கிறிஸ்துமஸ் ஸ்பெஷல்: ஓசூரின் வெள்ளை ரோஜாக்களுக்கு கேரளாவில் குவிந்த ஆர்டர்கள்! விவசாயிகள் உற்சாகம் !

கிறிஸ்துமஸ் பண்டிகையையொட்டி, ஏராளமான திருமணங்கள் நடைபெறுவதால் வெள்ளை ரோஜாக்களை உற்பத்தி செய்து, ஆண்டுதோறும் 20 லட்சம் மலர்கள் அனுப்புகின்றனர்.

பூக்கள் விற்பனை

Source : ABPLIVE AI

கிறிஸ்துமஸ் பண்டிகையையொட்டி, ஓசூர் வெள்ளை ரோஜாவுக்கு ஆர்டர்கள் குவிந்த வண்ணம் உள்ளது. கேரளாவுக்கு தினமும் 2 லட்சம் மலர்கள் அனுப்பி வைக்க தயாராகி வருகின்றனர் விவசாயிகளும். வியாபாரிகளும். கிருஷ்ணகிரி மாவட்டம் ஓசூர், தளி, கெலமங்கலம், பேரிகை, பாகலூர் உள்ளிட்ட பகுதிகளில் ஆண்டு முழுவதும் இதமான சீதோஷ்ணம் நிலவி வருகிறது. இதனால், இப்பகுதிகளில் சாமந்தி, ரோஜா, செண்டுமல்லி உள்ளிட்ட மலர் செடிகளை விவசாயிகள் அதிகளவில் சாகுபடி செய்து வருகின்றனர்.

இப்பகுதியில் விளையும் மலர்களை பறித்து ஓசூர் சந்தைக்கு கொண்டு செல்கின்றனர்.  அங்கிருந்து பல்வேறு மாவட்டங்கள் மற்றும் மாநிலங்களுக்கு மூட்டை கணக்கில் பூக்களை அனுப்பி வைக்கின்றனர். குறிப்பாக கேரள மாநிலத்தில் கொண்டாடப்படும் ஓணம் விழாவில் சாமந்தி பூக்களுக்கு முக்கிய இடமுண்டு. ஓணம் பண்டிகை சீசனுக்கு ஓசூர் சுற்றியுள்ள பகுதிகளில் அதிகளவில் வெள்ளை சாமந்தி உற்பத்தி செய்து சுமார் 1000 டன்னுக்கு மேல் விற்பனைக்கு அனுப்புகின்றனர்.

அதே போல், கேரளாவில் கிறிஸ்துமஸ் பண்டிகை மற்றும் கிறிஸ்தவ திருமண விழாக்களில், வெள்ளை ரோஜாக்களை அதிகளவில் பயன்படுத்தி வருகின்றனர். கிறிஸ்துமஸ் பண்டிகையையொட்டி, ஏராளமான திருமணங்கள் நடைபெறுவதால் வெள்ளை ரோஜாக்களை உற்பத்தி செய்து, ஆண்டுதோறும் 20 லட்சம் மலர்கள் அனுப்புகின்றனர். இந்த ஆண்டு கிறிஸ்துமஸ் விழாவை எதிர்நோக்கி, பாகலூர் பகுதியில் 500 ஏக்கர் பரப்பளவில் வெள்ளை ரோஜா சாகுபடி செய்துள்ளனர். பண்டிகைக்கு இன்னும் சில நாட்களே உள்ள நிலையில், வெள்ளை மற்றும் கலர் ரோஜாக்களை அறுவடை செய்து, அதனை குளிர்ந்த அறையில் பதப்படுத்தி வைக்கும் பணியை சாகுபடியாளர்கள் தீவிரப்படுத்தியுள்ளனர். இதுகுறித்து  வியாபாரிகள் கூறுகையில், வெளிநாடுகளில் வசிக்கும் கேரளா மக்கள், கிறிஸ்துமஸ் பண்டிகை விடுமுறைக்கு வருகின்றனர். கிறிஸ்துமஸ் முடிந்து அடுத்த நாள் தொடர்ந்து, ஜனவரி 10ம் தேதி வரை கிறிஸ்தவர்கள் திருமணம் அதிகளவில் நடைபெறும். அப்போது, வெள்ளை ரோஜா தேவை அதிகரிக்கும். இதனால், ஆர்டர் குவிந்து வருகிறது.

ஆர்டரின் பேரில், வரும் 20ம் தேதி முதல் தினமும் 2 லட்சம் வெள்ளை ரோஜாக்களை கேரளாவிற்கு அனுப்ப முடிவு செய்துள்ளோம். அதற்காக தற்போதே ஆயத்தப்பணியில் ஈடுபட்டுள்ளோம். வெள்ளை ரோஜா, வெள்ளை ஜர்பரா, வெள்ளை ஜிப்சோபிலா ஆகிய மலர்களை அறுவடை செய்து, கவர்கள் மூலம் பேக் செய்து குளிர்ந்த அறையில் அடுக்கி வைத்து அடுத்த வாரம் கேரளாவிற்கு அனுப்ப உள்ளோம் எனக்கூறினர். மேலும், இந்தியாவில் பல்வேறு மாநிலங்களுக்கும் ரோஜா மலர்களை அனுப்பி வைக்க உள்ளோம். பனி தாக்கத்தால் ரோஜாவில் டவுனி நோய் தாக்கி 40 சதவீதம் உற்பத்தி பாதிக்கப்பட்டுள்ளது. 20 மலர்கள் கொண்ட ஒரு கட்டு உள்ளூரில் ரூ.50க்கு விற்பனையாகிறது. கேரளா மற்றும் மற்ற மாநிலங்களில் சீசனுக்கு ரூ.200க்கு விற்பனையாகும் என எதிர்பார்க்கிறோம். இவ்வாறு அவர் கூறினார்