"வானுயரும் கனவுக்கு நத்தை வேகம்... திருச்சியில் எப்போது விடியும் காமராஜர் அறிவுக்கோட்டை?"

நகரும் படிக்கட்டுகள், 9 மின்தூக்கிகள், நூற்றுக்கணக்கான வாகனங்களை நிறுத்தும் வசதி எனப் பகட்டான அறிவிப்புகள் ஒருபுறமிருக்க, இன்னும் கட்டிடத்தின் பூச்சு வேலைகளே முழுமையடையவில்லை என்பதுதான் கசப்பான உண்மை.

திருச்சி மன்னார்புரம் காமராஜன் அறிவு சார் மைய கட்டிடப்பணி ஆமை வேகத்தில் நடக்கிறது

Source : Abpnadu Original

திருச்சி: திருச்சியின் இதயப் பகுதியான மன்னார்புரத்தில், அண்ணல் காமராஜரின் பெயரால் உதிக்கும் அறிவுச் சூரியன், இன்னும் ஏனோ மேக மூட்டத்திற்குள்ளேயே மறைந்திருக்கிறது. திருச்சி மக்களின் நீண்ட நாள் கனவான ‘காமராஜர் அறிவுசார் மையம் மற்றும் பொது நூலகம்’, அதிகாரிகளின் மெத்தனத்தாலும், ஆட்சியாளர்களின் அலட்சியத்தாலும் இன்று ஆமை வேகத்தில் நகர்ந்து கொண்டிருக்கிறது.

படிப்பகங்களின் வாசலில் தவம் கிடக்கும் ஏழை மாணவர்களின் கனவுகளோடு விளையாடும் இந்த மந்த நிலை எப்போது மாறும், பணிகள் எப்போது வேகம் பிடிக்கும் என்பதுதான் திருச்சி மக்களின் எதிர்பார்ப்பாகும்.

ரூ. 290 கோடி காற்றில் பறக்கிறதா? முடங்கிக் கிடக்கும் கனவுக்கோட்டை!

ஏழைப் பங்காளரின் பெயரால், ஏழை மாணவர்களின் கல்விப் பசிக்காகக் கட்டப்படும் ஒரு பிரம்மாண்ட உள்கட்டமைப்பு, அதிகாரிகளின் அலட்சியத்தால் கால தாமதமாவதை விட ஒரு கொடுமை இருக்க முடியுமா? கடந்த 2025 ஏப்ரலில் தொடங்கப்பட்ட இந்த ரூ.290 கோடி மதிப்பிலான பிரம்மாண்ட நூலகத் திட்டம், வரும் 2026 செப்டம்பருக்குள் முடிவடைந்திருக்க வேண்டும்.

ஆரம்பத்தில் காட்டிய வேகம், வெறும் கண்துடைப்போ என்று எண்ணத் தோன்றுகிறது. 2026 பிப்ரவரியிலேயே முடியும் என்று மார்தட்டிய அதிகாரிகள், இன்று காலக்கெடு நெருங்கும் நிலையிலும் கைகளைக் கட்டிக்கொண்டு வேடிக்கை பார்க்கிறார்கள்.

தேர்தல் முடிந்தும் தீராத அதிகாரிகளின் தூக்கம்!

தேர்தல் விதிகள் என்றொரு போலித்திரை: தேர்தல் நடத்தை விதிகள் அமலுக்கு வந்ததால் பணிகள் முடங்கின என்று ஒரு நொண்டிச் சாக்கைக் கூறுகிறார்கள். சரி, தேர்தல் முடிந்து, கட்டுப்பாடுகள் தளர்த்தப்பட்டு ஒரு மாதத்திற்கு மேலாகியும் இன்னும் ஏன் இந்த நத்தை வேகம்?

வெளிமாநிலத் தொழிலாளர்கள் வரவில்லையாம்

ஊருக்குப் போன தொழிலாளர்கள் வரவில்லை என்று பல்லவி பாடுகிறார்கள். தமிழ்நாட்டின் ஆகச்சிறந்த ஒரு கல்வி மையத்தைக் கட்ட, வெளிமாநிலத் தொழிலாளர்களை மட்டுமே நம்பியா இந்த அரசு நிர்வாகம் இயங்குகிறது?

இணையாக நடக்கும் ஏமாற்று வேலைகள்

இப்போது ஆள் வந்துவிட்டார்கள், சிவில் வேலை, கூரை வேலை, உள்வடிவமைப்பு என எல்லாவற்றையும் ஒரே நேரத்தில் செய்யப் போகிறோம் என்று வெற்று வாக்குறுதிகளை அள்ளி வீசுகிறார்கள். செப்டம்பர் மாதத்திற்குள் இவ்வளவு பெரிய வளாகத்தை இவர்களால் எப்படி முடிக்க முடியும் என்ற கேள்விக்கு யாரிடமும் பதிலில்லை.

சொகுசு வசதிகளுக்குக் காட்டும் ஆர்வம்... சுவர்களில் இன்னும் ஏன் ஈரம்?

1.97 லட்சம் சதுர அடியில், 7 தளங்களாக வானுயரக் கட்டப்படும் இந்த வளாகத்தின் சிறப்பம்சங்களைப் பட்டியலிட இவர்களுக்கு நாவூறுகிறது. ஆனால், தரையிறங்கிப் பார்த்தால் வெறும் செங்கற்களும் காரைகளுமே காட்சியளிக்கின்றன.

மின்னணு புத்தகங்களுக்கு மட்டும் ரூ.50 கோடி நிதி ஒதுக்கீடு!

அதிநவீன உபகரணங்களுக்கு ரூ.5 கோடி பிரத்தியேகச் செலவு!

1,000 பேர் அமரக்கூடிய பிரம்மாண்ட கூட்டரங்கம், ரோபோடிக்ஸ் மண்டலம், செயற்கை நுண்ணறிவு (AI) ஆராய்ச்சி மையம் எனத் தாள்களில் மட்டுமே மின்னும் திட்டங்கள்!

படிப்பறைக்கு மின்சாரமும், புத்தகங்களுக்கு அலமாரியும் ஒழுங்காக வந்து சேருமா என்ற சந்தேகம் இருக்கும்போது, கேமிங் மண்டலமும், டிஜிட்டல் ஸ்டுடியோவும் யாருக்காகக் கட்டப்படுகிறது என்ற கோபம் வாசகர்கள் மத்தியில் எழுகிறது.

எப்போது விடியும் ஏழை மாணவர் வாழ்வு?

மாற்றுத்திறனாளிகளுக்கான சிறப்பு வசதிகள், போட்டித்தேர்வு எழுதும் மாணவர்களுக்கான தனிப் பிரிவுகள் என ஏழை எளிய மாணவர்களின் வாழ்வாதாரத்தோடு பிணைக்கப்பட்டுள்ள திட்டம் இது.

முழுமையாகக் குளிரூட்டப்பட்ட கட்டிடம், நகரும் படிக்கட்டுகள் (Escalators), 9 மின்தூக்கிகள் (Elevators), நூற்றுக்கணக்கான வாகனங்களை நிறுத்தும் வசதி எனப் பகட்டான அறிவிப்புகள் ஒருபுறமிருக்க, இன்னும் கட்டிடத்தின் பூச்சு வேலைகளே முழுமையடையவில்லை என்பதுதான் கசப்பான உண்மை.

வாசகர்களின் குமுறல்: அதிகார வர்க்கத்தின் மெத்தனத்தால், திருச்சியின் ஒரு தலைமுறை மாணவர்களின் கல்விக்கான வாய்ப்பு தள்ளிப்போய்க்கொண்டே இருக்கிறது. வெற்று அறிக்கைகளையும், தொழிலாளர்கள் பற்றாக்குறை என்ற சாக்குகளையும் மூட்டைகட்டி வைத்துவிட்டு, போர்க்கால அடிப்படையில் பணிகளை முடிக்காவிட்டால், திருச்சி மக்களின் கோபக் கனலில் இந்த நிர்வாகம் வெந்துபோவது உறுதி!