Manipur Violence: ’ஏன் ஓடி ஒளிஞ்சுக்கிறீங்க’..மணிப்பூர் விவகாரத்தில் பிரதமர் மோடியை வெளுத்து வாங்கிய காங்கிரஸ்!

அமைச்சர்களுக்கு பின்னால் பிரதமர் மோடி ஓடி ஒளிந்து கொள்வதாக காங்கிரஸ் கடுமையாக சாட்டியுள்ளது.

பிரதமர் மோடி

மணிப்பூரில் பழங்குடி பெண்களுக்கு நேர்ந்த கொடூரம் நாட்டையே அதிர்ச்சியில் ஆழ்த்தியுள்ளது. அங்கு, இனக்கலவரம் இரண்டு மாதங்களுக்கு மேல் நடந்து வந்தாலும் பிரதமர் மோடி, இதுகுறித்து கருத்து தெரிவிக்காமல் அமைதி காத்து வந்தார். ஆனால், மக்கள் மத்தியில் மணிப்பூர் சம்பவம் தொடர்பான வீடியோ ஏற்படுத்திய தாக்கம், அவரை வாய் திறந்து கண்டிக்க வைத்தது.

மனித நேயத்தை கேள்விக்குள்ளாக்கும் சம்பவங்கள்:

இந்த ஒரு சம்பவம் ஏற்படுத்திய தாக்கமே இன்னும் அடங்காத நிலையில், மனித நேயத்தை கேள்விக்குள்ளாக்கும் பல சம்பவங்கள் மணிப்பூரில் நடந்திருப்பதாக தகவல்கள் வெளியான வண்ணம் உள்ளது. குறிப்பாக, பழங்குடி பெண்களை நிர்வாணமாக்கி ஊர்வமாக அழைத்து சென்று, கூட்டு பாலியல் வன்கொடுமை செய்யப்பட்ட அதே நாளில், மேலும் இரண்டு இளம் பெண்கள் கொடூரமாக தாக்கப்பட்டு படுகொலை செய்யப்பட்டுள்ளனர்.

கலவரத்தின்போது, 800 பேர் சேர்ந்து ஒரு இளைஞரை அடித்து கொலை செய்துள்ளனர். கேட்கும்போதே மனதை உலுக்கும் இந்த சம்பவங்களில் ஈடுபட்ட குற்றவாளிகளுக்கு எதிராக கடும் நடவடிக்கை எடுக்க வேண்டும் என தலைவர்கள் வலியுறுத்தி வருகின்றனர். இந்த சம்பவம் நாடாளுமன்றத்திலும் எதிரொலித்துள்ளது.

நாடாளுமன்றத்தை உலுக்கிய மணிப்பூர் விவகாரம்:

கடந்த வியாழக்கிழமை தொடங்கிய நாடாளுமன்ற மழைக்கால கூட்டத் தொடரை நடத்த விடாமல் எதிர்க்கட்சியினர் முடக்கி வருகின்றனர். மணிப்பூர் தொடர்பாக விவாதிக்க 15 எம்பிக்கள் ஒத்திவைப்பு நோட்டீஸ் அளித்தனர். நாடாளுமன்றத்தின் இரு அவைகளிலும் மணிப்பூர் விவகாரம் தொடர்பாக பிரதமர் மோடி பதில் அளிக்க வேண்டும் என எதிர்க்கட்சி எம்பிக்கள் வலியுறுத்தி வருகின்றனர்.

விதி எண் 267இன் கீழ் அனைத்து அவை நடவடிக்கைகளையும் ஒத்திவைத்துவிட்டு நாடாளுமன்றத்தில் மணிப்பூர் விவகாரம் குறித்து விவாதிக்க எதிர்க்கட்சியினர் கோரிக்கை விடுத்து வருகின்றனர். ஆனால், விதி எண் 176இன் கீழ் குறுகிய கால விவாதத்திற்கு மத்திய அரசு சம்மதித்துள்ளது. இதனால், வியாழக்கிழமை, வெள்ளிக்கிழமை என இரண்டு நாள்களுமே நாடாளுமன்றம் முடங்கியது.  

இந்த நிலையில், அமைச்சர்களுக்கு பின்னால் பிரதமர் மோடி ஓடி ஒளிந்து கொள்வதாக காங்கிரஸ் கடுமையாக சாடியுள்ளது. காங்கிரஸ் அமைப்பு செயலாளரும் மாநிலங்களவை உறுப்பினருமான கே. சி. வேணுகோபால், இதுகுறித்து தனது ட்விட்டர் பக்கத்தில், "கேள்விகளை நேரடியாக எதிர்கொள்ள பிரதமர் பயப்படுவதால் நாடாளுமன்றம் செயலிழந்துள்ளது. 

அவர் (மோடி) தலைவராக தேர்ந்தெடுக்கப்பட்ட சபைக்குள் நுழைய மறுக்கிறார். உள்நாட்டுப் போருக்கு மத்தியில் மணிப்பூர் சிக்கியுள்ளது. ஆனால், பிரதமர் தனக்குக் கீழுள்ள அமைச்சர்களுக்கு பின்னால் ஒளிந்து கொள்கிறார். இந்த நெருக்கடியை கட்டுப்பாட்டை மீறிச் செல்ல அவர் அனுமதித்ததால் ஒட்டுமொத்த தேசமும் கொதிப்படைந்துள்ளது. மேலும் இதுபோன்று மரணம் நிகழும் அழிவு நேரத்தில் அவரது மௌனம் வெட்கக்கேடானது" என பதிவிட்டுள்ளார்.