Chennai Metro: மெட்ரோவில் அலைமோதும் கூட்டம்.. 2.81 லட்சம் மக்கள் ஒரே நாளில் பயணம்.. மெட்ரோ பக்கம் திரும்பும் மக்கள்..

சென்னை மெட்ரோ ரயிலில் 23 ஆம் தேதி அதிகபட்சமாக 2.81 லட்சம் பேர் ஒரே நாளில் பயணம் மேற்கொண்டுள்ளதாக மெட்ரோ ரயில் நிறுவனம் தரப்பில் தெரிவிக்கப்பட்டுள்ளது.

கோப்பு புகைப்படம்

23.06.2023 அன்று ஒரே நாளில் மட்டும் அதிகபட்சமாக 2,81,503 பயணிகள் சென்னை மெட்ரோ இரயில்களில் பயணம் செய்துள்ளனர் என தெரிவிக்கப்பட்டுள்ளது. 

”சென்னை மெட்ரோ இரயில் நிறுவனம், சென்னையில் உள்ள மக்களுக்கும், வெளி ஊரில் இருந்து வரும் பயணிகளுக்கும் மெட்ரோ இரயிலில் பயணிக்கும் போது ஒரு நம்பகமான பாதுகாப்பான போக்குவரத்து வசதியை அளித்து வருகிறது. அதன் பயனாக சென்னை மெட்ரோ இரயில்களில் பயணம் செய்பவர்களின் எண்ணிக்கை கணிசமாக அதிகரிக்கிறது. இது பயணிகளின் நல்வரவேற்பை பெற்றுள்ளதாகவும், பயன்பாடும் அதிகரித்து வருவதையும் காட்டுகிறது.

இந்நிலையில், 23.06.2023 அன்று ஒரே நாளில் மட்டும் அதிகபட்சமாக 2,81,503 பயணிகள் சென்னை மெட்ரோ இரயில்களில் பயணம் செய்துள்ளனர். இதில் அதிகபட்சமாக புரட்சித்தலைவர் டாக்டர் எம்.ஜி.ராமச்சந்திரன் சென்ட்ரல் மெட்ரோ இரயில் நிலையத்தில் 23,745 பயணிகளும், திருமங்கலம் மெட்ரோ இரயில் நிலையத்தில் 14,935 பயணிகளும், கிண்டி மெட்ரோ இரயில் நிலையத்தில் 14,938 பயணிகளும் பயணம் செய்துள்ளனர்.

அந்த வகையில், ஜனவரி மாதத்தில் அதிகபட்சமாக 13.01.2023 அன்று 2,65,847 பயணிகளும், பிப்ரவரி மாதத்தில் அதிகபட்சமாக 10.02.2023 அன்று 2,61,668 பயணிகளும், மார்ச் மாதத்தில் அதிகபட்சமாக 10.03.2023 அன்று 2.58.671 பயணிகளும், ஏப்ரல் மாதத்தில் அதிகபட்சமாக 28.04.2023 அன்று 2,68,680 பயணிகளும், மே மாதத்தில் அதிகபட்சமாக 24,05:2023 அன்று 2,64,974 பயணிகளும் மெட்ரோ இரயில்களில் பயணம் செய்துள்ளனர்.

சென்னை மெட்ரோ இரயில் நிறுவனம் மெட்ரோ இரயில்களில் பயணிப்பவர்களுக்கு க்யுஆர் குறியீடு (QR Code) பயணச்சீட்டு மற்றும் பயண அட்டைகளை (Travel Curd) பயன்படுத்தி பயணிக்கும் பயணிகளுக்கு 20% கட்டணத் தள்ளுபடி வழங்கப்படுகிறது. சென்னை மெட்ரோ இரயில் நிறுவனத்தின் வாட்ஸ்அப் டிக்கெட் (+91 83000 86000) மூலமாகவும் பயணிகள் தங்கள் பயணச்சீட்டுகளை முன்பதிவு செய்யலாம்.

மெட்ரோ இரயில்கள் மற்றும் மெட்ரோ இரயில் நிலையங்களை சுத்தமாவும், சுகாதாரமாகவும் பராமரிப்பதில் மிகுந்த ஒத்துழைப்பு நல்கிவரும் அனைத்து பயணிகளுக்கும் சென்னை மெட்ரோ இரயில் நிர்வாகத்தின் சார்பில் மனமார்ந்த நன்றி” என தெரிவிக்கப்பட்டுள்ளது.

மெட்ரோ ரயில் மூலம் பயணம் செய்வதால் மக்கள் எந்த இன்னல்களும் இல்லாமல் எளிதில் பயணம் மேற்கொள்ல முடிகிறது. மெட்ரோ ரயிலில் கூடுதல் கட்டணம் வசூளிக்கப்படுவதால் ஆரம்பத்தில் பெரிதாக மக்கள் பயன்படுத்தவில்லை. ஆனால் மெட்ரோ ரயில் தரப்பில் பல்வேறு சலுகைகள் கொடுக்கப்பட்டு வரும் நிலையில் மக்கள் மெல்ல மெல்ல மெட்ரோ ரயில் மூலம் பயணம் மேற்கொள்ளத் தொடங்கினர். கடந்த மாதம் ச்மட்டும் மெட்ரோவில் சுமார் 75 லட்சத்துக்கும் அதிகமான மக்கள் பயணம் மேற்கொண்டுள்ளனர். மெட்ரோ சேவை தொடங்கப்பட்டதிலிருந்து மக்கள் அதிகம் பயணம் மேற்கொண்டது கடந்த மாதம் தான் என்பது குறிப்பிடத்தக்கது.