Chennai Trains: சென்னை மின்சார ரயில்களில் பயணம் செய்பவர்களே.. இன்றும் நாளையும் 58 ரயில்கள் ரத்து..!

சென்னை புறநகர் மின்சார ரயில் சேவையில் இன்றும், நாளையும் மாற்றம் செய்யப்பட்டு 58 ரயில்கள் ரத்து செய்யப்படுவதாக தெற்கு ரயில்வே அறிவித்துள்ளது. 

மின்சார ரயில்கள் ரத்து

சென்னை புறநகர் மின்சார ரயில் சேவையில் இன்றும், நாளையும் மாற்றம் செய்யப்பட்டு 58 ரயில்கள் ரத்து செய்யப்படுவதாக தெற்கு ரயில்வே அறிவித்துள்ளது. 

சென்னையின் மிகப்பெரிய போக்குவரத்து சாதனங்களில் லட்சக்கணக்கான மக்கள் தினம்தோறும் பயணப்பட்டு வரும் மின்சார ரயில்கள் மிக முக்கிய பங்கு வகிக்கிறது. அதிகாலை 3.45 மணி தொடங்கி இரவு 1 மணி வரை மின்சார ரயில்கள் இயக்கப்பட்டு வரும் நிலையில் திங்கள் முதல் சனி வரை ஒரு கால அட்டவணையிலும், ஞாயிற்றுக்கிழமை ஒரு கால அட்டவணையிலும் ரயில்கள் இயக்கப்பட்டு வருகிறது. சில நேரங்களில் தண்டவாள பரமாரிப்பு பணி, சிக்னல் கோளாறு, கனமழை போன்ற சமயங்களில் நேர அமைப்பானது மாற்றியமைக்கப்படும்,

மின்சார ரயில்களை பொறுத்தவரை சென்னை கடற்கரை - தாம்பரம். செங்கல்பட்டு, காஞ்சிபுரம்,  சென்னை சென்ட்ரல் - கும்மிடிப்பூண்டி, சென்னை சென்ட்ரல் - அரக்கோணம், சென்னை கடற்கரை - வேளச்சேரி ஆகிய 4 மார்க்கங்களில் நூற்றுக்கணக்கான ரயில்கள் தினம்தோறும் இயக்கப்பட்டு வருகிறது. பள்ளி, கல்லூரி செல்பவர்கள், வேலைக்கு செல்பவர்கள், வெளியூர் பயணிகள் என அனைவரும் இந்த ரயில்களில் பயணப்பட்டு வருகின்றனர். விமான நிலையம்,முக்கிய ரயில் நிலையங்களை மின்சார ரயில்கள் இணைப்பதால் எப்போதும் பயணிகள் கூட்டம் நிரம்பி காணப்படும். 

இப்படியான நிலையில் கடந்த அக்டோபர் 1 மற்றும் 2 ஆகிய தினங்களில் தண்டவாள பராமரிப்பு பணிகள் நடைபெற்றது. முன்னறிவிப்பின்றி நடைபெற்ற இந்த பணிகளால் பல ரயில்கள் கிட்டதட்ட 3 மணி நேரம் முழுமையாக ரத்து செய்யப்பட்டது. இதனால் பயணிகள் கடும் அவதியடைந்தனர். மேலும் மேற்கண்ட அந்த 2 நாட்கள் அரசு விடுமுறை தினமாக சென்றதால் பலரும் வெளியே செல்ல எண்ணிய நிலையில் ரயில்கள் ரத்து செய்யப்பட்டதால் பேருந்துகளில் கூட்டம் அலைமோதியது. 

இந்நிலையில் தண்டவாள பராமரிப்பு பணிகள் காரணமாக இன்று (அக்டோபர் 7) 14 ரயில்களும், நாளை (அக்டோபர் 8) 44 மின்சார ரயில்களின் சேவையும் ரத்து செய்யப்படுவதாக அறிவிக்கப்பட்டுள்ளது. அதன்படி,

இன்று இரவு சென்ட்ரல் - அரக்கோணம் வழித்தடத்தில் பேசின் பிரிட்ஜ் - வியாசர்பாடி ஜீவா ரயில் நிலையங்களில் இடையே பராமரிப்பு பணி நடைபெற இருப்பதால் இரவு 11.30 மணி காலை 6.30 மணி வரை 14 மின்சார ரயில் சேவை ரத்து செய்யப்பட்டுள்ளது. அதன்படி, மூர் மார்க்கெட்டில் இருந்து இரவு 10.35க்கு  பட்டாபிராம் புறப்படும் ரயில், இரவு 11.30 மற்றும்  11.45 மணிக்கு ஆவடி செல்லும் ரயில், மிலிட்டரி சைடிங்கில் ஆவடிக்கு இரவு 11.55க்கு வரும் ரயில்கள் ரத்து செய்யப்பட்டுள்ளது. 

இதேபோல் மூர்மார்க்கெட்டில் இருந்து நாளை காலை 4.15 மணிக்கு பட்டாபிராம் மிலிட்டரில் சைடிங் செல்லும் ரயில், திருவள்ளூருக்கு காலை 4.30 மணிக்கு புறப்படும் ரயில், அரக்கோணத்துக்கு 5.30 மணிக்கு புறப்படும் ரயில், திருவள்ளூருக்கு 5.40 மணிக்கு புறப்படும் ரயில்களும் ரத்து செய்யப்படுகிறது.நாளை காலை 10.30 மணி முதல் மதியம் 2.30 மணி வரை சென்னை கடற்கரை - தாம்பரம் இடையேயான மின்சார ரயில் சேவை, காலை 10.05 முதல் மதியம் 3.30 மணி வரை தாம்பரம் - கடற்கரை இடையேயான சேவை, காலை 9.40 மணி வரை மதியம் 1 மணி வரை செங்கல்பட்டு - சென்னை கடற்கரை வரையிலான சேவை ரத்து செய்யப்பட்டுள்ளது. 

பயணிகள் வசதிக்காக தாம்பரம் - செங்கல்பட்டு இடையே காலை 11 மணி, 11.50, மதியம் 12.30, 12.50, 1, 1.45, 2.15 மணிக்கு சிறப்பு ரயில்களும், காலை 9.40 , 10.20, 10.55, 11.30,மதியம் 12 மணி, 12.20, 1 மணி ஆகிய நேரங்களில் சிறப்பு ரயில்கள் இயக்கப்படும் என தெரிவிக்கப்பட்டுள்ளது.