சாகித்ய அகாதமி விருதுகள்: மத்திய அரசின் தலையீடு - சு. வெங்கடேசன் எம்.பி-யின் கடும் அதிர்ச்சி தகவல்!

தலையீடுகளை எதிர்கொள்ளும் வேளையில் அகாதமி தொடர்ந்து மௌனம் காப்பது வருத்தமளிப்பதோடு, அதன் புகழ்பெற்ற பாரம்பரியத்திற்கு முரணானதாகவும் உள்ளது. - சு.வெங்கடேசன்.

சு.வெங்கடேசன் எம்.பி

கலாச்சாரத் துறை அமைச்சர் கஜேந்திரசிங் செகாவத் அவர்களுக்கு சு. வெங்கடேசன் எம்.பி எழுதியுள்ள கடிதம்.

 

மதுரை எம்.பி சு.வெங்கடேசன்

 

மதுரை எம்.பி சு.வெங்கடேசன் வெளியிட்ட செய்தி...,” நாடாளுமன்ற உறுப்பினர் என்ற முறையிலும், சாகித்ய அகாதமி விருது பெற்றவர் என்ற முறையிலும், 2025-ஆம் ஆண்டுக்கான விருதுகள் தொடர்பாக சாகித்ய அகாதமியின் தேசிய செயற்குழுவின் முடிவுகளில் கலாச்சார அமைச்சகம் அண்மையில் மேற்கொண்டுள்ள தலையீடு குறித்து எனது ஆழ்ந்த கவலையைத் தெரிவிக்க இக்கடிதத்தை எழுதுகிறேன். தேசிய செயற்குழு, நிறுவப்பட்ட நடைமுறைகளைப் பின்பற்றி, முறையாக அமைக்கப்பட்ட அந்தந்த மொழிவாரியான நடுவர் குழுக்களின் பரிந்துரைகளுக்கு ஒப்புதல் அளித்தது. பல தசாப்தங்களாக, இந்த செயல்முறைதான் இலக்கிய உலகில் அகாதமியின் நம்பகத்தன்மை மற்றும் சுதந்திரத்தை உறுதி செய்து வருகிறது. இந்தப் பரிந்துரைகளை நிறுத்தி வைப்பதற்கும், நடுவர் குழுவின் செயல்முறையை ஒரு "தணிக்கைக்கு" (Audit) உட்படுத்துவதற்கும் அமைச்சகம் எடுத்துள்ள முடிவு முற்றிலும் தேவையற்றது மற்றும் முன்னுதாரணமற்றது.

 

கருத்து சுதந்திரத்தை சிதைப்பதாகும்

 

சாகித்ய அகாதமி வரலாற்றில் இதுவரை எந்தவொரு காலக்கட்டத்திலும், நிபுணர் குழுக்களால் எடுக்கப்பட்ட இலக்கியத் தீர்ப்புகள் நிர்வாகத் தணிக்கைக்கு உட்படுத்தப்பட்டதில்லை. இலக்கிய மதிப்பீடு என்பது நிதி அல்லது நடைமுறை சார்ந்த பரிவர்த்தனை அல்ல; அது நிபுணத்துவம், சக படைப்பாளிகளின் மதிப்பீடு மற்றும் கல்விசார் நேர்மை ஆகியவற்றின் அடிப்படையிலான ஒரு அறிவுசார் பயிற்சியாகும். இதனை அதிகாரத்துவ ஆய்வுக்கு உட்படுத்துவது என்பது நிறுவனத்தின் தன்னாட்சி அதிகாரத்தை ஆக்கிரமிப்பதற்கும், அகாதமியின் நோக்கத்தைச் சிதைப்பதற்கும் சமமாகும். இலக்கியத்தை நிர்வாகத் தலையீடுகளிலிருந்து பாதுகாப்பதற்காகவே சாகித்ய அகாதமி ஒரு தன்னாட்சி அமைப்பாக உருவாக்கப்பட்டது. நடுவர் குழுவின் முடிவுகளை மீறவோ அல்லது மறுபரிசீலனை செய்யவோ எடுக்கும் எந்தவொரு முயற்சியும் இந்தத் தன்னாட்சியின் மையப்பகுதியைத் தாக்குவதோடு, கருத்து சுதந்திரத்தை சிதைப்பதாகும். இது ஆழ்ந்த  கவலைகளை எழுப்புகிறது. 

 

புகழ்பெற்ற பாரம்பரியத்திற்கு முரணானதாகவும்

 

இத்தகைய தலையீடுகளை எதிர்கொள்ளும் வேளையில் அகாதமி தொடர்ந்து மௌனம் காப்பது வருத்தமளிப்பதோடு, அதன் புகழ்பெற்ற பாரம்பரியத்திற்கு முரணானதாகவும் உள்ளது.

ஒரு முதன்மையான கலாச்சார நிறுவனம் தனது அறிவுசார் தீர்ப்புகளை நிர்வாக மறுபரிசீலனைக்கு சமர்ப்பிக்க கட்டாயப்படுத்துவது ஒரு ஆபத்தான முன்னுதாரணத்தை உருவாக்கும் என்பதை நான்  தெரிவிக்க விரும்புகிறேன். இது சுதந்திரமான கலாச்சார அமைப்புகளை நிர்வாகக் கட்டுப்பாட்டின் கருவிகளாக மாற்றும் அபாயத்தைக் கொண்டுள்ளதுடன், நாடு முழுவதும் உள்ள எழுத்தாளர்கள் மற்றும் அறிஞர்களுக்கு ஒரு அச்சுறுத்தல் செய்தியை அனுப்புகிறது. எனவே, அமைச்சகம் தனது தலையீட்டை உடனடியாகத் திரும்பப் பெறவும், நடுவர் குழு முடிவுகளின் மீதான தணிக்கை அல்லது மறுபரிசீலனை நடவடிக்கைகளைக் கைவிட

வேண்டுமெனவும் வலியுறுத்துகிறேன்” எனவும் தெரிவித்துள்ளார்,

 

 

இதையும் படிக்க

மதுரையில் அதிர்ச்சி.. திருப்பரங்குன்றம் உச்சியில் தீபம் ஏற்றக்கோரி இளைஞர் போலீஸ் பூத்தில் தீக்குளித்து தற்கொலை!

SIR Electoral: 1 கோடி பேர் காலி? தமிழ்நாடு வரைவு வாக்காளர் பட்டியல் - SIR முடிவுகளை இன்று வெளியிடும் தேர்தல் ஆணையம்