மயிலாடுதுறை மாற்றுத்திறனாளிகளுக்கு இலவச பேருந்து பயண அட்டை: உடனே விண்ணப்பிங்க...
மாற்றுத்திறனாளிகளுக்கு அரசுப் பேருந்துகளில் இலவசமாகப் பயணம் செய்வதற்கான பயண அட்டையை பெற விண்ணப்பிக்குமாறு மாவட்ட மாவட்ட ஆட்சியர் அறிவுத்தியுள்ளார்.
மயிலாடுதுறை மாவட்டத்தில் உள்ள மாற்றுத்திறனாளிகள் சமூக மற்றும் பொருளாதார ரீதியாக முன்னேற்றம் அடைவதை உறுதி செய்யும் வகையில், தமிழக அரசு பல்வேறு நலத்திட்டங்களைச் செயல்படுத்தி வருகிறது. அதன் ஒரு பகுதியாக, தகுதியுள்ள மாற்றுத்திறனாளிகளுக்கு அரசுப் பேருந்துகளில் இலவசமாகப் பயணம் செய்வதற்கான 'பயண அட்டை' வழங்கும் திட்டத்தை மாவட்ட நிர்வாகம் முன்னெடுத்துள்ளது.
இலவச பேருந்து பயண அட்டை பெறுவதற்கு இணையதளம் வழியாக விண்ணப்பிப்பதற்கான சிறப்பு முகாம் இன்று (10.01.2026) முதல் தொடங்கி வரும் ஜனவரி 31, 2026 வரை நடைபெற உள்ளது. இது குறித்த விரிவான தகவல்களை மாவட்ட ஆட்சியர் ஹெச். எஸ். ஸ்ரீகாந்த், வெளியிட்டுள்ள செய்திக்குறிப்பில் தெரிவித்துள்ளார்.
யாருக்கெல்லாம் இந்த சலுகை பொருந்தும்?
இந்தச் சிறப்பு முகாமின் வாயிலாகப் பின்வரும் பிரிவுகளைச் சேர்ந்த மாற்றுத்திறனாளிகள் விண்ணப்பித்துப் பயன்பெறலாம்.
* தனியார் நிறுவனப் பணியாளர்கள்: தனியார் நிறுவனங்களில் பணிபுரிந்து வரும் மாற்றுத்திறனாளிகள், தங்கள் இருப்பிடத்திலிருந்து பணிக்குச் சென்று வர இந்த அட்டையைப் பயன்படுத்தலாம்.
* மாணவர்கள்: கல்லூரிகளுக்குச் சென்று உயர்கல்வி பயிலும் மாற்றுத்திறனாளி மாணவர்கள் விண்ணப்பிக்கலாம்.
* சிறப்புப் பள்ளி மாணவர்கள்: சிறப்புப் பள்ளிகளுக்குப் பயிற்சிக்குச் செல்லும் மாற்றுத்திறனாளி குழந்தைகள் மற்றும் அவர்களுடன் செல்லும் பெற்றோர்கள் அல்லது பாதுகாவலர்களுக்கும் இந்தச் சலுகை பொருந்தும்.
பயண வரம்புகள் மற்றும் பிரிவுகள்
மாற்றுத்திறனாளிகளின் தேவையைப் பொறுத்து பயணச் சலுகைகள் மாறுபடுகின்றன.
* பார்வைக் குறைபாடுடையோர்: மாவட்டம் முழுவதும் எங்கு வேண்டுமானாலும் கட்டணமின்றிப் பயணம் செய்ய விண்ணப்பிக்கலாம்.
* கை, கால் மற்றும் செவித்திறன் குறைபாடுடையோர்: இவர்கள் தங்கள் இல்ல முகவரியிலிருந்து, தாங்கள் பணிபுரியும் நிறுவனம் அல்லது கல்வி பயிலும் இடத்திற்குச் சென்று வருவதற்கு மட்டும் விண்ணப்பிக்க இயலும்.
* வாய் பேச இயலாதவர்கள்: இவர்களும் தங்கள் வசிப்பிடத்திலிருந்து பணியிடத்திற்குச் செல்வதற்கான பயண அட்டையைப் பெறலாம்.
*சிறப்பு குழந்தைகள்: பயிற்சிக்காகச் சிறப்புப் பள்ளிகளுக்குச் செல்லும் குழந்தைகள் மற்றும் அவர்களது துணையாகச் செல்லும் பாதுகாவலர்களுக்குப் பயண அட்டை வழங்கப்படும்.
முகாம் நடைபெறும் இடம் மற்றும் நேரம்
இந்தச் சிறப்பு முகமானது மயிலாடுதுறை மாவட்ட ஆட்சியர் அலுவலகத்தில் நடைபெறுகிறது. அரசு விடுமுறை நாட்கள் தவிர்த்து, மற்ற அனைத்து வேலை நாட்களிலும் காலை முதல் மாலை வரை மாற்றுத்திறனாளிகள் நேரில் சென்று விண்ணப்பிக்கலாம்.
தேவையான ஆவணங்கள்
விண்ணப்பிக்க விரும்பும் மாற்றுத்திறனாளிகள் கீழ்க்கண்ட ஆவணங்களின் அசல் மற்றும் நகல்களைக் கொண்டு வருமாறு அறிவுறுத்தப்படுகிறார்கள்.
*மாற்றுத்திறனாளிகளுக்கான அடையாள அட்டை (புத்தகம்).
* யுடிஐடி (UDID) அட்டை.
* குடும்ப அட்டை (Ration Card).
* ஆதார் அட்டை (Aadhar Card).
* பாஸ்போர்ட் அளவு புகைப்படங்கள்.
* கல்வி பயில்வதற்கான சான்று (மாணவர்களுக்கு).
* பணியிடச் சான்று (தனியார் நிறுவனப் பணியாளர்களுக்கு)
மாவட்ட ஆட்சியரின் வேண்டுகோள்
இது குறித்து மாவட்ட ஆட்சியர் ஹெச். எஸ். ஸ்ரீகாந்த் கூறுகையில், "மாற்றுத்திறனாளிகளின் வாழ்வாதாரத்தை மேம்படுத்தவும், அவர்களின் பயணச் செலவைக் குறைக்கவும் அரசு இந்தச் சலுகையை வழங்கி வருகிறது. தகுதியுள்ள நபர்கள் இந்தச் சந்தர்ப்பத்தைச் சரியாகப் பயன்படுத்திக் கொள்ள வேண்டும். 31.01.2026-க்குள் விண்ணப்பித்து, தடையற்ற பயண வசதியைப் பெற வேண்டும்" எனத் தெரிவித்துள்ளார்.
மயிலாடுதுறை மாவட்டத்தைச் சேர்ந்த மாற்றுத்திறனாளிகள் இந்த அரிய வாய்ப்பைப் பயன்படுத்தி, உரிய ஆவணங்களுடன் முகாமில் பங்கேற்றுப் பயன்பெறுமாறு மாவட்ட நிர்வாகம் சார்பில் கேட்டுக் கொள்ளப்பட்டுள்ளது.
தலைப்பு செய்திகள்
ட்ரெண்டிங் செய்திகள்
