இலங்கை அரசின் தொடரும் சதி; தமிழக மீனவர்களை காப்பாற்றுமா தி.மு.க. அரசு?

தமிழக மீனவர்களின் படகுகளை இலங்கை கடற்படைக்கு பயன்படுத்தும் இலங்கை அரசின் முடிவால் தமிழ்நாட்டு மீனவர்கள் அதிர்ச்சி அடைந்துள்ளனர்.

முதலமைச்சர் மு.க.ஸ்டாலின் - தமிழ்நாடு மீனவர்கள்

Source : twitter

மத்தியில் காங்கிரஸ், பா.ஜ.க. என எந்த அரசு அமைந்தாலும், தமிழ்நாட்டில் எந்த கட்சியின் ஆட்சி அமைந்தாலும் தீர்க்கப்படாமலே உள்ள பிரச்சினைகளில் தமிழக மீனவர்களின் பிரச்சினை மிக மிக முக்கியமானதாகும்.

தீராத தமிழக மீனவர்கள் சோகம்:

கச்சத்தீவு இந்தியாவில் இருந்து இலங்கையின் வசம் சென்றடைந்த பிறகு, எல்லை தாண்டி மீன்பிடித்ததாக கூறி தமிழக மீனவர்கள் மீது இலங்கை கடற்படையினர் நடத்தும் தாக்குதலானது தொடர்ந்து அதிகரித்து வருகிறது. குறிப்பாக 2000ம் ஆண்டுக்கு பிறகு தமிழக மீனவர்கள் இலங்கை கடற்படையினர் நடத்தும் தாக்குதல் மிக மோசமானது.

இதுவரை நூற்றுக்கும் மேற்பட்ட தமிழக மீனவர்கள் இலங்கை கடற்படையினர் நடத்திய துப்பாக்கிச்சூட்டினால் உயிரிழந்துள்ளனர். அவர்களுக்கு நீதி வேண்டும் என்றும், இந்த அநீதிக்கு முடிவு கட்ட வேண்டும் என்றும் பல முறை தமிழக மீனவர்கள் போராட்டத்தில் ஈடுபட்டனர். மீனவர்களின் உயிரை பறிப்பதுடன் அல்லாமல் தமிழக மீனவர்களின் படகுகள் மற்றும் வலைகளையும் இலங்கை கடற்படையினர் அவ்வப்போது சேதப்படுத்தி வருகின்றனர்.

இலங்கை அரசின் அதிர்ச்சி முடிவு:

தமிழக மீனவர்கள் பலரின் நூறறுக்கணக்கான படகுகளும், வலைகளும் இலங்கை கடற்படையின் வசம் உள்ளது. அதை மீட்டுத்தர வேண்டும் என்று தமிழக மீனவர்கள் மத்திய மற்றும் மாநில அரசுக்கு தொடர்ந்து பல முறை வலியுறுத்தி வருகின்றனர். ஆனாலும், அவர்களது கோரிக்கையை எந்த அரசும் இதுவரை முழுமையாக நிறைவேற்றவில்லை. சமீபத்தில் பொறுப்பேற்ற புதிய இலங்கை அதிபர் திசநாயகே இலங்கை எல்லைக்குள் வரும் இந்திய மீனவர்களுக்கு ( தமிழக மீனவர்கள்) எதிராக கடும் நடவடிக்கை எடுக்கப்படும் என்று கூறினார். இந்த நிலையில், இலங்கை கடற்படையால் சிறைபிடிக்கப்பட்ட தமிழக மீனவர்களின் படகுகளை பயன்படுத்திக் கொள்ள இலங்கை அரசு உத்தரவிட்டுள்ளது.

இலங்கை அரசின் இந்த உத்தரவைத் தொடர்ந்து மன்னார், மயிலிட்டி துறைமுகங்களில் நிறுத்தப்பட்டுள்ள தமிழக மீனவர்களின் படகுகளை முதற்கட்டமாக பயன்படுத்திக் கொள்ள நடவடிக்கை எடுக்கப்பட்டுள்ளது. இலங்கை அரசின் இந்த நடவடிக்கையால் தமிழக மீனவர்கள் மிகுந்த வேதனைக்கு ஆளாகியுள்ளனர். அவர்களின் வாழ்வாதாரமான படகுகளை பறிமுதல் செய்து கொண்டதுடன், மீனவர்களையும் கைது செய்து அவர்களது படகுகளையும் தற்போது இலங்கை கடற்படைக்காக பயன்படுத்தும் முடிவால் பேரதிர்ச்சி அடைந்துள்ளனர்.

தமிழக அரசு தீர்வு காணுமா?

இலங்கை அரசின் இந்த நடவடிக்கைக்கு எதிராக தமிழக அரசும், மத்திய அரசும் விரைந்து தீர்வு காணுமாறு வலியுறுத்தி வருகின்றனர். இலங்கை சிறையில் உள்ள தமிழக மீனவர்களும், அவர்களது படகுகளும் அவ்வப்போது விடுவிக்கப்பட்டு வந்தாலும் இலங்கை அரசிடம் சிக்கியுள்ள தமிழக மீனவர்களின் படகுகளும், சிறையில் உள்ள மீனவர்களும் இதுவரை முழுமையாக விடுதலை செய்யப்படவில்லை. கடந்த வாரம் பாம்பன் பாலத்தில் ராமேஸ்வரம் மீனவர்கள் இலங்கை சிறையில் உள்ள தமிழக மீனவர்கள் மற்றும் அவர்கள் படகுகளை விடுவிக்கக் கோரி சாலை மறியலில் ஈடுபட்டனர் என்பது குறிப்பிடத்தக்கது.