யாருக்காகக் காத்திருக்கிறது இந்த அங்கன்வாடி? கட்டப்பட்டு மாதங்கள் கடந்தும் திறக்கப்படாத விசித்திரம்!

மயிலாடுதுறை மங்கனூர் கிராமத்தில் ரூ.16.45 லட்சத்தில் கட்டப்பட்ட புதிய அங்கன்வாடி கட்டிடம் திறக்கப்படாமல் பூட்டியே கிடப்பதால், குழந்தைகள் வசதியற்ற வாடகை கட்டிடத்தில் தவிக்கும் அவல நிலை நிலவி வருகிறது. 

திறக்கப்படாமல் பூட்டியே கிடக்கும் புதிய அங்கன்வாடி கட்டிடம்

Source : ABP

மயிலாடுதுறை: மயிலாடுதுறை மாவட்டம், தரங்கம்பாடி தாலுகாவுக்கு உட்பட்ட மங்கனூர் கிராமத்தில் லட்சக்கணக்கான ரூபாய் மதிப்பில் புதிதாகக் கட்டப்பட்ட அங்கன்வாடி மையக் கட்டிடம், பணிகள் முடிந்தும் பல மாதங்களாக திறக்கப்படாமல் பூட்டியே கிடப்பது பொதுமக்கள் மற்றும் பெற்றோரிடையே கடும் அதிருப்தியை ஏற்படுத்தியுள்ளது.

ரூ.16.45 லட்சத்தில் புதிய கட்டிடம்

கஞ்சாநகரம் ஊராட்சியைச் சேர்ந்த மங்கனூர் கிராமத்தில் உள்ள குழந்தைகளின் ஊட்டச்சத்து மற்றும் ஆரம்பக் கல்வியை மேம்படுத்தும் நோக்கில், புதிய அங்கன்வாடி மையம் கட்ட முடிவு செய்யப்பட்டது. இதற்காக மகாத்மா காந்தி தேசிய ஊரக வேலை உறுதி திட்டத்தின் (MGNREGS) கீழ் ரூ.16.45 லட்சம் நிதி ஒதுக்கீடு செய்யப்பட்டது. நிதி ஒதுக்கீட்டைத் தொடர்ந்து, குழந்தைகளுக்கான வகுப்பறை, சமையலறை, பாதுகாக்கப்பட்ட குடிநீர் வசதி மற்றும் கழிப்பறை போன்ற அனைத்து அடிப்படை கட்டமைப்பு வசதிகளுடன் புதிய கட்டிடம் கட்டி முடிக்கப்பட்டது. கட்டுமானப் பணிகள் அனைத்தும் நிறைவடைந்து பல மாதங்கள் ஆகிவிட்டன.

திறக்கப்படாததால் வீணாகும் கட்டிடம்

கட்டிடப் பணிகள் முற்றுப்பெற்று திறப்பு விழாவுக்குத் தயாராக இருந்தபோதிலும், இதுவரை அதிகாரிகள் தரப்பில் கட்டிடம் பயன்பாட்டிற்கு கொண்டு வரப்படவில்லை. நாள்கள் செல்லச் செல்ல, பூட்டியே கிடக்கும் புதிய கட்டடத்தின் சுவர்கள் மற்றும் வளாகம் பராமரிப்பின்றி வீணாகும் அபாய நிலை உருவாகியுள்ளது. லட்சக்கணக்கான ரூபாய் மக்கள் வரிப்பணத்தில் கட்டப்பட்ட கட்டிடம், பயன்பாடின்றி முடங்கிக் கிடப்பது அப்பகுதி மக்களிடையே பெரும் கவலையை உருவாக்கியுள்ளது.

வாடகை கட்டிடத்தில் அடிப்படை வசதிகள் இன்றி தவிக்கும் குழந்தைகள்

புதிய கட்டிடம் திறக்கப்படாததால், மங்கனூர் கிராம அங்கன்வாடி மையம் தற்போது ஒரு சிறிய வாடகை கட்டிடத்திலேயே தொடர்ந்து இயங்கி வருகிறது. இந்தத் தற்காலிக கட்டிடத்தில் குழந்தைகளுக்குத் தேவையான போதிய இடவசதி இல்லை. மேலும், முறையான குடிநீர் வசதி மற்றும் பாதுகாப்பான கழிப்பறை வசதிகளும் இல்லாமல் குழந்தைகளும், அங்கன்வாடி பணியாளர்களும், சத்துணவு ஊழியர்களும் நாள்தோறும் பல்வேறு சிரமங்களைச் சந்தித்து வருகின்றனர்.

பொதுவாக அங்கன்வாடி மையங்களில் 3 முதல் 6 வயது வரையிலான குழந்தைகளுக்கு முன்பருவக் கல்வி, சத்துணவு வழங்குதல் மற்றும் உடல்நல பராமரிப்பு போன்ற மிக முக்கியமான சேவைகள் வழங்கப்படுகின்றன. இத்தகைய சூழலில், முறையான வசதிகள் இல்லாத வாடகை கட்டிடத்தில் குழந்தைகள் அமரவைக்கப்படுவது அவர்களின் ஆரோக்கியத்தையும் கற்றல் சூழலையும் பாதிப்பதாகப் பெற்றோர் வேதனை தெரிவிக்கின்றனர்.

மழைக்காலங்களில் தொடரும் அச்சம்

தற்போது செயல்பட்டு வரும் வாடகை கட்டிடம் போதிய பாதுகாப்பு வசதிகள் அற்றதாக இருப்பதால், மழைக்காலங்களில் குழந்தைகளை அங்கு விட்டுச் செல்வது பெரும் சவாலாக உள்ளதாகப் பெற்றோர் கூறுகின்றனர். மழை பெய்யும்போது கட்டிடத்திற்குள் ஏற்படும் கசிவு மற்றும் சுற்றியுள்ள சுகாதாரமற்ற சூழல் காரணமாகக் குழந்தைகளுக்கு நோய் தொற்று பரவும் அபாயமும் நிலவுகிறது.

இதுகுறித்து அப்பகுதியைச் சேர்ந்த பெற்றோர் கூறுகையில், "எங்கள் குழந்தைகளின் நலனுக்காகப் புதிய கட்டிடம் கட்டி முடிக்கப்பட்டுத் தயார் நிலையில் உள்ளது. ஆனால், அதைப் பூட்டி வைத்திருப்பது ஏன் என்று புரியவில்லை. வாடகை கட்டிடத்தில் போதிய இடமில்லாமல் குழந்தைகள் மிகவும் சிரமப்படுகிறார்கள். மழைக்காலத்தில் குழந்தைகளை இங்கு அனுப்புவதற்கே பயமாக இருக்கிறது. எனவே, அதிகாரிகளின் அலட்சியப் போக்கைக் கைவிட்டு, புதிய கட்டிடத்தை உடனடியாகத் திறந்து பயன்பாட்டிற்கு கொண்டு வர வேண்டும்" எனக் ஆதங்கத்துடன் கோரிக்கை விடுத்துள்ளனர்.

உடனடி நடவடிக்கை எடுக்க மக்கள் கோரிக்கை

புதிய கட்டிடம் திறக்கப்படாமல் தாமதமாவதற்கு நிர்வாகச் சிக்கல்களா அல்லது மக்கள் பிரதிநிதிகளின் திறப்பு விழா தாமதமா என்பது தெரியாமல் கிராம மக்கள் குழப்பத்தில் ஆழ்ந்துள்ளனர். குழந்தைகளின் எதிர்காலத்தையும் பாதுகாப்பையும் கருத்தில் கொண்டு, மயிலாடுதுறை மாவட்ட நிர்வாகமும், ஊரக வளர்ச்சித் துறை அதிகாரிகளும் உடனடியாகத் தலையிட வேண்டும் எனப் பொதுமக்கள் வலியுறுத்துகின்றனர். பூட்டிக் கிடக்கும் அங்கன்வாடி மையத்தை விரைந்து திறந்து, மங்கனூர் கிராம குழந்தைகளின் பாதுகாப்பான கற்றலுக்கும் ஊட்டச்சத்துப் பராமரிப்பிற்கும் வழிவகை செய்ய வேண்டும் என்பதே அனைவரின் முதன்மையான எதிர்பார்ப்பாக உள்ளது.