China President: இஸ்ரேல் - ஹமாஸ் போரை நிறுத்த உலகநாடுகள் முன்வர வேண்டும் - BRICS மாநாட்டில் சீன அதிபர் வேண்டுகோள்

Israel-Hamas War: சீனா வரலாற்று ரீதியாக பாலஸ்தீனியர்களுக்கு அனுதாபம் காட்டுவதுடன் இஸ்ரேல்-பாலஸ்தீன மோதலுக்கு இரு நாடுகளின் தீர்வுக்கு ஆதரவாக உள்ளது.

சீன அதிபர் ஜி ஜின்பிங்

Source : @China_Amb_India

சீனாவின் அதிபரான ஜி ஜின்பிங் சிவிலியன் கைதிகளை விடுவிக்கவும், இஸ்ரேலுக்கும் ஹமாஸுக்கும் இடையிலான போரில் உடனடி போர் நிறுத்தத்திற்கும் அழைப்பு விடுத்துள்ளார்.  சீன அதிபர் சக BRICS தலைவர்கள் பங்கேற்ற உச்சிமாநாட்டில் உரையாற்றுகையில், இந்த போர் நிறுத்த அழைப்பினை விடுத்துள்ளதாக கூறப்பட்டுள்ளது. 

நிறுத்த வேண்டும்:

மோதல்களில் உள்ள அனைத்து தரப்பினரும் உடனடியாக துப்பாக்கிச் சூடு மற்றும் அவர்களுக்கு இடையில் உள்ள விரோதங்களை நிறுத்த வேண்டும் எனவும், பொதுமக்களை குறிவைக்கும் அனைத்து வன்முறை மற்றும் தாக்குதல்களையும் நிறுத்த வேண்டும் எனவும் வேண்டுகோள் விடுத்துள்ளார்.  மேலும் உயிர் இழப்புகள் மற்றும் பொதுமக்கள் படும் இன்னல்களைத் தவிர்க்க கைதிகளாக சிறைபடுத்தப்பட்டுள்ள பொதுமக்களை விடுவிக்க வேண்டும் என்றும் அவர் தனது பேச்சில் குறிப்பிட்டதாக ஆங்கில ஊடகங்கள் செய்தி வெளியிட்டுள்ளன.  கடந்த மாதம் ஹமாஸால் இஸ்ரேலில் இருந்து கடத்தப்பட்ட 240 பணயக்கைதிகள் பற்றியோ அல்லது இஸ்ரேலால் தடுத்து வைக்கப்பட்டுள்ள பாலஸ்தீனிய கைதிகள் பற்றியோ அவர் சிறப்பாக எதையும் குறிப்பிடவில்லை.

இஸ்ரேல் - ஹமாஸ்:

இஸ்ரேலுக்கும் ஹமாஸுக்கும் இடையிலான மோதலைத் தீர்க்க "சர்வதேச அமைதி மாநாட்டிற்கும்" தனது உரையின் போது அழைப்பு விடுத்தார் ஜி ஜின்பிங்.

"பாலஸ்தீனத்தின் பிரச்சினைக்கு நியாயமான தீர்வு இல்லாமல் மத்திய கிழக்கில் நிலையான அமைதி மற்றும் பாதுகாப்பு இருக்க முடியாது," என்றும்  சீன அதிபர் ஜி ஜின்பிங் பேசியுள்ளார். 

இந்த போர் நிறுத்த வேண்டுகோள் குறித்து அவர் பேசுகையில், "அமைதிக்கான சர்வதேச ஒருமித்த கருத்தை உருவாக்குவதற்கு அதிக அதிகாரம் கொண்ட சர்வதேச அமைதி மாநாட்டை விரைவில் கூட்டுமாறு சீனா அழைப்பு விடுக்கிறது. அத்தகைய மாநாடு, "பாலஸ்தீனம் பற்றிய விரிவான, நியாயமான மற்றும் நிலையான பிரச்சினைக்கு ஒரு ஆரம்ப தீர்வை நோக்கி செயல்படவேண்டும்" என்று சீன அதிபர் பேசியுள்ளார்.

"சமீபத்திய பாலஸ்தீன-இஸ்ரேல் மோதல் வெடித்ததில் இருந்து, அமைதி பேச்சுவார்த்தை மற்றும் போர்நிறுத்தத்தை மேம்படுத்துவதில் சீனா தீவிரமாக செயல்பட்டு வருகிறது. காசாவில் மனிதாபிமான அடிப்படையில் சீனா உதவிகளை செய்துள்ளது" என்றும், அதை தொடர்ந்து செய்யும் என்றும் அவர் கூறினார்.

பிரிக்ஸ் மாநாடு:

பிரேசில், ரஷ்யா, இந்தியா, சீனா மற்றும் தென்னாப்பிரிக்காவை உள்ளடக்கிய வளர்ந்து வரும் பொருளாதாரங்களின் குழுவான BRICS இன் மெய்நிகர் கூட்டத்தை பிரிட்டோரியா நடத்துகிறது. இஸ்ரேல்-ஹமாஸ் மோதலுக்கு பொதுவான பதிலை உருவாக்குவதை நோக்கமாகக் கொண்டுள்ளது.

கடந்த அக்டோபர் 7ஆம் தேதி அன்று, எல்லை தாண்டிய தாக்குதல்களின் போது ஹமாஸைச் சேர்ந்த துப்பாக்கிப் படையைச் சேர்ந்தவர்கள் 1,200 பொதுமக்களை கொன்றதைத் தொடர்ந்து காஸாவில் போர் மூண்டுள்ளது.  இது இஸ்ரேலின் வரலாற்றில் மிக மோசமான தாக்குதல் ஆகும். 

இதற்கு பதிலடி கொடுக்கும் விதமாக, ஹமாஸின் ஆட்சியில் உள்ள காஸாவில் இடைவிடாத குண்டுவீச்சு பிரச்சாரத்தையும் தரைவழி தாக்குதலையும் இஸ்ரேல் தொடங்கியது. ஹமாஸின் கூற்றுப்படி, போரில் 13,300 க்கும் மேற்பட்ட மக்கள் கொல்லப்பட்டுள்ளனர், அவர்களில் ஆயிரக்கணக்கான குழந்தைகளும் அடங்குவர் என குறிப்பிட்டுள்ளது. 

சீனா வரலாற்று ரீதியாக பாலஸ்தீனியர்களுக்கு அனுதாபம் காட்டுவதுடன் இஸ்ரேல்-பாலஸ்தீன மோதலுக்கு இரு நாடுகளின் தீர்வுக்கு ஆதரவாக உள்ளது. கடந்த மாதம் போர் தொடங்கியதில் இருந்து சீனா உடனடியாக போர்நிறுத்தத்திற்கு அழைப்பு விடுத்து வருகிறது.