ஒவ்வொரு 6 நிமிடத்திற்கும் ஒருவர் பலி! 2 நிமிடங்களுக்கு இருவர் காயம் - இந்தியாவின் புள்ளி விவரம்!

ஒவ்வொரு 6 நிமிடத்திற்கும் ஒருவர் பலி; இரண்டு நிமிடங்களுக்கு இருவர் காயம் அடைகின்றனர் என்ற புள்ளிவிவரம் வெளியாகியுள்ளது.

விபத்துக்குள்ளான சைரஸ் மிஸ்ட்ரியின் கார்

ஒவ்வொரு 6 நிமிடத்திற்கும் ஒருவர் பலி; இரண்டு நிமிடங்களுக்கு இருவர் காயம் அடைகின்றனர் என்ற புள்ளிவிவரம் வெளியாகியுள்ளது.

இந்தியாவில் சாலை விபத்துகள் பற்றிய புள்ளிவிவரம் வெளியாகி இருக்கிறது. 2021ஆம் ஆண்டில் இந்தியா முழுக்க பதிவு செய்யப்பட்ட கொலை, கொள்ளை, பாலியல் குற்றங்கள், பெண்களுக்கெதிரான குற்றங்கள், குழந்தைகளுக்கெதிரான குற்றங்கள், உள்ளிட்ட பல்வேறு குற்றங்கள் மற்றும் சாலை விபத்துகள், ரயில் விபத்துகள் உள்ளிட்ட தகவல்கள் குறித்த மொத்த ஆவணத்தொகுப்பான தேசிய குற்றவியல் ஆவண காப்பக அறிக்கை அண்மையில் வெளியானது.

சைரஸ் மிஸ்ட்ரி கார் விபத்து:

டாடா சன்ஸ் குழுமத்தின் முன்னாள் சேர்மன் சைரஸ் மிஸ்ட்ரி சென்ற கார் நேற்று விபத்துக்குள்ளானது. அவர் சென்ற கார் 9 நிமிடங்களில் 20 கிலோமீட்டரைக் கடந்தது என்றும் முன்னாள் சென்ற காரை இடதுபுறத்தில் இருந்து ஓவர் டேக் செய்ய முயன்றபோது கட்டுப்பாட்டை இழந்து பாலத்தின் தடுப்புச் சுவரில் மோதி விபத்துக்குள்ளாகியுள்ளது என்று போலீஸார் தெரிவித்துள்ளனர். மேலும் விபத்து நடந்த போது காரின் பின்னால் இருந்த சைரஸ் மிஸ்ட்ரி மற்றும் ஜஹாங்கிர் சீட் பெல்ட் அணியவில்லை என்றும் போலீஸ் விசாரணையில் தெரியவந்துள்ளது.

ஆனந்த் மஹிந்திரா ட்வீட்:

சிரஸ் மிஸ்ட்ரி அகால மரணத்திற்கு இரங்கல் தெரிவித்துள்ள மஹிந்திரா அண்ட் மஹிந்திரா நிறுவனர் ஆனந்த் மஹிந்திரா, இனி நான் காரின் பின் இருக்கையில் அமர்ந்து சென்றாலும் சீட் பெல்ட் அணிவேன். நீங்களும் அதைப் பின்பற்றுங்கள். நம் குடும்பத்தினருக்காக இதைச் செய்வோம் என்று கூறியுள்ளார்.

Former Tata Sons chairman #CyrusMistry and a co-passenger, who were killed in a car crash on Sunday, were not wearing seat beltshttps://t.co/HBHMwlui59

— News18.com (@news18dotcom) September 5, 2022

விபத்து புள்ளிவிவரம்:

இந்நிலையில் தேசிய குற்றவியல் ஆவண காப்பக அறிக்கையை ஆராய்ந்து பார்த்தால், அதில் இந்தியாவில் ஒவ்வொரு 6 நிமிடமும் ஒரு இந்தியர் சாலை விபத்தில் அதுவும் அதிவேகமாக வாகனத்தை இயக்கி நடக்கும் விபத்தில் உயிரிழக்கிறார். அதேபோல் ஒவ்வொரு இரண்டு நிமிடங்களுக்கு இருவர் அதிவேகமாக வாகனத்தை இயக்குவதால் காயமடைகின்றனர் என்று தெரிவிக்கப்பட்டுள்ளது. மேலும் அந்த புள்ளிவிவரத்தின் படி கடந்த ஆண்டு (2021) வேகமாக வாகனம் ஓட்டி நடந்த விபத்துகளில் 87,050 பேர் உயிரிழந்துள்ளனர். இதில் பெண்கள் 11,190 பேர் உயிரிழந்தனர். 2,28.274 பேர் காயமடைந்தனர். நாட்டில் 60 சதவீதம் சாலை விபத்துகளுக்கு அதி வேகத்தில் வாகனத்தை இயக்குவதே காரணமாக உள்ளது. இந்தியாவில் கடந்த 2021 ஆம் ஆண்டில் ஒட்டுமொத்தமாக 4,03,116 சாலை விபத்துகள் நடந்துள்ளன. இதுவே 2020 ஆம் ஆண்டில் 3,54,796 ஆக இருந்தது. அதேபோல் 2021ல் சாலை விபத்தில் உயிரிழப்புகள் 1,55,622 ஆக அதிகரித்துள்ளது. 2020ல் சாலை விபத்தில் உயிரிழப்புகள் 1,33,201 ஆக இருந்தது.

2020-ஐ விட 2021-ல் மிக அதிகமாக சாலை விபத்துகள் பதிவான மாநிலங்களில் தமிழகம் முதலிடத்தில் உள்ளது. தமிழகத்தில் கடந்த 2021ஆம் ஆண்டில் 57,090 சாலை விபத்துகளும், மத்தியப் பிரதேசத்தில் 49,493 விபத்துகளும், உத்தரப் பிரதேசத்தில் 36,509 விபத்துகளும், மகாராஷ்டிராவில் 30,086 விபத்துகளும், கேரளாவில் 33,501 விபத்துகளும் நடந்துள்ளன. இறப்பு விகிதத்தைப் பொருத்தவரை மொத்த விபத்துகளில் 3,73,884 பேர் காயமடைந்தனர், 1,73,860 பேர் உயிரிழந்தனர். இவர்களில் உத்தரப்பிரதேசத்தில் 24,711 பேர் இறந்தனர். தமிழகத்தில் 16,685 பேர் இறந்தனர். மகாராஷ்டிராவில் 16,446 பேர் இறந்தனர். இந்த மூன்று மாநிலங்கள் மட்டுமே முறையே 14.2%, 9.6% மற்றும் 9.5% சாலை விபத்து உயிரிழப்புகளைப் பதிவு செய்துள்ளன. மொத்தமாக இந்த மூன்று மாநிலங்களில் மட்டும் 33.3 சதவீத இறப்பு பதிவாகியுள்ளது.