Sasikala | ‛சசிகலா விலகி இருந்ததால் ஜெ ஆத்மா சாந்தியடையும்’ -கே.பி.முனுசாமி பேட்டி

அவர் சசிகலாவின் பேச்சுக்கு ஒரு அதிமுக தொண்டர் கூட செவி சாய்க்க மாட்டார்கள் - கே.பி.முனுசாமி

கே.பி.முனுசாமி, சசிகலா

கிருஷ்ணகிரி, வேப்பனஹள்ளியில் அதிமுக துணை ஒருங்கிணைப்பாளர் கே.பி.முனுசாமி இன்று செய்தியாளர்களை சந்தித்தார். அப்போது செய்தியாளர்களிடம் பேசிய அவர் சசிகலாவின் பேச்சுக்கு ஒரு அதிமுக தொண்டர் கூட செவி சாய்க்க மாட்டார்கள் என்று கூறினார். அதிமுகவை திசை திருப்பி தொண்டர்களை குழப்ப சசிகலா முயற்சி செய்கிறார் என்றும், அவரது எண்ணம் எப்போதும் ஈடேராது என்று குறிப்பிட்டார். ஒரு தொண்டரும் சசிகலாவிடம் பேசவில்லை மாறாக சசிகலா தான் அவர்களோடு பேசி வருகிறார். சசிகலா பேசும் நபர்கள் அமமுகவை சேர்ந்தவர்கள், ஜெயலலிதா ஆன்மா சாந்தியடையவாவது சசிகலா குடும்பம் அதிமுகவில் இருந்து விலகி இருக்க வேண்டும் என்று கடுமையாக சாடினார். 

மேலும் பேசிய அவர் கோவையில் கொரோனா பாதிப்பு அதிகமாக உள்ள நிலையில் ஆய்வுக்கு சென்ற முதல்வருக்கு எதிராக GobackStalin என்று கூறுவது நாகரிகமான செயல் இல்லை. ஆனால் இது ஏற்கனவே பிரதமருக்கு இவர்கள் செய்தது அதனால் பாதிக்கப்பட்டவர்கள் இவ்வாறு செய்யலாம். கொரோனாவை அரசியல் ஆக்காமல் கொரோனாவை விரட்ட அரசுக்கு, எதிர்கட்சி உறுதுணையாக இருக்க வேண்டும் அவர் கூறினார்.

சொத்துக்குவிப்பு வழக்கில் சிறைத்தண்டனை நிறைவு பெற்று கடந்த பிப்ரவரி மாதம் சசிகலா, கர்நாடக மாநில சிறையில் இருந்து விடுதலை ஆனார். அவருக்கு அவரது ஆதரவாளர்களும், அ.ம.மு.க. தொண்டர்களும் உற்சாக வரவேற்பு அளித்தனர். இதனால், அவர் சட்டசபை தேர்தலில் போட்டியிடுவார், மிகப்பெரிய தாக்கத்தை ஏற்படுத்துவார் என்று எதிர்பார்க்கப்பட்டது.

ஆனால், திடீரென அரசியலில் இருந்து ஒதுங்குகிறேன் என்று அறிக்கை வெளியிட்டார். இதனால், அவரது ஆதரவாளர்களும், தொண்டர்களும் அதிர்ச்சியடைந்தனர். மேலும், சட்டசபை தேர்தல் குறித்தும், தன்னுடைய அரசியல் நிலைப்பாடு குறித்தும் எந்தவொரு கருத்தையும் தெரிவிக்காமல் அமைதியாகவே இருந்துவந்தார்.
சட்டசபை தேர்தலில் பா.ஜ.க., பா.ம.க. ஆகிய கட்சிகளுடன் கூட்டணி வைத்த அ.தி.மு.க. கூட்டணி 70க்கும் மேற்பட்ட இடங்களை மட்டுமே கைப்பற்றி எதிர்க்கட்சியானது. ஆனால், தேர்தல் முடிவுகளுக்கு பிறகும் சசிகலா அ.தி.மு.க.வின் தோல்வி குறித்து எந்தவொரு கருத்தையும் வெளியிடவில்லை.

இந்த நிலையில், சசிகலாவின் தீவிர ஆதரவாளர் ஒருவர் சில தினங்களுக்கு முன்பு அவரிடம் தொலைபேசியில் தொடர்பு கொண்டு பேசியுள்ளார். அப்போது, அந்த தொண்டரிடம் பேசிய சசிகலா, '’நல்லா இருக்கீங்களா..? வீட்டில் எல்லாம் நன்றாக உள்ளனரா? சீக்கிரம் வந்துவிடுவேன். ஒன்றும் கவலைப்பட வேண்டாம். கண்டிப்பாக கட்சியை சரி செய்துவிடலாம். 

தைரியமாக இருக்க வேண்டும். நிலைமை மிகவும் மோசமாக உள்ளது. அனைவரும் கவனமாக இருக்க வேண்டும். நிச்சயம் வருவேன்” என்று பேசினார். சட்டசபை தேர்தல் முடிந்து இத்தனை நாட்களாக எந்தவொரு அறிவிப்பையும் வெளியிடாத சசிகலா, தான் மீண்டும் வருவேன் என்று இந்த தொலைபேசி உரையாடலில் கூறியிருப்பது அவரது தொண்டர்கள் மத்தியில் மிகுந்த உற்சாகத்தை ஏற்படுத்தியுள்ளது. சசிகலா பேசிய தொலைபேசி ஆடியோ இணையத்தில் வைரலாக பரவி வருகிறது.