மக்களே ரெடியாகுங்க! ஹெல்த் இன்சூரன்ஸ் பிரீமியம் குறைகிறதா? ஜிஎஸ்டி கவுன்சில் முக்கிய முடிவு!
ஹெல்த் இன்சூரன்ஸ் மற்றும் டேர்ம் இன்சூரன்ஸ் பாலிசிகளுக்கு செலுத்தப்படும் பிரீமியங்களுக்கு ஜிஎஸ்டியில் இருந்து விலக்கு அளிக்கப்படுமா என எதிர்பார்ப்பு எழுந்துள்ளது.
ஆயுள், மருத்துவ காப்பீட்டு திட்டங்களில் பிரீமியத்தின் மீதான ஜிஎஸ்டி வரி ரத்து செய்யப்படுமா என எதிர்பார்ப்புகள் எழுந்த நிலையில், இதுதொடர்பான முடிவை எடுக்கும் வகையில் கூடிய ஜிஎஸ்டி கவுன்சில் கூட்டத்தில் முக்கிய முடிவு எடுக்கப்பட்டுள்ளது.
பெரும் எதிர்பார்ப்புகளுக்கு மத்தியில் இன்று ஜிஎஸ்டி கவுன்சிலின் 55ஆவது கூட்டம் கூட்டப்பட்டது. மத்திய நிதியமைச்சர் நிர்மலா சீதாராமன் தலைமையில் ராஜஸ்தான் மாநிலம் ஜெய்சால்மரில் இந்த கூட்டம் நடைபெற்றது.
ஹெல்த் இன்சூரன்ஸ் பிரீமியம் குறைகிறதா?
ஹெல்த் இன்சூரன்ஸ் பிரீமியத்தின் மீதான ஜிஎஸ்டி வரி ரத்து செய்வதில் மாற்று கருத்துகள் நிலவி வருவதால், இதுகுறித்து முடிவு பின்னர் தெரிவிக்கப்படும் என ஜிஎஸ்டி கவுன்சில் கூட்டத்தில் அறிவிக்கப்பட்டுள்ளது. மருத்துவம் மற்றும் சுகாதார காப்பீடு மீதான ஜிஎஸ்டி வரியை ஆய்வு செய்யும் நோக்கில் பீகாரின் துணை முதல்வர் தலைமையில் அமைச்சர்கள் குழு ஒன்று அமைக்கப்பட்டது.
அந்த குழுவில் இடம்பெற்ற பெரும்பாலான உறுப்பினர்கள், ஜிஎஸ்டி வரி ரத்து செய்யப்பட வேண்டும் என ஆலோசனை வழங்கியுள்ளனர். ஆனால், ஒரு சிலர், தற்போதைய 18 சதவீதத்தில் இருந்து 5 சதவீதமாக குறைக்க பரிந்துரைத்தனர்.
இந்த குழுவுக்கு தலைமை தாங்கிய பீகார் துணை முதல்வர் சாம்ராட் சௌத்ரி, இதுகுறித்து பேசுகையில், "இதுபற்றி மேலும் விவாதிக்கப்பட வேண்டும் என சில உறுப்பினர்கள் கூறினர். எனவே, அமைச்சர்கள் குழு மீண்டும் ஜனவரியில் கூடி விவாதிக்கும்" என்றார்.
ஜிஎஸ்டி கவுன்சிலில் முக்கிய முடிவு:
டேர்ம் லைஃப் இன்சூரன்ஸ் பாலிசிகளுக்கு செலுத்தப்படும் பிரீமியங்களுக்கு ஜிஎஸ்டியில் இருந்து விலக்கு அளிக்கவும் பரிந்துரைக்கப்பட்டது. மூத்த குடிமக்களுக்கான ஹெல்த் இன்சூரன்ஸ் பாலிசியின் பிரீமியங்களுக்கு ஜிஎஸ்டியில் இருந்து விலக்கு அளிக்கவும் அமைச்சர்கள் குழு பரிந்துரை செய்துள்ளது.
மூத்த குடிமக்களைத் தவிர மற்ற தனிநபர்களை பொறுத்தவரையில், 5 லட்சம் ரூபாய் வரையிலான பாலிசிகளை உள்ளடக்கிய ஹெல்த் இன்சூரன்ஸ் பிரீமியங்களுக்கு விலக்கு அளிக்கவும் பரிந்துரைக்கப்பட்டது. இருப்பினும், 5 லட்சம் ரூபாய்க்கு மேலிருக்கும் பாலிசிகளுக்கு தற்போதைய 18 சதவீத ஜிஎஸ்டி விகிதமே பொருந்தும்.
இதையும் படிக்க: ITI Admission: உதவித்தொகை, இலவசக் கல்வி; புதிய ஐடிஐக்களில் டிச.31 வரை மாணவர் சேர்க்கை- விண்ணப்பிப்பது எப்படி?
தலைப்பு செய்திகள்
ட்ரெண்டிங் செய்திகள்
