மயிலாடுதுறை மாவட்ட விவசாயிகளுக்கு கானல் நீரான காவிரி நீர்...

மயிலாடுதுறையில் காவிரி ஆறு நீர் வரத்தின்றி வறண்டதால் விவசாயிகள் மேட்டூர் நீரைச் சீராகத் திறக்க வலியுறுத்தி கிட்டப்பா பாலம் அருகே ஆற்றுக்குள் இறங்கி கருப்புத் துணி கட்டி போராட்டம் நடத்தினர்.

காவிரி ஆற்றில் இறங்கி போராட்டத்தில் ஈடுபட்ட விவசாயிகள்

Source : Abp

மயிலாடுதுறை: கடந்த செப்டம்பர் 1-ம் தேதி மேட்டூர் அணையில் இருந்து காவிரி டெல்டா மாவட்டங்களில் பாசனப் பணிகளுக்காக காலதாமதமாக தண்ணீர் திறந்து வைக்கப்பட்டது. டெல்டா பாசன விவசாயிகள் தங்களின் குறுவை மற்றும் சம்பா சாகுபடி பணிகளை மேற்கொள்வதற்காக 45 நாட்களுக்குத் தொடர்ச்சியாகத் தண்ணீர் திறந்து விடப்படும் என்று தமிழக அரசு சார்பில் அதிகாரப்பூர்வ அறிவிப்பு வெளியிடப்பட்டிருந்தது. 

இந்த நீர் திறப்பின் தொடர்ச்சியாக, கடந்த 13 ஆம் தேதி மயிலாடுதுறை மாவட்ட எல்லைக்குக் காவிரி நீர் வந்தடைந்தது. இதனால் அப்பகுதி விவசாயிகள் பெரும் மகிழ்ச்சியடைந்தனர். தண்ணீர் வந்தடைந்ததைத் தொடர்ந்து முதற்கட்டமாக மூன்று நாட்கள் மட்டும் காவிரி ஆற்றில் நீர் வரத்து சீராகவும் வேகமாகவும் சென்று கொண்டிருந்தது.

வறண்டு போன காவிரி ஆறும் கேள்விக்குறியான சம்பா சாகுபடியும்

மூன்று நாட்களுக்குப் பிறகு காவிரி ஆற்றில் வந்த நீரின் அளவு படிப்படியாகக் குறையத் தொடங்கியது. தற்போதைய நிலையில் மயிலாடுதுறை மாவட்டத்தில் காவிரி ஆறு முற்றிலுமாக நீர் வரத்தின்றி வறண்டு மணல் வெளியாகக் காட்சியளிக்கிறது. இதனால் வழக்கமான விவசாயப் பணிகளைத் தொடங்க முடியாமல் அப்பகுதி விவசாயிகள் பெரும் கவலையிலும் அதிர்ச்சியிலும் ஆழ்ந்துள்ளனர். குறிப்பாக, இந்த ஆண்டுக்கான சம்பா சாகுபடி பணிகள் முழுமையாகத் தொடங்குமா அல்லது கேள்விக்குறியாக மாறுமா என்ற பெரும் அச்சமும் குழப்பமும் விவசாயிகள் மத்தியில் நிலவி வருகிறது.

மேற்கு மாவட்டங்கள் மீது விவசாயிகள் குற்றம்சாட்டு

மயிலாடுதுறை மாவட்டத்தில் காவிரி ஆறு திடீரென வறண்டு போனோதற்கு முக்கியக் காரணம் குறித்து விவசாயிகள் தங்கள் கருத்துகளைத் தெரிவித்துள்ளனர். மயிலாடுதுறை மாவட்டத்திற்கு மேற்குப் பகுதியில் அமைந்துள்ள மாவட்டங்களில் காவிரி ஆற்றின் குறுக்கே அதிகளவில் தண்ணீர் உறிஞ்சப்படுவதாகவும், தடுத்து நிறுத்தப்பட்டுப் பயன்படுத்தப்படுவதாகவும் அவர்கள் குற்றம்சாட்டுகின்றனர். இதனால் கடைமடைப் பகுதியான மயிலாடுதுறை மாவட்டத்திற்குக் கிடைக்க வேண்டிய நியாயமான தண்ணீரின் அளவு கணிசமாகக் குறைந்து, ஆறு முற்றிலும் வறண்டு போகும் சூழல் ஏற்பட்டுள்ளதாக அவர்கள் வேதனையுடன் சுட்டிக்காட்டுகின்றனர்.

ஆற்றுக்குள் இறங்கி கருப்புத் துணி கட்டி கண்டன போராட்டம்

காவிரி ஆற்றில் உடனடியாகப் போதிய அளவு தண்ணீரைத் திறந்து விட வலியுறுத்தியும், மேகதாது பகுதியில் கர்நாடக அரசு புதிய அணை கட்டுவதைத் தடுத்து நிறுத்தக் கோரியும் விவசாயிகள் ஒருங்கிணைந்து தீவிர கண்டன ஆர்ப்பாட்டத்தில் ஈடுபட்டனர். மயிலாடுதுறை நகரின் எல்லைப் பகுதியான கிட்டப்பா பாலம் அருகே பாய்ந்தோட வேண்டிய காவிரி ஆற்றின் உள்ளே இறங்கி, தங்கள் கண்களில் கருப்புத் துணியைக் கட்டிக் கொண்டு விவசாயிகள் விநோதமான முறையில் போராட்டத்தை முன்னெடுத்தனர். மத்திய, மாநில அரசுகள் உடனடியாக தலையிட்டுப் பிரச்சனையைத் தீர்க்க வேண்டும் என முழக்கங்களை எழுப்பினர்.

தொடர் போராட்டம் குறித்து விவசாயிகள் எச்சரிக்கை

இந்த கண்டனப் போராட்டத்தின் போது விவசாயிகள் செய்தியாளர்களிடம் பேசுகையில், பயிர்களைக் காப்பாற்ற உடனடியாக காவிரி ஆற்றில் போதிய அளவு தண்ணீரைத் திறந்து விட அரசு நடவடிக்கை எடுக்க வேண்டும் எனக் கோரிக்கை விடுத்தனர். அவ்வாறு விவசாயிகளின் கோரிக்கையை ஏற்று மேட்டூர் அணையில் இருந்தும், இடைப்பட்ட மாவட்டங்களில் இருந்தும் கடைமடைப் பகுதிக்குத் தேவையான தண்ணீர் திறக்கப்படாவிட்டால், வரும் நாட்களில் அனைத்து விவசாய அமைப்புகளையும் ஒருங்கிணைத்து மேலும் பல தீவிரமான தொடர் போராட்டங்களில் ஈடுபடப் போவதாக எச்சரிக்கை விடுத்து கலைந்து சென்றனர்.