மயிலாடுதுறை: 50 கடந்த குண்டாஸ்! ரவுடிகள் அதிர்ச்சி! காவல் துறை அதிரடி.

மயிலாடுதுறையில் மாவட்டத்தில் இந்தாண்டு மட்டும் இதுவரை 51 பேர் குண்டர் தடுப்புச் சட்டத்தின் கீழ் சிறையில் அடைக்கப்பட்டுள்ளனர்.

செயற்கை நுண்ணறிவு சித்தரிப்பு படம்

Source : Abp

மயிலாடுதுறை: மயிலாடுதுறை மாவட்டத்தில் சட்டம் ஒழுங்கை பாதுகாக்கவும், பொதுமக்களின் அமைதியான வாழ்வை உறுதி செய்யவும் காவல் துறை பல்வேறு தீவிர நடவடிக்கைகளை மேற்கொண்டு வருகிறது. இதன் ஒரு பகுதியாக, திருவெண்காடு காவல் எல்லைக்குட்பட்ட பகுதியில் கடந்த ஆகஸ்ட் மாதம் 12-ஆம் தேதி திருவெண்காடு காவல் சரகத்திற்குட்பட்ட சித்தன்காத்திருப்பு பேருந்து நிலையம் அருகே கோரமான தாக்குதல் சம்பவம் ஒன்று நடைபெற்றது. 

வேதராஜபுரம் பாரிவேட்டை தெருவைச் சேர்ந்த தினகரன் (40), த/பெ. அய்யப்பன் என்பவர் தனது இருசக்கர வாகனத்தில் பயணித்துக் கொண்டிருந்தபோது, அவரை வழிமறித்த அடையாளம் தெரிந்த நபர்கள் திடீரென கத்தியால் குத்தி கொடூரமாக கொலை செய்ய முயன்றனர்.

இந்த திடுக்கிடும் தாக்குதல் சம்பவம் தொடர்பாக பாதிக்கப்பட்ட தினகரன் திருவெண்காடு காவல் நிலையத்திற்குச் சென்று அதிகாரப்பூர்வமாக புகார் அளித்தார். அந்த புகாரின் பேரில் உடனடியாக வழக்குப்பதிவு செய்து காவல் துறையினர் தீவிர விசாரணை மற்றும் தேடுதல் வேட்டையைத் தொடங்கினர்.

விசாரணையில், இந்த வழக்கில் தொடர்புடைய முதன்மை குற்றவாளி திருவெண்காடு காவல் நிலைய சரித்திர பதிவேடு குற்றவாளியான (History Sheeter) அகனி மாதாகோவில் தெருவைச் சேர்ந்த தோனி பிளேயர் (26), த/பெ. கிரிஸ்டியன் ராஜ் என்பதும், அவருக்கு உடந்தையாக இருந்த அவரது கூட்டாளி துறையூர் கோவிந்தபுரம் அம்பேத்கார் காலனியைச் சேர்ந்த சுபாஷ் (24), த/பெ. குணசேகரன் என்பதும் தெரியவந்தது. இதையடுத்து இருவரையும் காவல் துறையினர் விரைந்து கைது செய்து நீதிமன்றக் காவலுக்கு உட்படுத்தி சிறையில் அடைத்தனர்.

குண்டர் தடுப்புச் சட்டத்தின் கீழ் அதிரடி நடவடிக்கை

கைது செய்யப்பட்ட எதிரிகளில் ஒருவரான தோனி பிளேயர் தொடர்ச்சியாக குற்றச் செயல்களில் ஈடுபட்டு பொது அமைதிக்கு பங்கம் விளைவித்து வந்தது காவல் துறை விசாரணையில் உறுதியானது. பொதுமக்கள் மத்தியில் அச்ச உணர்வையும் அமைதியின்மையையும் ஏற்படுத்தி வந்த இவரை சாதாரண சட்ட நடைமுறைகளின் கீழ் சிறையில் அடைப்பது மட்டும் போதாது என்பதைக் கருத்தில் கொண்டு, அவர் மீது குண்டர் தடுப்புச் சட்டத்தின் கீழ் கடுமையான நடவடிக்கை எடுக்க காவல் துறை தீர்மானித்தது.

இதனடிப்படையில், மாவட்ட காவல் கண்காணிப்பாளர் Dr. B. சினேஹா ப்ரியா, குற்றவாளி தோனி பிளேயரை தடுப்பு காவல் சட்டத்தின் கீழ் சிறையில் அடைக்கக் கோரி மயிலாடுதுறை மாவட்ட ஆட்சியருக்கு முறைப்படி விரிவான பரிந்துரை அறிக்கையைச் சமர்ப்பித்தார். 

மாவட்ட காவல் கண்காணிப்பாளரின் பரிந்துரையை தீவிரமாக பரிசீலித்த மாவட்ட ஆட்சியர், பொது நலன் மற்றும் சட்டம் ஒழுங்கை பராமரிக்கும் நோக்கில், தோனி பிளேயரை தடுப்பு காவல் சட்டத்தின் கீழ் சிறையில் அடைக்க அதிகாரப்பூர்வ உத்தரவை பிறப்பித்தார். ஆட்சியரின் இந்த உத்தரவைத் தொடர்ந்து, திருவெண்காடு காவல் துறையினர் குற்றவாளி தோனி பிளேயரை கடலூர் மத்திய சிறையில் அடைத்தனர்.

மாவட்டத்தில் தீவிரமடையும் தடுப்பு காவல் நடவடிக்கைகள்

மயிலாடுதுறை மாவட்டத்தில் குற்றச் செயல்களை முற்றிலுமாக கட்டுப்படுத்தவும், சமூக விரோதிகளின் கொாட்டத்தை அடக்கவும் காவல் துறை தொடர் அதிரடி நடவடிக்கைகளை மேற்கொண்டு வருகிறது. நடப்பாண்டில் மட்டும் மாவட்டத்தில் சட்டம் ஒழுங்கிற்கு எதிராக செயல்பட்ட பல்வேறு குற்றவாளிகள் மீது குண்டர் சட்டம் உள்ளிட்ட தடுப்பு காவல் சட்டங்களின் கீழ் கடுமையான நடவடிக்கைகள் பாய்ந்துள்ளன. மாவட்டத்தில் இதுவரை நடைபெற்ற தடுப்பு காவல் நடவடிக்கைகள் குறித்து விரிவான புள்ளிவிவரங்கள் வெளியாகியுள்ளன.

அதன்படி, நடப்பாண்டில் கொலை குற்றச் சம்பவங்களில் நேரடியாக ஈடுபட்ட 05 நபர்கள், பொது அமைதிக்கு பங்கம் விளைவித்து சட்டம் ஒழுங்கு பிரச்சினையை ஏற்படுத்திய 17 நபர்கள், சட்டவிரோத மதுவிலக்கு குற்றங்களில் ஈடுபட்ட 09 நபர்கள், கஞ்சா மற்றும் போதைப்பொருள் விற்பனையில் ஈடுபட்ட 17 நபர்கள், தடை செய்யப்பட்ட குட்கா புகையிலை பொருட்கள் விற்பனை செய்த 01 நபர் மற்றும் பெண்களுக்கு எதிரான பாலியல் குற்றங்களில் ஈடுபட்ட 02 நபர்கள் உட்பட மொத்தம் 51 நபர்கள் தடுப்பு காவல் சட்டத்தின் கீழ் கைது செய்யப்பட்டு சிறையில் அடைக்கப்பட்டுள்ளனர். இந்த தொடர் நடவடிக்கைகள் மாவட்டத்தில் குற்ற விகிதத்தைக் குறைத்து சட்டத்தின் ஆட்சியை உறுதிப்படுத்தியுள்ளது.

காவல் துறையின் எச்சரிக்கையும் தீவிர கண்காணிப்பும்

மயிலாடுதுறை மாவட்ட காவல் துறை சார்பில் சமூக விரோதச் செயல்களில் ஈடுபடும் நபர்களின் செயல்பாடுகள் அனைத்தும் மிகத் தீவிரமாக கண்காணிக்கப்பட்டு வருகின்றன. இதுகுறித்து எச்சரிக்கை விடுத்துள்ள மாவட்ட காவல் கண்காணிப்பாளர், பொதுமக்களுக்கு அச்சுறுத்தல் தரும் வகையில் ரௌடிசத்தில் ஈடுபடும் நபர்கள், பெண்கள் மற்றும் குழந்தைகளுக்கு எதிரான பாலியல் குற்றங்களில் ஈடுபடுவோர் மீது எவ்வித தாட்சண்யமும் இன்றி கடுமையான சட்ட நடவடிக்கைகள் தொடரும் எனத் தெரிவித்துள்ளார்.

மேலும், இளைய தலைமுறையை சீரழிக்கும் கஞ்சா, தடை செய்யப்பட்ட புகையிலை பொருட்கள், குட்கா போன்ற போதைப்பொருட்களை விற்பனை செய்பவர்கள் மற்றும் சட்டவிரோத மதுவிலக்கு குற்றங்களில் ஈடுபடுவோர் மீது தொடர்ந்து குண்டர் தடுப்பு காவல் சட்டத்தின் கீழ் நடவடிக்கை மேற்கொள்ளப்பட்டு சிறையில் அடைக்கப்படுவார்கள் என்றும், மாவட்டத்தில் சட்டம் ஒழுங்கை சீர்குலைக்க முயலும் எந்தவொரு நபரும் தப்ப முடியாது என்றும் மாவட்ட காவல் கண்காணிப்பாளர் Dr. B. சினேஹா ப்ரியா, மிகக் கடுமையாக எச்சரித்துள்ளார்.