‛டிச.5 மெரினாவுக்கு வாங்க...’ அதிமுக செயற்குழு கூடும் நிலையில் சசிகலா அழைப்பு!

‛தொண்டர்களோடு சேர்ந்து மெரினா கடற்கரையில் உள்ள புரட்சித்தலைவி அம்மா அவர்களின் நினைவிடத்தில் மலரஞ்சலி செலுத்தி உறுதிமொழி ஏற்க இருக்கிறார்கள்..’

ஜெ,_நினைவிடத்தில்_சசிகலா

அதிமுகவின் செயற்குழு கூட்டம் இன்று நடைபெற உள்ளது. நேற்றிரவு அக்கட்சியின் முன்னாள் எம்பி அன்வர்ராஜா நீக்கப்பட்டதிலிருந்தே, அதிமுக செயற்குழு மீதான எதிர்பார்ப்பு எகிறிக்கொண்டிருக்கிறது. இந்நிலையில், தன் பங்கிற்கு மற்றொரு கல்லை எரிந்துள்ளார், கட்சியின் பொதுச் செயலாளராக கூறிக்கொண்டிருக்கிறார் சசிகலா. 

முன்னாள் முதல்வரும், அதிமுகவின் பொதுச் செயலாளருமான ஜெயலலிதாவின் 5 ம் ஆண்டு நினைவு தினம் டிசம்பர் 5 ம் தேதி வருகிறது. அன்றைய தினம் மெரினாவில் உள்ள ஜெயலலிதாவின் நினைவிடத்திற்கு தான் செல்ல இருப்பதாகவும், அங்கு ஜெயலலிதாவிடம் உறுதிமொழி எடுக்கவிருப்பதாகவும், அதில் தொண்டர்கள் பங்கேற்க வேண்டும் என்றும் அறிக்கை வெளியிட்டுள்ளார்.

இதோ சசிகலாவின் அறிக்கை அப்படியே....

இதயதெய்வம் புரட்சித்தலைவி அம்மா அவர்களின் 5ஆம் ஆண்டு நினைவு நாளான 05-12-2021 அன்று புரட்சித்தாய் சின்னம்மா அவர்கள் மெரினாவில் உள்ள அம்மா நினைவிடத்திற்கு நேரில் சென்று அஞ்சலி செலுத்துகிறார்.

நம் இதயதெய்வம் புரட்சித்தலைவி அம்மா அவர்கள், தமிழக மக்களின் உரிமைக்காகவும், ஏழை எளிய மக்களின் துயர் துடைக்கவும் தம் வாழ்நாளெல்லாம் பாடுபட்டவர். உயிர் தொண்டர்களின் நலனில் அக்கறைக் கொண்டு, தன்னலமின்றி பொதுநலத்தோடு "மக்களால் நான் மக்களுக்காகவே நான்" என்று தன் இறுதி மூச்சு வரை வாழ்ந்துக் காட்டிய ஒப்பற்ற மக்கள்தலைவி, நம் ஒவ்வொருவரின் இதயங்களிலும் இன்றும் வாழ்ந்துக் கொண்டிருக்கிறார்.

நம் இதயதெய்வம் புரட்சித்தலைவி அம்மா அவர்கள் கடைபிடித்த அதே கொள்கையோடு, அவர்கள் காட்டிய வழியில் தொடர்ந்து பயணிக்க, அவர்களது நினைவு நாளான 05-12-2021 ஞாயிற்றுக்கிழமை அன்று காலை 11 மணிக்கு புரட்சித்தாய் சின்னம்மா அவர்கள் கழகத் தொண்டர்களோடு சேர்ந்து மெரினா கடற்கரையில் உள்ள புரட்சித்தலைவி அம்மா அவர்களின் நினைவிடத்தில் மலரஞ்சலி செலுத்தி உறுதிமொழி ஏற்க இருக்கிறார்கள்.

இந்த புனித நிகழ்வில், புரட்சித்தலைவரின் ரத்தத்தின் ரத்தங்களும், புரட்சித்தலைவியின் பாசறையில் பயின்ற பாசமிகு தொண்டர்களும், கழகத்தின் அனைத்துப்பிரிவு நிர்வாகிகளும், புரட்சித்தலைவி அம்மா அவர்களை தங்கள் முன் மாதிரியாக மனதில் வைத்து, தன்னம்பிக்கையோடு வாழ்ந்துக் கொண்டிருக்கும் சிங்கப்பெண்களும், இளைஞர்கள் மற்றும் பொதுமக்களும், ஜாதிமத பேதமின்றி, கட்சிப்பாகுபாடு இல்லாமல் ஒரு தாய் வயிற்றுப் பிள்ளைகளாக, ஓர் அணியில் நின்று, ஒற்றுமையாக இணைந்து, அனைவரும் முகக்கவசம் அணிந்து போதிய சமூக இடைவெளியுடன் கலந்து கொள்ள வேண்டும் என்று கேட்டுக்கொள்கிறோம்.

டிச.5ல் மீண்டும் மெரினாவில் உள்ள ஜெ., நினைவிடம் செல்லும் சசிகலா. pic.twitter.com/PfihYfdSiQ

— Stalin Navaneethakrishnan (@stalinABPtamil) December 1, 2021

இவ்வாறு அந்த அறிக்கையில் கூறப்பட்டுள்ளது.