.
அதன் பின்னர் வந்த பரத் 5 ரன்களில் ஆட்டமிழக்க, அதன் பின்னர் ரஹானேவுடன் ஷர்துல் தாக்கூர் இணைந்தார். ஒருபுறம் விக்கெட்டுகள் சரிந்து வந்தாலும், இந்திய அணியின் நம்பிக்கையாக தற்போது இருப்பவர் ரஹானே தான். இக்கட்டான சூழலில் களமிறங்கிய ரஹானே மிகவும் சிறப்பாகவும் பொறுப்புடனும் ஆடி அரைசதம் விளாசி ஆடி வருகிறார்.
இந்திய அணி 6 விக்கெட்டுகளை இழந்து 215 ரன்களில் இருந்த போது, ரஹானே 99 பந்துகளை எதிர்கொண்டு 8 பவுண்டரி ஒரு சிக்ஸர் உட்பட 63 ரன்கள் சேர்த்திருந்தார். இவருடன் இணைந்த ஷர்துல் தாக்கூர் 46 பந்தில் 22 ரன்கள் சேர்த்திருந்தார். இருவரும் 71 ரன்னில் 63 ரன்கள் சேர்த்திருந்தனர். தற்போது இந்திய அணி ஆஸ்திரேலிய அணியை விட 254 ரன்கள் பின் தங்கியுள்ளது.
ஃபாலோ - ஆனைத் தவிர்க்குமா இந்தியா?
இந்த இன்னிங்ஸில் இந்திய அணி ஃபாலோ - ஆனைத் தவிர்க்க 269 ரன்கள் எடுக்க வேண்டும் என்பது குறிப்பிடத்தக்கது.
தலைப்பு செய்திகள்
ட்ரெண்டிங் செய்திகள்
