Pongal Gift: நாளைக்கு வீட்ல இருங்க; 1000 ரூபாயுடன் கூடிய பொங்கல் பரிசு தொகுப்புக்கு மறக்காம டோக்கன் வாங்கிடுங்க...!

பொங்கல் பண்டிகையை முன்னிட்டு தமிழக அரசு அறிவித்துள்ள பொங்கல் பரிசு  தொகுப்புக்கான டோக்கன் விநியோகம் நாளை தொடங்குகிறது. 

பொங்கல் பரிசு தொகுப்பு

பொங்கல் பண்டிகையை முன்னிட்டு தமிழக அரசு அறிவித்துள்ள பொங்கல் பரிசு  தொகுப்புக்கான டோக்கன் விநியோகம் நாளை தொடங்குகிறது. 

2023 ஆம் ஆண்டு பொங்கல் பண்டிகை ஜனவரி 15 ஆம் தேதி கொண்டாடப்படுகிறது. கடந்த அதிமுக ஆட்சியில் பொங்கல் பண்டிகைக்கு அதிகப்பட்சம் ரூ.2,500 வரை பணம் கொடுக்கப்பட்டு, கரும்பு,பச்சரிசி உட்பட பொங்கல் பொருட்களும் வழங்கப்பட்டது. ஆனால் தமிழகத்தில் கடந்தாண்டு திமுக தலைமையிலான அரசு பொறுப்பேற்றதும் இந்தாண்டு பொங்கலுக்கு பணம் எதுவும் வழங்கப்படாமல் முழு கரும்போடு சேர்த்து பச்சரிசி, வெல்லம், உள்ளிட்ட 21 பொருட்கள் இடம்பெற்றிருந்தது.

இதில் பல பொருட்கள் தரமில்லாததாக இருந்ததாக புகார் எழுந்த நிலையில் முதலமைச்சர் மு.க.ஸ்டாலின் இதுதொடர்பாக நடவடிக்கை எடுத்த நிலையில், பொங்கல் சிறப்பு தொகுப்பை விநியோகித்த சில நிறுவனங்கள் கருப்பு பட்டியலுக்குள் கொண்டுவர தமிழக அரசு உத்தரவிட்டது. இந்நிலையில் 2023 ஆம் ஆண்டு பொங்கலுக்கு குடும்ப அட்டைதாரர்களுக்கு ரூ.1,000 பரிசுத் தொகை அறிவிக்கப்பட்டுள்ளது. அதுமட்டுமில்லாமல் ஒரு கிலோ பச்சரிசி, சர்க்கரை வழங்க கடந்த சில தினங்களுக்கு முன்பு முதலமைச்சர் மு.க.ஸ்டாலின் உத்தரவிட்டார். 

ஆனால் பொங்கல் தொகுப்பில் கரும்பு இடம் பெறாததற்கு எதிர்க்கட்சி தலைவர் எடப்பாடி பழனிசாமி கடும் கண்டனம் தெரிவித்தார். தினமும் 100 முதல் 200 கார்டுகளுக்கு  பொங்கல் பரிசு தொகுப்பு விநியோகம் செய்ய திட்டமிடப்பட்டுள்ள நிலையில், போகி பண்டிகைக்கு முன்பு அனைத்து குடும்ப ரேஷன் அட்டைதாரர்களுக்கும் பொங்கல் பரிசு தொகுப்பு விநியோகம் செய்யப்படும் எனவும் தெரிவிக்கப்பட்டுள்ளது. 

இந்நிலையில் இந்த தொகுப்பினை பெறுவதற்கான டோக்கன் நாளை மற்றும் நாளை மறுநாள் வீடு, வீடாக விநியோகம் செய்யப்பட உள்ளதாக கூறப்படுகிறது. பொங்கல் பரிசு தொகுப்பை பெறுவதற்கான வரிசை எண்ணுடன், நேரமும் குறிப்பிடப்பட்டிருக்கும். இந்த திட்டத்திற்காக ரூ.2,357 கோடி ஒதுக்கீடு செய்யப்பட்டுள்ள நிலையில், வரும் ஜனவரி 2 ஆம் தேதி சென்னை தலைமை செயலகத்தில் இந்த திட்டத்தை முதலமைச்சர் மு.க.ஸ்டாலின் தொடங்கி வைக்கவுள்ளார் என்பது குறிப்பிடத்தக்கது.