Actor Vijay: “காங்கிரஸ் - திமுக கூட்டணியில் விஜயை இணைக்க தயாராக உள்ளோம்” - எம்பி விஜய் வசந்த்
மத்தியில் ஆளும் அரசானது தாங்கள் ஆளாத மாநிலங்களில் முக்கிய பிரமுகர்களுக்கு இது போன்ற நெருக்கடி கொடுப்பது என்பது புதிதல்ல. அதுபோன்று தான் செந்தில் பாலாஜிக்கு நெருக்கடி கொடுக்கின்றனர்.
காங்கிரஸ் கட்சியின் முன்னாள் தலைவர் ராகுல் காந்தியின் 53வது பிறந்தநாள் நாடு முழுவதும் கொண்டாடப்பட்டு வரும் நிலையில் காங்கிரஸ் கட்சியினர் பல்வேறு நலத்திட்ட உதவிகள் வழங்கி வருகின்றனர். இதன் ஒரு பகுதியாக குமரி மாவட்டத்திலும் காங்கிரஸ் கட்சியினர் பல்வேறு இடங்களில் நலத்திட்ட உதவிகள் வழங்கி கொண்டாடி வருகின்றனர். குறிப்பாக குமரி பாராளுமன்ற உறுப்பினர் அலுவலகத்தில் வைத்து நடைபெற்ற பிறந்தநாள் கொண்டாட்டத்தில் பாராளுமன்ற உறுப்பினர் விஜய்வசந்த் கலந்து கொண்டு ஏழை எளிய மக்களுக்கு தையல் இயந்திரம் உள்ளிட்ட நலத்திட்ட உதவிகள் வழங்கி கேக் வெட்டி கொண்டாடினார்.
இதனையடுத்து செய்தியாளர்களை சந்தித்த பாராளுமன்ற உறுப்பினர் விஜய்வசந்த் கூறும் பொழுது, “நடிகர் விஜய் அரசியலில் வர வேண்டும் என்ற ஆசை முன்னதாகவே அவருக்கு இருந்து வந்தது. தற்போது மாணவர்களுக்கு நலத்திட்ட உதவிகள் வழங்குதல் மூலம் வெளிப்படுத்த துவங்கி உள்ளார். இவர் முன்னதாகவே வந்துவிட்டார் என்று எண்ணத்தோன்றுகிறது. வரும் பாராளுமன்ற தேர்தலில் காங்கிரஸ்-திமுக கூட்டணியில் விஜயை இணைக்க தயாராக உள்ளோம். அதை தலைமை தான் முடிவு செய்ய வேண்டும். தமிழகத்தில் இது புதிதல்ல, ஏற்கனவே கலைத்துறையில் இருந்து ஏராளமானவர்கள் வந்துள்ளனர் அவர்களில் பலர் சாதித்தும் உள்ளனர். காலம் பதில் சொல்லும்” என்றார்.
தொடர்ந்து பேசிய அவர், “அமலாக்கத்துறை செயல்பாடு என்பது அரசியல் நோக்கத்தோடு செய்வது போல் உள்ளது. தொடர்ந்து 13 மணி நேரம் அவரை சித்திரவதை செய்து நள்ளிரவு நேரத்தில் கைது செய்ய முயன்றதை நாங்கள் கண்டிக்கிறோம். மத்தியில் ஆளும் அரசானது தாங்கள் ஆளாத மாநிலங்களில் முக்கிய பிரமுகர்களுக்கு இது போன்ற நெருக்கடி கொடுப்பது என்பது புதிதல்ல. அதுபோன்று தான் செந்தில் பாலாஜிக்கும் கொடுக்கின்றனர். அமலாக்கத்துறையின் அத்துமீறல் என்பது மரபுக்கு மாறாக 13 மணி நேரம் அவரை துன்புறுத்தி அவரது உடல் நலம் சரியில்லாத அளவிற்கு டார்ச்சர் செய்ததை தான் கண்டிக்கிறோம். அதிகாரிகளின் நடவடிக்கைகள் குறித்து இல்லை, அவர்கள் அதற்காக கையில் எடுத்த முறைகளை பற்றி தான் சொல்கிறோம்.
கேரள தமிழகத்தை இணைக்கும் நான்குவழிச்சாலை பணி நடைபெற தடையாக இருப்பது பாறை கற்கள் கிடைக்காமல் இருந்ததே காரணம். தற்போது பல அமைச்சர்கள் மற்றும் அதிகாரிகளை சந்தித்து பணியை துவங்க வலியுறுத்தி 1041 கோடி ருபாய் நிதி ஒதுக்கீடு செய்யப்பட்டு பணிகள் விரைவில் துவங்கும் நிலையில் உள்ளது. குமரி மாவட்டத்தில் செயல்பட்டு வந்த குவாரிகள் தடைசெய்யப்பட்டு உள்ளதால் நமது மாவட்டத்திற்கு தேவையான பொருட்கள் கிடைப்பதில்லை. அதே நேரத்தில் வேறு மாவட்டங்களில் இருந்து ஏராளமான வாகனங்கள் கேரளாவுக்கு சென்று வருகின்றன” என்றார்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
