மயிலாடுதுறை: இறுதி வாக்காளர் பட்டியல் வெளியீடு - 7.29 லட்சம் வாக்காளர்கள்; பெண்கள் ஆதிக்கம்!

மயிலாடுதுறை மாவட்டத்தின் 2026-ஆம் ஆண்டிற்கான இறுதி வாக்காளர் பட்டியலை மாவட்ட ஆட்சியர் வெளியிட்டுள்ளார். இதில் மொத்தம் 7.29 லட்சம் வாக்காளர்கள் உள்ளனர். 24,126 புதிய பெயர்கள் சேர்க்கப்பட்டுள்ளனர்.

இறுதி வாக்காளர் பட்டியல் வெளியீடு

Source : ABP

மயிலாடுதுறை: மயிலாடுதுறை மாவட்ட ஆட்சியர் அலுவலக கூட்டரங்கில் இன்று நடைபெற்ற இறுதி வாக்காளர் பட்டியல் வெளியீடு நிகழ்வில், 2026-ஆம் ஆண்டிற்கான இறுதி வாக்காளர் பட்டியலை மாவட்ட ஆட்சியரும், மாவட்ட தேர்தல் அலுவலருமான ஹெச்.எஸ். ஸ்ரீகாந்த் அதிகாரப்பூர்வமாக வெளியிட்டார். அங்கீகரிக்கப்பட்ட அரசியல் கட்சிப் பிரதிநிதிகள் முன்னிலையில் இந்த பட்டியல் வெளியிடப்பட்டது.

மாவட்டத்தின் மொத்த வாக்காளர் நிலவரம்

01.01.2026-ஐ தகுதி நாளாகக் கொண்டு மேற்கொள்ளப்பட்ட சிறப்புச் சுருக்க முறை திருத்தப் பணிகளுக்குப் பிறகு, மாவட்டத்தின் ஒட்டுமொத்த வாக்காளர் விவரங்கள் வெளியிடப்பட்டுள்ளன. அதன்படி, மயிலாடுதுறை மாவட்டத்தில் உள்ள மூன்று சட்டமன்றத் தொகுதிகளிலும் சேர்த்து மொத்தம் 7,29,216 வாக்காளர்கள் உள்ளனர்.

மாவட்டத்தின் வாக்காளர் விகிதாச்சாரத்தைப் பொறுத்தவரை, ஆண்களை விட பெண் வாக்காளர்களே அதிக எண்ணிக்கையில் உள்ளனர் என்பது குறிப்பிடத்தக்கது.

ஆண் வாக்காளர்கள் - 3,60,493 

பெண் வாக்காளர்கள் - 3,68,676 

மூன்றாம் பாலினத்தவர் - 47 

மொத்த வாக்காளர்கள் - 7,29,216 

சட்டமன்றத் தொகுதி வாரியான விரிவான விவரங்கள்

மயிலாடுதுறை மாவட்டத்திலுள்ள மூன்று முக்கிய சட்டமன்றத் தொகுதிகளின் நிலவரம் பின்வருமாறு

1. சீர்காழி (தனி) சட்டமன்றத் தொகுதி (160)

இத்தொகுதியில் மொத்தம் 2,39,469 வாக்காளர்கள் உள்ளனர்.

 * ஆண்கள்: 1,18,809

 * பெண்கள்: 1,20,647

 * மூன்றாம் பாலினத்தவர்: 13

2. மயிலாடுதுறை சட்டமன்றத் தொகுதி (161):

இத்தொகுதியில் மொத்தம் 2,32,618 வாக்காளர்கள் உள்ளனர்.

 * ஆண்கள்: 1,14,613

 * பெண்கள்: 1,17,979

 * மூன்றாம் பாலினத்தவர்: 26

3. பூம்புகார் சட்டமன்றத் தொகுதி (162):

மாவட்டத்திலேயே அதிக வாக்காளர்களைக் கொண்ட தொகுதியாக பூம்புகார் திகழ்கிறது. இங்கு மொத்தம் 2,57,129 வாக்காளர்கள் உள்ளனர்.

 * ஆண்கள்: 1,27,071

 * பெண்கள்: 1,30,050

 * மூன்றாம் பாலினத்தவர்: 8

சேர்க்கை மற்றும் நீக்கம் குறித்த விவரங்கள்

கடந்த 19.12.2025 அன்று வரைவு வாக்காளர் பட்டியல் வெளியிடப்பட்டது. அதனைத் தொடர்ந்து நடைபெற்ற சிறப்பு முகாம்கள் மற்றும் திருத்தப் பணிகளின் புள்ளிவிவரங்களை ஆட்சியர் பகிர்ந்து கொண்டார்.

"வரைவு வாக்காளர் பட்டியல் வெளியீட்டிற்குப் பிறகு, பெறப்பட்ட படிவங்களின் அடிப்படையில் மாவட்டத்தில் 24,126 புதிய வாக்காளர்கள் பட்டியலில் சேர்க்கப்பட்டுள்ளனர். அதேபோல், இறப்பு மற்றும் முகவரி மாற்றம் போன்ற காரணங்களால் 3,032 வாக்காளர்களின் பெயர்கள் பட்டியலிலிருந்து நீக்கம் செய்யப்பட்டுள்ளன," என்று ஹெச்.எஸ். ஸ்ரீகாந்த் தெரிவித்துள்ளார்.

பொதுமக்கள் பார்வைக்கு வைப்பு

வெளியிடப்பட்டுள்ள இந்த இறுதி வாக்காளர் பட்டியல், மாவட்டத்திலுள்ள அனைத்து வாக்காளர் பதிவு அலுவலர் அலுவலகங்கள் மற்றும் அனைத்து வாக்குச்சாவடி அமைவிடங்களிலும் பொதுமக்கள் பார்வைக்காக வைக்கப்பட்டுள்ளது. பொதுமக்கள் தங்கள் பெயர் பட்டியலில் இடம் பெற்றுள்ளதா என்பதை அங்கு சென்று சரிபார்த்துக் கொள்ளலாம்.

மேலும், தொழில்நுட்ப வசதிகளைப் பயன்படுத்தி வாக்காளர்கள் தங்களது விவரங்களை அறிய கீழ்க்கண்ட வழிமுறைகளைப் பின்பற்றலாம்:

*இணையதளம்:  voters.eci.gov.in மற்றும் www.elections.tn.gov.in

* செயலி: கைபேசியில் 'Voters Helpline App' என்ற செயலியைப் பதிவிறக்கம் செய்து விவரங்களைத் தெரிந்து கொள்ளலாம்.

பங்கேற்ற அதிகாரிகள்

இந்த நிகழ்ச்சியில் மாவட்ட வருவாய் அலுவலர் ஆர். பூங்கொடி, மயிலாடுதுறை வருவாய் கோட்டாட்சியர் விஷ்ணுபிரியா, சீர்காழி வருவாய் கோட்டாட்சியர் சுரேஷ், உதவி ஆணையர் (கலால்) மாணிக்கராஜ், தனி வட்டாட்சியர் (தேர்தல்) முருகேசன் மற்றும் பல்வேறு அங்கீகரிக்கப்பட்ட அரசியல் கட்சிகளின் முக்கிய பிரமுகர்கள் கலந்துகொண்டனர்.

மயிலாடுதுறை மாவட்டத்தில் தேர்தல் பணிகளுக்கான அடிப்படைத் தரவுகள் தயார் நிலையில் இருப்பதை இந்த இறுதிப் பட்டியல் வெளியீடு உறுதிப்படுத்தியுள்ளது.