EPFO : இன்று வெளியாகும் முக்கிய அறிவிப்பு! அதிகரிக்கும் வட்டி விகிதம்! ஓய்வுதியத்தில் மாற்றம் ஏற்படுமா?
EPFO Interest Rate : ஊழியர் வருங்கால வைப்பு நிதி அமைப்பின் (EPFO) மத்திய அறங்காவலர் குழுவின் (CBT) கூட்டம் வெள்ளிக்கிழமை (பிப்ரவரி 28, 2025) இங்கு நடைபெற உள்ளது.
ஊழியர் வருங்கால வைப்பு நிதி அமைப்பின் (EPFO) கீழ் உள்ள தனியார் துறை ஊழியர்களுக்கான குறைந்தபட்ச ஓய்வூதியத்தை உயர்த்துவதற்கான நீண்ட கால முயற்சிகள் மேற்கொள்ளப்பட்டு வருகின்றன.
EPFO குறைந்தபட்ச ஓய்வூதிய உயர்வு:
தனியார் துறை ஊழியர்களுக்கு EPFO-வின் கீழ் குறைந்தபட்ச ஓய்வூதியத்தை அதிகரிக்க வேண்டும் என்ற கோரிக்கை நீண்ட காலமாக இருந்து வருகிறது. செப்டம்பர் 2014 இல், EPFO நடத்தும் ஊழியர் ஓய்வூதியத் திட்டத்தின் (EPS) கீழ் வரும் ஓய்வூதியதாரர்களுக்கு மாதத்திற்கு குறைந்தபட்ச ஓய்வூதியம் ரூ.1,000 என மத்திய அரசு அறிவித்தது.
EPF-இன் கீழ், ஊழியர்கள் தங்கள் அடிப்படை சம்பளத்தில் 12 சதவீதத்தை வருங்கால வைப்பு நிதியில் டெபாசிட் செய்கிறார்கள், அதே நேரத்தில் நிறுவனங்களும் அதே தொகையை பங்களிக்க வேண்டும். நிறுவனம் டெபாசிட் செய்யும் தொகையில் 8.33% EPS-க்கும், 3.67% EPF கணக்கிற்கும் செல்கிறது.
கோரிக்கைகள் என்ன?
EPS-95 இன் கீழ் குறைந்தபட்ச ஓய்வூதியம் உள்ளிட்ட அவர்களின் கோரிக்கைகள் மீது உரிய நேரத்தில் நடவடிக்கை எடுப்பதாக மத்திய தொழிலாளர் அமைச்சர் மன்சுக் மண்டவியா உறுதியளித்துள்ளதாக ஓய்வூதியதாரர்கள் அமைப்பான EPS-95 போராட்டக் குழு தெரிவித்துள்ளது. நாடு முழுவதும் EPFO இன் கீழ் 78 லட்சத்திற்கும் மேற்பட்ட ஓய்வூதியதாரர்களின் நீண்டகால கோரிக்கைகள் குறித்து மத்திய அரசு இந்த நிலைப்பாட்டை எடுத்துள்ளதாக ஓய்வூதியதாரர்கள் அமைப்பின் அறிக்கையில் தெரிவிக்கப்பட்டுள்ளது.
குறைந்தபட்ச EPS ஓய்வூதியத்தைத் தவிர, ஓய்வூதியதாரர்கள் அமைப்பு, குறைந்தபட்ச ஓய்வூதியத்தை அதிகரித்தல், ஓய்வு பெற்றவர்கள் மற்றும் அவர்களது வாழ்க்கைத் துணைவர்களுக்கு இலவச மருத்துவ வசதிகள் மற்றும் அதிக ஓய்வூதிய சலுகைகளுக்கான விண்ணப்பங்களில் உள்ள பிழைகளை சரிசெய்தல் ஆகியவற்றைக் கோரிக்கையாக வைத்துள்ளது.
மேலும், இந்தப் பிரச்சினைகளுக்கு விரைவில் தீர்வு காணப்படும் என்று அமைச்சர் மாண்ட்வியா அந்தக் குழுவிடம் உறுதியளித்துள்ளதாகவும் அந்த அறிக்கையில் கூறப்பட்டுள்ளது. பல ஆண்டுகளாக ஓய்வூதியதாரர்களின் உரிமைகளுக்காகப் போராடி வரும் EPS-95 தேசிய போராட்டக் குழு (NAC), மத்திய அரசுடனான சமீபத்திய பேச்சுவார்த்தைக்கு பிறகு, EPS-95 இன் கீழ் குறைந்தபட்ச ஓய்வூதியம் 10 ஆண்டுகளுக்குப் பிறகு இறுதியாக மாற்றியமைக்கப்படும் என்ற நம்பிக்கை உள்ளதாக என்று கூறியிருந்தது.
குறைந்தபட்ச ஓய்வூதியம் அதிகரிக்குமா?
2025 பட்ஜெட்டுக்கு முன்னதாக, EPS-95 ஓய்வுபெற்ற ஊழியர்களின் குழு நிதியமைச்சர் நிர்மலா சீதாராமனை சந்தித்து, குறைந்தபட்ச ஓய்வூதியத்தை மாதத்திற்கு ரூ.7,500 ஆக உயர்த்த வேண்டும் என்ற கோரிக்கையை மீண்டும் வலியுறுத்தியது. EPS-95 தேசிய போராட்டக் குழுவின் தகவலின் படி, நிதியமைச்சர் EPS-95 குழுவினரின் கோரிக்கைகள் பரிசீலிக்கப்படும் என்று உறுதியளித்ததாக தெரிவித்தனர்.
கடந்த 7-8 ஆண்டுகளாக, ஓய்வூதியதாரர்கள் தங்கள் ஓய்வூதியத்தை அதிகரிக்க வேண்டும் என்று தொடர்ந்து கோரிக்கை வைத்து வருகின்றனர். தற்போதுள்ள ரூ.1,000 ஓய்வூதியத்தை ரூ.7,500 ஆக உயர்த்தி, அகவிலைப்படி சலுகை வழங்க வேண்டும் என்றும் அவர்கள் கோருகின்றனர். இது தவிர, ஓய்வு பெற்ற ஊழியர்கள் மற்றும் அவர்களது வாழ்க்கைத் துணைவர்களுக்கு இலவச மருத்துவ வசதிகளையும் வழங்க வேண்டும் என்று கோரி வருகின்றனர்.
EPFO-வின் அடுத்த கூட்டத்தில் என்ன நடக்கும்?
EPFOவின் CBT (மத்திய அறங்காவலர் குழு) கூட்டம் இன்று (பிப்ரவரி 28, 2025) நடைபெற உள்ளது, இதில் 2024-25 நிதியாண்டுக்கான வருங்கால வைப்பு நிதி வைப்புத்தொகைக்கான வட்டி விகிதம் குறித்து முடிவு செய்யப்படும். இந்த கூட்டத்தில் வட்டி விகிதம் பற்றி முக்கியமாக விவாதிக்கப்படும் என்றாலும், ஓய்வூதிய உயர்வு பிரச்சனையும் இந்த கூட்டத்தில் முக்கியமானதாக இருக்கலாம் என்று கூறப்படுகிறது.
நீண்ட காலமாக EPF-க்கு பங்களிப்பு செய்து வரும் ஓய்வூதியதாரர்கள் மற்றும் சமூக சேவையாளர்கள் தற்போதைய ஓய்வூதியத் தொகை போதுமானதாக இல்லை என்று கூறுகின்றனர். தற்போதைய பணவீக்கம் மற்றும் அதிகரித்து வரும் மருத்துவச் செலவுகளைக் கருத்தில் கொண்டு, ஒவ்வொரு மாதமும் பெறப்படும் குறைந்தபட்ச ஓய்வூதியம் ரூ.1,000 மிகவும் குறைவாக இருப்பதாக அவர்கள் கூறுகிறார்கள். ஓய்வூதியத்தை அதிகரிக்க வேண்டும் என்ற இந்த நீண்டகால கோரிக்கையை நிறைவேற்ற அரசாங்கத்தின் மீதான அழுத்தம் தொடர்ந்து அதிகரித்து வருகிறது. இப்போது அனைவரின் கவனமும் அடுத்த CBT கூட்டத்தில் உள்ளது, அதில் ஓய்வூதியத்தை அதிகரிப்பது குறித்து ஒரு பெரிய முடிவு எடுக்கப்படலாம்.
நிலையான வட்டி விகிதம் பொருந்துமா?
பங்குச் சந்தையில் ஏற்ற இறக்கங்கள் இருந்தபோதிலும் நிலையான வருமானத்தைப் பெற, EPFO கணக்கு வைத்திருப்பவர்களுக்கு ஒரு நிலையான வட்டி விகிதத் திட்டத்தை செயல்படுத்த அரசாங்கம் பரிசீலித்து வருகிறது.
EPFO-விற்கான வட்டி நிலைப்படுத்தல் ரிசர்வ் நிதியை உருவாக்கும் திட்டத்தை அரசாங்கம் பரிசீலித்து வருகிறது. முதலீட்டு செயல்திறன் எதுவாக இருந்தாலும் கணக்கு வைத்திருப்பவர்கள் நிலையான வட்டி விகிதத்தைப் பெறுவதே இதன் நோக்கம். இந்த திட்டத்தின் சாத்தியக்கூறுகளை தொழிலாளர் மற்றும் வேலைவாய்ப்பு அமைச்சகம் ஆய்வு செய்து வருகிறது.
2024-25 ஆம் ஆண்டிற்கான EPF வட்டி விகிதம் என்னவாக இருக்கும்?
EPFO 2024-25 நிதியாண்டிற்கு EPF இன் வட்டி விகிதத்தை 8% முதல் 8.25% வரை வைத்திருக்க முடியும் என்று தகவல்கள் தெரிவிக்கின்றன.
CBT கூட்டத்தில் எதிர்பார்ப்பு:
மத்திய தொழிலாளர் மற்றும் வேலைவாய்ப்பு அமைச்சர் தலைமையிலான EPFOவின் மத்திய அறங்காவலர் குழு (CBT), இந்த அமைப்பின் மிக உயர்ந்த முடிவெடுக்கும் அமைப்பாகும். இதில் முதலாளிகள் சங்கங்கள், தொழிற்சங்கங்கள் மற்றும் மத்திய மற்றும் மாநில அரசுகளின் அதிகாரிகள் அடங்குவர்.
வட்டி விகிதத்தை நிர்ணயிக்கும் முறை:
- EPFO வட்டி விகிதத்தை முன்மொழிகிறது.
- CBT இந்த முன்மொழிவை மதிப்பாய்வு செய்து பின்னர் அங்கீகரிக்கிறது.
- இதற்குப் பிறகு, நிதி அமைச்சகத்திடமிருந்து இறுதி ஒப்புதல் பெறப்படும்.
- ஒப்புதல் பெற்ற பிறகு, இந்த வட்டி EPFO கணக்கு வைத்திருப்பவர்களின் கணக்கில் டெபாசிட் செய்யப்படும்.
2023-24 ஆம் ஆண்டிற்கான EPF வட்டி விகிதம்
2023-24 நிதியாண்டில், EPFO வட்டி விகிதத்தை 2022-23 ஆம் ஆண்டில் 8.15% இலிருந்து 8.25% ஆக மாற்றியது. வட்டி விகிதத்தில் ஏதேனும் மாற்றம் செய்யப்படுமா இல்லையா என்பது அடுத்த CBT கூட்டத்தில் முடிவு செய்யப்படும். EPFO கணக்கு வைத்திருப்பவர்களுக்கு இந்த சந்திப்பு மிகவும் முக்கியமானதாக இருக்கும், எனவே வருங்கால வைப்பு நிதி தொடர்பான முக்கியமான அறிவிப்புகள் வெளியிடப்படும் என்பதால் இந்த சந்திப்பின் மீது அனைவரின் கவனமும் உள்ளது.
தலைப்பு செய்திகள்
ட்ரெண்டிங் செய்திகள்
