Mayiladuthurai: நாய்களிடம் போட்டி போட்டுக்கொண்டு அன்பு செலுத்திய ஆட்சியர், எஸ்.பி.,

மயிலாடுதுறை மாவட்டத்தில் முதல்முறையாக நடைபெற்ற நாய்கள் கண்காட்சியில் பல்வேறு மாவட்டங்களில் இருந்து வருகை தந்த நாய்கள் ஒய்யார நடை நடந்து பார்வையாளர்களை கவர்ந்தது. 

நாயிடம் அன்பு செலுத்தும் மாவட்ட ஆட்சியர்

தமிழ்நாட்டில் மு.க.ஸ்டாலின் தலைமையிலான திமுக ஆட்சி தொடங்கி ஒன்றரை ஆண்டுகளுக்கு மேலாக தமிழக மக்களுக்கு பல்வேறு எண்ணற்ற திட்டங்களை புதிதாக அறிமுகப்படுத்தியும், ஏற்கனவே நடைமுறையில் இருந்த பல்வேறு அரசு திட்டங்களில் திருத்தங்கள் மேற்கொண்டு செயல்படுத்தப்பட்டு வருகிறது. இந்நிலையில் "ஓயா உழைப்பின் ஓராண்டு" எனும் தலைப்பின் கீழ் தமிழ்நாடு செய்தி மக்கள் தொடர்பு துறை சார்பில் மாவட்டம் தோறும் அரசு நல திட்டங்கள் குறித்த புகைப்பட கண்காட்சி மற்றும் மக்கள் விழிப்புணர்வு கலை நிகழ்ச்சிகளை நடத்த திட்டமிட்டது. 

அதன் ஒன்றாக மயிலாடுதுறை மாவட்ட செய்தி மக்கள் தொடர்பு துறையின் சார்பில் மயிலாடுதுறை பரிமள ரங்கநாதர் கோயில் நந்தவனத்தில் கடந்த 15 -ம் தேதி காலை புகைப்பட கண்காட்சி தொடங்கப்பட்டது. புகைப்பட கண்காட்சியினை மயிலாடுதுறை மாவட்ட ஆட்சியர் மகாபாரதி ரிப்பன் வெட்டி துவக்கி வைத்தார். இந்நிகழ்வில் மயிலாடுதுறை பாராளுமன்ற உறுப்பினர், சட்டமன்ற உறுப்பினர், உள்ளாட்சி பிரதிநிதிகள் கலந்து கொண்டனர். புகைப்பட கண்காட்சியில் நூற்றுக்கும் மேற்பட்ட அரசு திட்டங்கள் துவக்கி வைத்தல் குறித்த புகைப்படங்களும், அரசு திட்டங்கள் குறித்த விளம்பரங்களும் மேலும் அது குறித்த பொதுமக்கள் அறிந்து கொள்ள வகையில் துறை சார்ந்த அலுவலர்களின் அரங்குகளில் துண்டு பிரசுரங்கள் வழங்குதல் உள்ளிட்டவைகளும் ஏற்பாடு செய்யப்பட்டிருந்தது.

தொடர்ந்து 24 ஆம் தேதி இரவு 9 மணி வரை இந்த கண்காட்சி நடைபெறுகிறது. இந்நிலையில் விழாவின் ஒரு பகுதியாக கால்நடை பராமரிப்பு துறை சார்பாக வளர்ப்பு நாய் கண்காட்சி நடைபெற்றது.  குடும்பத்தினருடன் வந்திருந்த மாவட்ட ஆட்சியர் மகாபாரதி மற்றும் மாவட்ட காவல் கண்காணிப்பாளர் எம்.எஸ்.நிஷா நாய் கண்காட்சியை துவங்கி வைத்தனர். இந்த நாய் கண்காட்சியில் மயிலாடுதுறை மாவட்டம் மட்டுமன்றி திருவாரூர், நாகப்பட்டினம் மாவட்டங்களைச் சேர்ந்த மொத்தம் 52 நாய்கள் பங்கேற்றன. கிரேடன், ஈரோப்பியன் டாபர்மேன், ப்ளூ டன், சிப்பி பாறை, கன்னி, பீகில், மின்பின், டேஸ் உள்ளிட்ட பல்வேறு வகையான நாய்கள் பங்கேற்றன. நாய்கள் அணிவகுத்து வந்த நிலையில், கம்பீரம், ஒய்யாரம், கட்டளைக்கு கீழ்ப்படிதல் உள்ளிட்ட பிரிவுகளில் நாய்களுக்கு மதிப்பெண்கள் வழங்கப்பட்டன.

இதில் திருவாரூரைச் சேர்ந்த நாய் முதல் இடத்தை பிடித்தது.நாகப்பட்டினத்தை சேர்ந்த நாய் இரண்டாம் இடமும், மயிலாடுதுறை சேர்ந்த நாய் மூன்றாம் இடத்தையும் பிடித்தது. பல்வேறு பிரிவுகளில் முதல் மூன்று இடங்களை பிடித்த நாய்களுக்கு பரிசுகளை மாவட்ட ஆட்சியர் மகாபாரதி, மாவட்ட காவல் கண்காணிப்பாளர்  நிஷா பரிசுகளை  வழங்கி பாராட்டு தெரிவித்தனர். நிகழ்ச்சியில் மாவட்ட ஆட்சியர் மகாபாரதி அனைத்து செல்லப்பிராணிகளையும் தலையை வருடி விட்டும், காது மடல்களைப் பிடித்தும் பழக்கப்படுத்தி நாயின் குணாதிசயங்களை கேட்டறிந்து மகிழ்ச்சி அடைந்தார். இதே போல் மாவட்ட காவல் கண்காணிப்பாளர் என்.எஸ்.நிஷா நாயை தூக்கி கொஞ்சியும் உற்சாகமடைந்தனர். இந்நிகழ்வில் ஏராளமான பார்வையாளர்கள் நாயுடன் ஆர்வமுடன் செல்பி எடுத்துக் கொண்டனர்.  மேலும் இந்நிகழ்ச்சியில் கோட்டாட்சியர் யுரேகா மற்றும் ஏராளமான பொதுமக்கள் பங்கேற்றனர்.