புதுச்சேரியில் தக்காளி விலை சரிவு: பொதுமக்கள் மகிழ்ச்சி, பரிதவிக்கும் விவசாயிகள்!
புதுச்சேரி பெரிய மார்க்கெட்டில் தக்காளி விலை கடும் சரிவு: பொதுமக்கள் மகிழ்ச்சி, பரிதவிக்கும் விவசாயிகள்!
புதுச்சேரி : புதுச்சேரி நேரு வீதியில் இயங்கி வரும் பெரிய மார்க்கெட்டில் தக்காளி வரத்து கணிசமாக அதிகரித்துள்ளதால், அதன் விலை வரலாறுகாணாத அளவில் கடுமையாகச் சரிந்துள்ளது. இதனால் பொதுமக்கள் மகிழ்ச்சியடைந்துள்ள போதிலும், உரிய விலை கிடைக்காமல் விவசாயிகள் வேதனையில் ஆழ்ந்துள்ளனர்.
உரிய விலை கிடைக்காமல் விவசாயிகள் வேதனை
புதுச்சேரி நேரு வீதியில் உள்ள பெரிய மார்க்கெட்டில் தக்காளி வரத்து குவிந்ததால் அதன் விலை அதிரடியாக சரிந்துள்ளது. 8 கிலோ தக்காளி ரூ.100-க்கு விற்பனையானதால் பொதுமக்கள் மகிழ்ச்சியடைந்தனர். அதேநேரம் பறிக்கும் கூலி கூட கிடைக்காததால் விவசாயிகள் வேதனையடைந்துள்ளனர்.
காய்கறிகள் வரத்து அதிகரிப்பு
புதுச்சேரி நேரு வீதியில் உள்ள பெரிய மார்க்கெட்டுக்கு தமிழகம், ஆந்திரா, கர்நாடகா, மகாராஷ்டிரா மற்றும் புதுச்சேரி சுற்றுவட்டார பகுதிகளில் இருந்து தினசரி டன் கணக்கில் காய்கறிகள் விற்பனைக்கு கொண்டு வரப்படுகின்றன.
இந்த நிலையில், மேற்கண்ட மாநிலங்களிலும் புதுச்சேரி சுற்றுவட்டார பகுதிகளிலும் தக்காளி உள்ளிட்ட காய்கறிகளின் விளைச்சல் அமோகமாக உள்ளது. இதனால் பெரிய மார்க்கெட்டுக்கு காய்கறிகளின் வரத்து கணிசமாக அதிகரித்துள்ளது.
கிலோ ரூ.12.50
வரத்து அதிகரிப்பு காரணமாக தக்காளி உள்ளிட்ட சில காய்கறிகளின் விலை கடுமையாக சரிந்துள்ளது. குறிப்பாக பெரிய மார்க்கெட்டில் தக்காளி விலை அதிரடியாக குறைந்து, 8 கிலோ தக்காளி ரூ.100-க்கு விற்பனை செய்யப்படுகிறது. அதாவது ஒரு கிலோ தக்காளி ரூ.12.50-க்கு விற்கப்படுகிறது.
விலை வீழ்ச்சி அடைந்துள்ளதால் இல்லத்தரசிகளும், பொதுமக்களும் போட்டி போட்டுக்கொண்டு தக்காளியை வாங்கிச் செல்கின்றனர்.
விலை நிலவரம்
பெரிய மார்க்கெட்டில் விற்கப்படும் பிற காய்கறிகளின் கிலோ வாரியான விலை நிலவரம் வருமாறு:-
முட்டைக்கோஸ் - ரூ.20
முள்ளங்கி - ரூ.25
சுரைக்காய், கோவக்காய், உருளைக்கிழங்கு, பீட்ரூட் - ரூ.30
புடலங்காய் - ரூ.34
வெண்டைக்காய் - ரூ.39
கொத்தவரங்காய், வெங்காயம் - ரூ.40
மிளகாய், பீர்க்கங்காய் - ரூ.50
மாங்காய், கத்தரிக்காய், சாம்பார் வெங்காயம் - ரூ.60
பாகற்காய் - ரூ.70
முருங்கைக்காய் - ரூ.90
விவசாயிகள் வேதனை
தக்காளி விலை சரிவு பொதுமக்களுக்கு மகிழ்ச்சியை ஏற்படுத்தி இருந்தாலும், தக்காளியை சாகுபடி செய்த விவசாயிகளுக்கு கடும் நஷ்டத்தை ஏற்படுத்தி உள்ளது.
இதுகுறித்து பாகூரைச் சேர்ந்த விவசாயி சந்திரன் கூறியதாவது:-
"தக்காளி விலை கடுமையாக சரிந்துள்ளதால் பறிக்கும் கூலி கூட கிடைப்பதில்லை. பறித்து மார்க்கெட்டுக்கு கொண்டு செல்லும் செலவும் திரும்ப வருவதில்லை. இதனால் தற்போது தக்காளியை பறிக்காமல் செடிகளிலேயே விட்டுள்ளோம்."
இவ்வாறு அவர் வேதனையுடன் தெரிவித்தார்.
தலைப்பு செய்திகள்
ட்ரெண்டிங் செய்திகள்
