![ABP Premium](https://cdn.abplive.com/imagebank/Premium-ad-Icon.png)
Marvelous Margazhi Fest: ‘மார்வெலஸ் மார்கழி திருவிழா’ - சென்னையில் நடைபெற்ற வித்தியாசமான நிகழ்ச்சி!
கர்நாடக இசை உலகின் பிரபலமான நட்சத்திரங்களுக்கு மட்டுமல்ல, பார்வையாளர்களுக்கும் இந்த மார்வெலஸ் மார்கழி நிகழ்ச்சி இதுவரை பங்கேற்றிராத ஒரு சிறப்பு நிகழ்ச்சியாக அமைந்திருந்தது.
![Marvelous Margazhi Fest: ‘மார்வெலஸ் மார்கழி திருவிழா’ - சென்னையில் நடைபெற்ற வித்தியாசமான நிகழ்ச்சி! chennai marvelous margazhi festival begins details mahati shobana participates Marvelous Margazhi Fest: ‘மார்வெலஸ் மார்கழி திருவிழா’ - சென்னையில் நடைபெற்ற வித்தியாசமான நிகழ்ச்சி!](https://feeds.abplive.com/onecms/images/uploaded-images/2023/12/02/ec70a6648f360882631735b5aef98d6a1701507039496574_original.jpeg?impolicy=abp_cdn&imwidth=1200&height=675)
மார்கழி மாதம் வந்தாலே, தமிழகத்தின் தலைநகரான சென்னையில் இசை நிகழ்ச்சிகள் களைக் கட்ட ஆரம்பித்துவிடும். பாடல், இசை, நடனம் என மாநகரின் ஒவ்வொரு அரங்கும் பளிச்சிடும். அத்தகைய நிகழ்வுகளுக்கு முன்னோட்டமாக, கர்நாடக இசையில் பிரபலமான கலைஞர்கள் ஒன்றுகூடி வித்தியாசமான கலாச்சார நிகழ்வொன்று சென்னையில் அரங்கேறியது. ஈவெண்ட் ஆர்ட் நிறுவனத்தின் லட்சுமி மற்றும் சரஸ்வதி ஒருங்கிணைத்த இந்த 'மார்வெலஸ் மார்கழித் திருவிழா' மிகப்பிரமாண்டமாக நடைபெற்றது. இதில், கர்நாடக இசைக் கலைஞர்களின் மற்ற திறமைகளும் பளிச்சிட்டன என்றால் மிகையில்லை.
பொதுவாக, "ரேம்ப் வாக்" நடை நிகழ்ச்சி, அழகிப் போட்டிகளில் மட்டுமே நடைபெறக்கூடிய ஒரு நிகழ்வாகும். ஆனால், சென்னை மீனம்பாக்கம் ரேடிசன் ப்ளூ நட்சத்திர விடுதியில் நடைபெற்ற இந்த "மார்வெலஸ்" மார்கழி திருவிழாவில், இசை, நடனம், பாடல் என பல்வேறு துறைகளில் தங்கள் தனித்துவத்தை நிரூபித்த பிரபலங்கள் ‘ரேம்ப் வாக்’ செய்து அசத்தினர். சென்னையின் கலாச்சாரத்தை பிரதிபலிக்கும் இந்த மார்கழித் திருவிழா, ரசிகர்களுக்கு மிகப்பெரிய விருந்தாக அமைந்தது என்பதைக் கண்கூடாக உணரமுடிந்தது.
ராகுல் வெள்ளால், ஸ்டீவன் சாமுவேல் தெவஸ்ஸே ஆகியோரின் பின்னணி இசையில், பாடகர்கள் அருணா சாய்ராம், ரஞ்சனி காயத்ரி, சுதா ரகுநாதன், பிரியா சகோதரிகள், உன்னிகிருஷ்ணன், உத்ரா உன்னிகிருஷ்ணன், சிக்கில் குருசரண், சந்தீப் நாராயண், ராதே ரித்விக் ராஜா ஆகியோர் ஒய்யார நடைபோட்டு பார்வையாளர்களை மெய்மறக்கச் செய்தனர்.
பத்மா சுப்பிரமணியம், காயத்ரி, மஹதி, ஷோபனா, ஊர்மிளா சத்தியநாராயணன், மீனாக்ஷி சித்தரஞ்சன், உமா முரளி கிருஷ்ணா, பிரியதர்ஷினி கோவிந்த், ஶ்ரீகலா பரத், கோபிகா வர்மா ஆகிய கலைஞர்களின் அசத்தல் நடையும் அரங்கை அசத்தியது.
மார்வெலஸ் மார்கழி நிகழ்ச்சியின் இன்னொரு சிறப்பாக, இதுவரை காணக்கிடைக்காத லால்குடி ஜி.ஜே.ஆர் கிருஷ்ணன், விஜி வயலின் கணேஷ், குமரேஷ் ஷசங்க், ஶ்ரீஷா ஜெயந்தி குமரேஷ், கண்ணன், மாண்டலின் ராஜேஷ், அணில் சீனிவாசன் ஆனந்தா, சாருமதி விஜி கிருஷ்ணன் ஆகியோரின் ‘ரேம்ப் வாக்’ அரங்கை அழகூட்டியது. இந் நிகழ்ச்சியில், பழம்பெரும் நடிகையும் பிரபலமான பரத நாட்டியக் கலைஞரான வைஜெயந்திமாலா உள்ளிட்ட பல பிரபலங்கள் பங்கேற்றனர்.
கர்நாடக இசைப் பிரபலங்களில் பாட்டு திறமை, இசைப்பு திறமை, நாட்டிய திறமை ஆகியவற்றை மட்டுமே பார்த்துப் பழகிப் போன ரசிகர்களுக்கு, அவர்களின் "ராம்ப் வாக்" நிகழ்ச்சி, பார்வையாளர்கள் அனைவருக்கும் ஒரு வித்தியாசமான அனுபவத்தைக் கொடுத்திருக்கும் என்பது நிச்சயம்.
கர்நாடக இசை உலகின் பிரபலமான நட்சத்திரங்களுக்கு மட்டுமல்ல, பார்வையாளர்களுக்கும் இந்த மார்வெலஸ் மார்கழி நிகழ்ச்சி இதுவரை அவர்கள் பங்கேற்காத ஒரு சிறப்பு நிகழ்ச்சியாக அமைந்திருந்தது.
கலைகளின் கலவையை பிரதிபலித்த இந்த ‘ராம்ப் வாக்’கை மிகப்பிரமாண்டமாக வழங்கி ரசிகர்களின் மனதை கொள்ளை கொண்ட இந்த மார்வெலஸ் மார்கழி திருவிழாவை, ஈவெண்ட் ஆர்ட்ஸ் நிறுவனத்தின் லட்சுமி மற்றும் சரஸ்வதி ஒருங்கிணைக்க, பாலம் சில்க்ஸ் ஜெயஸ்ரீ, பிராண்ட் அவதார் ஹேமசந்திரன் சிறப்பாக நிர்வகித்து வழங்கினர்.
தலைப்பு செய்திகள்
ட்ரெண்டிங் செய்திகள்
![ABP Premium](https://cdn.abplive.com/imagebank/metaverse-mid.png)
![வினய் லால்](https://cdn.abplive.com/imagebank/editor.png)