சர்வதேச ’பை’ தினம்: நீங்கள் தெரிந்து கொள்ள வேண்டியவை

சர்வதேச பை தினம் என்றவுடன் ஏதோ மஞ்சப்பை தினம் என்று நினைத்துவிட வேண்டாம். இது கணிதத்தில் வரும் பை. கணிதம் எட்டிக்காய் என்று சலித்துக் கொண்டாலும் கூட பை என்பதை கணிதத்தில் கற்காமல் விட்டுவிட முடியாது.

சர்வதேச பை தினம்

சர்வதேச பை தினம் என்றவுடன் ஏதோ மஞ்சப்பை தினம் என்று நினைத்துவிட வேண்டாம். இது கணிதத்தில் வரும் பை. கணிதம் எட்டிக்காய் என்று சலித்துக் கொண்டாலும் கூட பை என்பதை கணிதத்தில் கற்காமல் விட்டுவிட முடியாது.

ஒவ்வோர் ஆண்டும் மார்ச் மாதம் 14-ம் தேதி, உலக π தினமாகக் கொண்டாடப்படுகிறது. 1988-ல் லேரி ஷா என்ற அமெரிக்க இயற்பியல் அறிஞர் முதல் π தினத்தைக் கொண்டாடியது முதல் இவ்வழக்கம் இன்று வரை தொடர்கிறது. அமெரிக்காவில் சில மாகாணங்களில் π தினத்தைக் கொண்டாடுவதற்காக விடுமுறை வழங்கப்பட்டுள்ளது.

எங்கெல்லாம் வட்ட வடிவம் தோன்றுகிறதோ அங்கெல்லாம் π என்கிற மிக முக்கிய எண் தோன்றுகிறது. இயற்கையில் பெரும்பாலான பொருட்கள் வட்ட வடிவத்தில் காணப்படுவதால் இயற்கையோடு பை பின்னிப் பிணைந்துள்ளது. 

ஆர்க்கிமிடிஸ் வழங்கிய தோராய மதிப்பான 3.14 என்ற எண்ணையே இன்று நாம் π -யின் மதிப்பாகக் கருதிக்கொள்கிறோம். 3.14 என்ற எண் π -யின் உண்மை மதிப்புக்கு இரண்டு தசம இலக்கங்கள் வரையே சரியாக அமைகிறது.

மார்ச் 14ல் ஏன் கொண்டாடப்படுகிறது?

கணிதத்தில் மிக முக்கியமான எண்ணாக π விளங்குகிறது. அதன் மதிப்பு தோராயமாக 3.14 என வருகிறது. அதனால், அமெரிக்க முறையில் தேதியை குறிப்பிடும்போது மார்ச் 14 என்ற தேதி, πயைக் குறிக்கும் தேதியாக அனுசரிக்கப்பட்டு வருகிறது.

பை க்கும் நம் வாழ்க்கைக்கும் என்ன தொடர்பு?

எங்கெல்லாம் வட்ட வடிவம் தோன்றுகிறதோ அங்கெல்லாம் πயின் அவசியம் ஏற்படுகிறது. ஜிபிஎஸ் லொகேஷன் தொடங்கி, வாகன கண்காணிப்பு முறை, விமானங்களில் உள்ள டிடக்டர்ஸ் வரை எல்லாவற்றிலும் πயின் பயன்பாடு இருக்கிறது. π என்ற எண்ணைக் கற்காலம் முதல் தற்காலம் வரை மனிதர்கள் பயன்படுத்தியுள்ளார்கள். எனவே, கணிதத்தில் தோன்றும் எண்களில் அதிக அளவு பயன்படுத்தப்பட்ட எண்ணாக விளங்குகிறது.மேலும், கன வடிவங்களான கோளம், கூம்பு, உருளை போன்றவற்றின் மேற்பரப்பு, கொள்ளளவு மதிப்புகளில் π காணப்படுகிறது. 

கணிதத்தைத் தாண்டி..

PI என்பது கணிதத்தைத் தாண்டியும் நம் வாழ்வில் சுவாரஸ்யம் சேர்க்கக் கூடியது. ஒரு கணினி, முறையாக வேலைசெய்கிறதா எனத் தெரிந்துகொள்வதற்கு, π-ன் தசம இலக்கக் கணக்கீடுகள் பயன்படுகின்றன.

பையின் சக்தி..

பை என்பது கலாச்சார எல்லைகளைக் கடந்து இலக்கியம், சினிமாவிலும் தடம் பதித்துள்ளது. நைட் அட் மியூசியம் 2 படத்தில் நாயகன், மில்லனியம் டேபிளின் சர்ச்சையைக் கலைய பை கணித எண் உதவியை நாடுவார்.

இலக்கியத்தில் ஆஸ்ட்ரோபிசிஸிஸ்ட் கார்ல் சாகன் தனது நாவலில் வேற்றுக்கிரகவாசிகளின் குறியீட்டை பை என்ற கணிதக் குறியீட்டில் மறைத்துவைப்பதாகக் குறிப்பிட்டிருப்பார். டேவிட் மெக்டொனால்ட் தனது இசை ஆல்பத்திற்கு பை என்று பெயரிட்டிருப்பார்.

ஆஸ்கர் வென்ற லைஃப் ஆஃப் பை படத்திலும் முக்கிய கதாபாத்திரம் பை என்ற கணித எண் தன் பெயருடன் ஒட்டிக்கொண்ட சுவாரஸ்யத்தை விவரிக்கும் காட்சி இருக்கும்.