BJP TN Leader Annamalai?: பாஜக தமிழ்நாடு தலைவராக மீண்டும் அண்ணாமலையா.? ஓரிரு நாட்களில் வெளியாகும் அறிவிப்பு...

பாஜகவின் அடுத்த தமிழ்நாடு தலைவர் யார் என்ற சஸ்பென்ஸ் தொடர்ந்துகொண்ட இருக்கும் நிலையில், இந்த மாத இறுதியில் அது குறித்த அறிவிப்பு வெளியாகலாம் என கூறப்படுகிறது.

அண்ணாமலைக்கு மீண்டும் வாய்ப்பு.?

Source : ABP

பாஜக தமிழ்நாடு தலைவர் அண்ணாமலையின் பதவிக்காலம் முடியும் நிலையில், அடுத்த தலைவர் யார் என்ற கேள்வி தீவிரமடைந்துள்ளது. அண்ணாமலையே தலைவராக தொடர்வார் என எதிர்பார்க்கப்பட்ட நிலையில், தலைவர் ரேஸில் சீனியர்களும் குதித்ததால், போட்டி சூடுபிடித்தது. இந்நிலையில், இந்த மாத இறுதியில் அடுத்த தலைவர் குறித்த அறிவிப்பு வெளியாகும் என எதிர்பார்க்கப்படுகிறது.

ரேஸில் உள்ள தலைவர்கள் யார்..யார்.?

பாஜக தமிழ்நாடு அடுத்த தலைவருக்கான போட்டியில், முன்னாள் தலைவர் தமிழிசை சவுந்தரராஜன், மூத்த தலைவர்கள் நயினார் நாகேந்திரன், வானதி சீனிவாசன் ஆகியோர் களத்தில் உள்ளனர். இவர்கள் ஒவ்வொருவருக்கும் ஒவ்வொரு பகுதியில் பலம் இருக்கிறது. தமிழ்நாட்டில் பாஜகவின் வளர்ச்சிக்கு வித்திட்ட வகையில், தமிழிசைக்கு மக்கள் மனதில் ஒரு தனி இடம் உண்டு. தென் மாவட்டங்களை பொறுத்தவரை, நயினார் நாகேந்திரனுக்கு நல்ல பலம் உள்ளது. கொங்கு மண்டலத்தில் வானதி சீனிவாசனின் கை ஓங்கும் என்பதில் சந்தேகமில்லை.

பாஜக தேர்தல் பொறுப்பாளர் கிஷன் ரெட்டி வருகை

இது ஒருபுறமிருக்க, பாஜக தமிழ்நாடு தலைவரை தேர்ந்தெடுக்கும் பொறுப்பு, பாஜக தேர்தல் பொறுப்பாளர் கிஷன் ரெட்டியிடம் ஒப்படைக்கப்பட்டுள்ளது. அவர் இங்கு வந்து, பல்வேறு தரப்புகளுடன் பேச்சுவார்த்தைகள் நடத்தி, அடுத்த தலைவர் குறித்து தலைமையிடம் தெரிவித்து, பின்னர் அறிவிப்பை வெளியிடுவார் என தெரிகிறது. அண்ணாமலை மீது தமிழ்நாடு பாஜகவில் உள்ள மூத்த தலைவர்கள் அதிருப்தியில் உள்ளதால், தலைவரை தேர்ந்தெடுப்பது, கிஷன் ரெட்டிக்கு சற்று சிரமமான வேலையாகவே இருக்கும் என தெரிகிறது.

அண்ணாமலைக்கே மீண்டும் பொறுப்பு.?

ஒரு பக்கம் இப்படியெல்லாம் பேச்சு இருக்கும் சூழலில், ஒருசிலரோ, அண்ணாமலைக்கே தலைவர் பதவியை மீண்டும் வழங்கும் மனநிலையில் தலைமை இருப்பதாக கூறுகிறார். ஆனால், அண்ணாமலை தலைவராகும் பட்சத்தில், அதிமுக உடனான கூட்டணி கேள்விக்குறியாக மாறிவிடும். ஏற்கனவே கூட்டணியிலிருந்து அதிமுக பிரிந்ததற்கு அண்ணாமலையின் அதிகப்பிரசங்கித்தனம்தான் காரணம் என்றும் கூறப்படுகிறது. ஒருவேளை இந்த கூட்டணி மறுபடியும் அமையாவிட்டால், தேர்தலை சந்திப்பது மிகவும் கடினமானதாகிவிடும் என்ற நிலையும் தலைமைக்கு தெரியாமல் இல்லை.

இப்படிப்பட்ட சூழ்நிலையில், அண்ணாமலையே மீண்டும் தலைவர் ஆவாரா அல்லது, சர்ப்ரைஸாக, போட்டியிலேயே இல்லாத வேறு ஒரு புதிய நபரை தலைமை அறிவிக்குமா என்பது, இந்த மாத இறுதிக்குள் தெரிந்துவிடும் என்று கூறப்படுகிறது.