ஓபிஎஸ்க்கு தகுதி இல்லை; திமுகதான் எதிரி; அப்போ பாஜக? –இபிஎஸ் போடும் கணக்கு! டெல்லியில் நடந்தது என்ன?

ஓ.பன்னீர்செல்வத்தை அதிமுகவில் இணைக்க முடியாது என அக்கட்சியின் பொதுச்செயலாளர் எடப்பாடி பழனிசாமி திட்டவட்டமாக தெரிவித்துள்ளார்.

ஓபிஎஸ் - இபிஎஸ்

Source : twitter

ஓ.பன்னீர்செல்வத்தை அதிமுகவில் இணைக்க முடியாது என அக்கட்சியின் பொதுச்செயலாளர் எடப்பாடி பழனிசாமி திட்டவட்டமாக தெரிவித்துள்ளார்.

அதிமுக பொதுச்செயலாளர் எடப்பாடி பழனிசாமி தூத்துக்குடி விமானநிலையத்தில் செய்தியாளர்களைச் சந்தித்தார். அப்போது பேசிய அவர், “திமுகவை தவிர வேறு எந்த கட்சியும் அதிமுகவுக்கு எதிரிகள் அல்ல. தமிழ்நாட்டிற்கு வரவேண்டிய நிலுவை தொகையை விடுவிக்க அமித்ஷாவிடம் கோரிக்கை வைத்தோம். அதிமுகவில் ஓ.பன்னீர்செல்வம் இணைப்பு சாத்தியம் இல்லை. அவரை அதிமுகவில் இணைக்க முடியாது. ஓபிஎஸ் தலைமையில் ராயப்பேட்டை அதிமுக அலுவலகத்தில் தாக்குதல் நடத்தப்பட்டது.

அதிமுகவில் இருந்து ஓபிஎஸ் பிரிந்தது பிரிந்ததுதான். அண்ணாமலையின் டெல்லி பயணம் குறித்து அவரிடம் தான் கேட்க வேண்டும். ஒருமித்த் கருத்துடைய கட்சிகளுடன் தேர்தலின் போது கூட்டணி வைப்போம்.

அதிமுகவில் இருக்கவே தகுதியற்றவர் ஓபிஎஸ். என்னை மத்திய அரசு மிரட்டுகிறதா? ஆட்சியில் இல்லாதபோது உருட்டல் மிரட்டல் எல்லாம் எப்படி எங்களை செய்ய முடியும்? எதிரிகளிடம் அதிமுகவை அடமானம் வைக்க மாட்டோம்” எனத் தெரிவித்தார்.

முன்னதாக டெல்லிக்கு பயணம் செய்த எடப்பாடி பழனிசாமி, மத்திய அமைச்சர் அமித்ஷாவை சந்தித்து 2 மணிநேரம் பேச்சுவார்த்தை நடத்தினார்.

இதுகுறித்து பேசிய இபிஎஸ், தமிழகத்தின் பிரச்சினைகள் குறித்து மட்டுமே பேசியதாகவும் கூட்டணி குறித்து பேசவில்லை எனவும் தெரிவித்தார்.

இபிஎஸ் டெல்லி பயணம் குறித்து முன்னாள் முதலமைச்சர் பன்னீர்செல்வத்திடம் கேள்வி எழுப்பப்பட்டபோது எல்லம் நல்லதுக்குதான்; நல்லது நடக்கும் எனத் தெரிவித்திருந்தார்.

இதனிடையே இபிஎஸ் டெல்லி சென்று அமித்ஷாவை சந்தித்து வந்த நிலையில் பாஜக மாநிலத் தலைவர் அண்ணாமலை டெல்லிக்கு படையெடுக்கிறார். இதனால் அதிமுக பாஜக கூட்டணி இறுதியாகுமோ என்ற எதிர்பார்ப்பு நிலவி வருகிறது.

ஏனென்றால் இதுவரை பாஜகவை திட்டவட்டமாக எதிர்த்த இபிஎஸ் தற்போது சற்று தளர்ந்துள்ளார் என்றே கருதப்படுகிறது. பாஜகவுடன் நெருக்கமாக இருக்கும் ஓ.பன்னீர்செல்வத்தை ஆதரிக்காமல் பாஜகவை மட்டும் வைத்து எடப்பாடி பழனிசாமி எப்படி காய் நகர்த்த போகிறார் என்ற எதிர்பார்ப்பு நிலவி வருகிறது.