Pongal Gift: சேலத்தில் பொங்கல் பரிசு தொகுப்பு விநியோகம் தொடக்கம் - மக்கள் மகிழ்ச்சி

இந்த ஆண்டு பொங்கல் பரிசு தொகுப்பில் தரமான கரும்பு மற்றும் ஆயிரம் ரூபாய் ரொக்கம் வழங்கியுள்ளது மகிழ்ச்சி அளிப்பதாக பொதுமக்கள் கூறினர்.

சேலம் மாவட்டம்

தமிழகம் முழுவதும் அரிசி குடும்ப அட்டைதாரர்கள் மற்றும் இலங்கை தமிழர் மறுவாழ்வு முகாம்களில் வசிக்கும் குடும்பங்களுக்கு பொங்கல் பரிசு தொகுப்பு வழங்கப்படும் என தமிழக முதல்வர் அறிவித்தார். இந்த பரிசு தொகுப்பில் தலா 1 கிலோ பச்சரிசி, 1 கிலோ சர்க்கரை மற்றும் ரூ. 1,000 ரொக்கத்துடன் முழு கரும்பும் சேர்த்து வழங்கப்படுகிறது. சென்னையில் இன்று நடைபெற்ற நிகழ்ச்சியில் பொங்கல் பரிசு விநியோகத்தை முதலமைச்சர் மு.க.ஸ்டாலின் துவக்கி வைத்தார். அதனைத் தொடர்ந்து தமிழகம் முழுவதும் உள்ள அனைத்து நியாய விலை கடைகளிலும் குடும்ப அட்டைதாரர்களுக்கு பொங்கல் பரிசு தொகுப்பு வழங்கப்பட்டு வருகிறது.

சேலம் மாவட்டத்தை பொருத்தவரை 1,606 நியாய விலை கடைகள் மூலம் 10 லட்சத்து 73 ஆயிரத்து 514 அரிசி பெறும் குடும்ப அட்டைதாரர்கள் மற்றும் 939 இலங்கைத் தமிழர் மறுவாழ்வு முகாம்களில் வசிக்கும் குடும்பங்கள் என மொத்தம் 10 லட்சத்து 74 ஆயிரத்து 453 குடும்பங்களுக்கு பொங்கல் பரிசு தொகுப்பு வழங்குவதற்கு ரூ.118.98 கோடி நிதி ஒதுக்கீடு செய்யப்பட்டுள்ளது. நகர்ப்புற பகுதிகளில் உள்ள நியாய விலை கடைகளில் நாள் ஒன்றுக்கு 350 குடும்ப அட்டைதாரர்களுக்கும், கிராமப்புற பகுதிகளில் உள்ள நியாய விலை கடைகளில் நாள் ஒன்றுக்கு 250 குடும்ப அட்டைதாரர்களுக்கும் பொங்கல் பரிசு தொகுப்பு வழங்கும் வகையில் ரேஷன் கடை விற்பனையாளர்கள் மூலம் குடும்ப அட்டைதாரர்களுக்கு ஏற்கனவே டோக்கன்கள் வழங்கப்பட்டுள்ளது. டோக்கனில் குறிப்பிடப்பட்டுள்ள நாளில் நியாய விலை கடைக்கு நேரில் சென்று, சமூக இடைவெளியை கடைப்பிடித்து பொங்கல் பரிசு தொகுப்பினை குடும்ப அட்டைதாரர்கள் பெற்றுக் கொள்ளலாம் என மாவட்ட நிர்வாகம் அறிவித்துள்ளது. 

அவ்வாறு இன்றைய தினம் பொங்கல் பரிசு தொகுப்பு பெற டோக்கன் பெற்றிருந்த குடும்ப அட்டைதாரர்கள் அந்தந்த நியாய விலை கடைகளில் ரூ. 1,000 ரொக்கத்துடன் கூடிய பொங்கல் பரிசு தொகுப்பை பெற்று செல்கின்றனர். சேலம் எம்டிஎஸ் நகரில் உள்ள நியாய விலை கடையில் குடும்ப அட்டைதாரர்களுக்கு பொங்கல் பரிசு தொகுப்பு வழங்கும் நிகழ்வை சேலம் மாவட்ட வருவாய் அலுவலர் மேனகா, சேலம் மாநகராட்சி மேயர் இராமச்சந்திரன், சேலம் மாநகராட்சி துணை மேயர் சாரதா தேவி, சேலம் நாடாளுமன்ற உறுப்பினர் எஸ்.ஆர்.பார்த்திபன் ஆகியோர் துவக்கி வைத்தனர்.

இந்த ஆண்டு பொங்கல் பரிசு தொகுப்பில் தரமான கரும்பு மற்றும் ஆயிரம் ரூபாய் ரொக்கம் வழங்கியுள்ளது மகிழ்ச்சி அளிப்பதாக பொதுமக்கள் கூறினர்.

இந்த நிலையில் நேற்று சேலம் மாவட்டத்தில் உள்ள அயோத்தியாப்பட்டினம், மின்னாம்பள்ளி மற்றும் காரியப்பட்டி ஆகிய நியாய விலைக்கடைகளில் சேலம் மாவட்ட ஆட்சித் தலைவர் கார்மேகம் நேரடி ஆய்வு மேற்கொண்டார். குறிப்பாக சேலம் மாவட்டத்திற்குத் தேவையான கரும்புகள் அனைத்தும் சேலம் மாவட்டத்திலிருந்தே கொள்முதல் செய்யப்பட்டு வருகிறது. சேலம் மாவட்டத்தில் அதிகமாக கரும்பு பயிரிடப்பட்டுள்ளதால் மற்ற மாவட்டங்களான நீலகிரி, கோயம்புத்தூர், ஈரோடு, தருமபுரி உள்ளிட்ட மாவட்டங்களுக்குத் தேவையான கரும்புகளையும் இங்கிருந்து தொடர்புடைய மாவட்டங்களில் அமைக்கப்பட்டுள்ள அலுவலர்கள் குழுவின் மூலம் விவசாயிகளிடமிருந்து கொள்முதல் செய்யப்பட்டது குறிப்பிடத்தக்கது.