கொட்டும் மழையில் "கோவிந்த" கோஷம்! மயிலாடுதுறை பரிமள ரெங்கநாதர் கோயிலில் துலா உற்சவ திருத்தேரோட்டம் கோலாகல கொண்டாட்டம்..!
கொட்டும் மழையில் "கோவிந்த" கோஷம்! மயிலாடுதுறை பரிமள ரெங்கநாதர் கோயிலில் துலா உற்சவ திருத்தேரோட்டம் கோலாகல கொண்டாட்டம்..!
மயிலாடுதுறை: 108 வைணவ திவ்ய தேசங்களில் ஒன்றாகவும், பஞ்ச அரங்கத் தலங்களில் மகத்துவம் வாய்ந்ததாகவும் போற்றப்படும் மயிலாடுதுறை திருஇந்தளூர் பரிமள ரெங்கநாதர் கோயிலில், துலா உற்சவத்தையொட்டி நடைபெற்ற திருத்தேரோட்டம் கொட்டும் மழையிலும் பக்திப் பரவசத்துடன் கோலாகலமாக நடைபெற்றது.
திவ்ய தேசத்தின் பெருமை
மயிலாடுதுறை நகரின் நடுவே அமைந்துள்ள இக்கோயில், திருமங்கை ஆழ்வாரால் மங்கள சாசனம் செய்யப்பட்ட தனிச்சிறப்புக்குரிய திருத்தலம் ஆகும். புராணச் சிறப்புமிக்க இந்த பரிமள ரெங்கநாதர் கோயிலில், ஐப்பசி மாதத்தில் காவிரியில் புனித நீராடுவதை சிறப்பிக்கும் வகையில் ஆண்டுதோறும் துலா உற்சவம் நடைபெறுவது வழக்கம். இந்த ஆண்டுக்கான துலா உற்சவம் இக்கோயில் கடந்த நவம்பர் 8-ஆம் தேதி கருட கொடியேற்றத்துடன் தொடங்கி, மிகச் சிறப்பாக நடைபெற்று வருகிறது.
வீதிகளில் அசைந்தாடிய பெருமாள் திருத்தேர்
துலா உற்சவத்தின் ஒன்பதாம் திருநாளான இன்று, பக்தர்களின் முக்கிய எதிர்பார்ப்புக்குரிய திருத்தேரோட்டம் நடைபெற்றது. உற்சவ மூர்த்திகளான பரிமள ரெங்கநாதர், ஸ்ரீதேவி மற்றும் பூதேவி தாயார் ஆகியோர் சிறப்பு அலங்காரங்கள் செய்யப்பட்டு, அழகிய திருத்தேரில் எழுந்தருளினர். திருத்தேரானது புறப்படுவதற்கு முன்னர், விசேஷ பூஜைகள் மற்றும் தீபாராதனைகள் செய்யப்பட்டு, பக்தர்கள் தேரை வடம் பிடிக்கத் தயாராகினர்.
சரியான நேரத்தில் தேரோட்டம் தொடங்கியபோது, வானம் இருண்டது. இருப்பினும், பக்தர்கள் எந்தத் தயக்கமும் இன்றி, கொட்டும் மழையைப் பொருட்படுத்தாமல் உற்சாகமாகத் திரண்டிருந்தனர். தேரின் வடத்தைப் பிடித்து இழுக்கும்போது, பக்தர்கள் எழுப்பிய பக்தி கோஷங்கள் வானைப் பிளந்தன.
"கோவிந்தா! கோவிந்தா!" "பரிமள ரங்கநாதா! பரிமள ரங்கநாதா!" என்ற பக்தி முழக்கங்கள் நான்கு வீதிகளிலும் எதிரொலித்தன. ஒவ்வொரு அடியையும் பக்தி உணர்வுடன் எடுத்து வைத்த பக்தர்கள், மழையில் நனைந்தபடி தங்கள் வழிபாட்டைச் செலுத்தினர்.
அதிகாரிகள் பங்கேற்பு
இந்த மகத்தான திருத்தேரோட்ட நிகழ்ச்சியில், இந்து சமய அறநிலையத் துறை அதிகாரிகள் உட்பட ஆயிரக்கணக்கான பக்தர்கள் கலந்து கொண்டனர். பக்தர்களின் பாதுகாப்பு மற்றும் தேரோட்டத்தை சுமுகமாக நடத்திச் செல்வதற்கான ஏற்பாடுகளை கோயில் நிர்வாகம் மற்றும் காவல்துறையினர் சிறப்பாகச் செய்திருந்தனர். பின்னர் திருத்தேர் மயிலாடுதுறை நகரின் நான்கு வீதிகளையும் சுற்றி மீண்டும் நிலையை வந்தடைந்தது.
காவிரி கடைமுக தீர்த்தவாரி
திருத்தேரோட்டம் நிறைவடைந்ததைத் தொடர்ந்து, துலா உற்சவத்தின் மிக முக்கியமான நிகழ்வான கடைமுக தீர்த்தவாரி உற்சவம் நடைபெற்றது. திருஇந்தளூர் பரிமள ரெங்கநாதரின் திருத்தேரோட்டம், மழை கூட பக்தர்களின் உற்சாகத்தை அசைக்க முடியாது என்பதை நிரூபிக்கும் வகையில், பக்திப் பெருக்குடன் வெற்றிகரமாக நிறைவடைந்தது. இந்தத் துலா உற்சவம் மயிலாடுதுறை பகுதி மக்களுக்கு ஆன்மீக நிறைவை அளித்துள்ளது.
துலா கட்ட காவிரி தீர்த்தவாரி அடுத்து ஆற்றின் உள்ளே 16 தீர்க்க கிணறுகள் அமைந்துள்ள புனிதம் வாய்ந்த இடமாக கருதப்படும் புனித தீர்த்தமான மயிலாடுதுறை காவிரி ஆற்றில் தீர்த்தவாரி நடைபெறுவதை முன்னிட்டு இரு கரைகளிலும் அனைத்து ஆலயங்களில் இருந்து சுவாமி அம்பாள் மற்றும் பஞ்ச மூர்த்திகள் பக்தர்களுக்கு காட்சியளித்து தீர்த்தவாரி அளித்தனர்.
அனைத்து ஆலயங்களின் அஸ்திர தேவருக்கும் காவிரி கரையில் பால் பன்னீர் இளநீர் சந்தனம் தயிர் தேன் நெய் உள்ளிட்ட 16 வகை திரவிய பொருட்களால் சிறப்பு அபிஷேகம் செய்யப்பட்டது. தொடர்ந்து காவிரி ஆற்றில் தீர்த்தவாரி நடைபெற்றது. தருமபுரம் ஆதின குரு மகா சன்னிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாச்சாரியார் சுவாமிகள், திருவாவடுதுறை ஆதீன குரு மகா சனிமாதானம் ஸ்ரீலஸ்ரீ அம்பலவான தேசிக சுவாமிகள் உள்ளிட்ட பல்லாயிரக்கணக்கான பக்தர்கள் புனித நீராடினர். இதற்காக இன்று மாநிலத்தின் பல்வேறு பகுதிகளில் இருந்து பக்தர்கள் புனித நீராட வருகை தந்துள்ளனர். இதனை முன்னிட்டு 250க்கும் மேற்பட்ட காவல்துறையினர் பாதுகாப்பு பணியில் ஈடுபட்டிருந்தனர்.
Before You Go
Mamata banerjee slaps man | ”ஏய்... ஓரமா போ” தொண்டரை அறைந்த மம்தா! ஷாக்கான கட்சியினர்
தலைப்பு செய்திகள்
ட்ரெண்டிங் செய்திகள்
