Chandrayaan 3 Rover: நிலவில் பள்ளம்.. சுதாரித்து கொண்டு புதிய பாதையில் பயணத்தை தொடங்கும் ரோவர்..

லேண்டரில் இருந்து வெளியே வந்த ரோவர், நிலவில் பயணித்துக் கொண்டிருக்கும்போது, பள்ளம் தென்பட்டதாகவும் அப்போது,  சுதாரித்து கொண்ட ரோவர், புதிய பாதையில் பயணத்தை தொடங்கி இருப்பதாக தெரிவிக்கப்பட்டுள்ளது.

நிலாவில் பள்ளம்

நிலவின் தென்துருவத்தை ஆராயும் நோக்கில் இந்திய விண்வெளி ஆராய்ச்சி மையம் (இஸ்ரோ), கடந்த மாதம் 14ஆம் தேதி சந்திரயான் 3 விண்கலத்தை விண்ணில் செலுத்தியது. 40 நாட்கள் பயணத்திற்கு பிறகு கடந்த 23ஆம் தேதி மாலை சந்திரயான் 3 விண்கலத்தின் விக்ரம் லேண்டர் நிலவின் மேற்பரப்பில் வெற்றிகரமாக தரையிறங்கியது. 

இதன் மூலம் நிலவின் மேற்பரப்பில் லேண்டரை வெற்றிகரமாக தரையிறக்கிய நான்காவது நாடு மற்றும் நிலவின் தென் துருவத்தில் லேண்டரை தரையிறக்கிய முதல் நாடு என்ற பெருமையை இந்தியா பெற்றுள்ளது.

உலக நாடுகளை ஆச்சரியத்தில் ஆழ்த்திய இஸ்ரோ:

நிலவை ஆராய்வதற்காக சந்திரயான் - 3 விண்கலத்தில் பல கருவிகள் அனுப்பப்பட்டுள்ளன. வெப்ப கடத்துத்திறன் மற்றும் வெப்பநிலையை தெரிந்து கொள்வதற்காக ChaSTE கருவியும் தரையிறங்கும் இடத்தை சுற்றி நில அதிர்வு தொடர்பாக ஆராய்வதற்காக ILSA கருவியும் மின் திறன் கொண்ட துகள்களை பற்றி ஆராய LP கருவியும் விக்ரம் லேண்டரில் அனுப்பப்பட்டுள்ளன.

அனுப்பப்பட்ட கருவிகளின் மூலம் நிலவில் எடுக்கப்பட்ட புகைப்படங்கள் மற்றும் வீடியோவை இஸ்ரோ வெளியிட்டு வரும் நிலையில், இன்று முக்கிய தகவல் ஒன்றை இஸ்ரோ பகிர்ந்துள்ளது. நிலவில் தரையிறங்கிய லேண்டரில் இருந்து வெளியே வந்த ரோவர், அங்கு பயணித்துக் கொண்டிருக்கும்போது, பள்ளம் தென்பட்டதாகவும் அப்போது,  சுதாரித்து கொண்ட ரோவர், புதிய பாதையில் பயணத்தை தொடங்கி இருப்பதாகவும் இஸ்ரோ தெரிவித்துள்ளது.

சவாலை சமாளித்து வெற்றிநடைபோடும் சந்திரயான் 3:

இதுதொடர்பாக எக்ஸ் (முன்னதாக ட்விட்டர் என அழைக்கப்பட்டது) சமூக வலைதள பக்கத்தில், " நிலவில் ரோவர் செல்லும் பாதையில் 4 மீட்டர் விட்டத்திற்கு பள்ளம் ஒன்று தென்பட்டுள்ளது. 3 மீட்டர் தொலைவுக்கு முன்பே ரோவர், இதை கண்டறிந்துள்ளது. எனவே, பழைய பாதையில் செல்ல கமாண்ட் அனுப்பப்பட்டது. இதை தொடர்ந்து, ரோவர் புதிய பாதையில் பயணத்தை தொடங்கி இருக்கிறது" என இஸ்ரோ அறிவித்துள்ளது.

 

Chandrayaan-3 Mission:

On August 27, 2023, the Rover came across a 4-meter diameter crater positioned 3 meters ahead of its location.
The Rover was commanded to retrace the path.

It's now safely heading on a new path.#Chandrayaan_3#Ch3 pic.twitter.com/QfOmqDYvSF

— ISRO (@isro) August 28, 2023

6 சக்கரம் கொண்ட 26 கிலோ எடையிலான பிரக்யான் ரோவரில் பொருத்தப்பட்டுள்ள கண்காணிப்பு கேமராக்கள் மூலமாக பல்வேறு ஆய்வு மேற்கொள்ளப்பட உள்ளன. இந்த ரோவரின் ஆய்வு நாட்கள் 14 நாட்கள் ஆகும். இந்த ரோவர் நிலவில் சுமார் 100 மீட்டர் முதல் 500 மீட்டர் வரை செல்லும் வகையில் கட்டமைக்கப்பட்டுள்ளது. 

நொடிக்கு ஒரு சென்டி மீட்டர் தூரம் அளவிற்கு மட்டுமே இந்த ரோவர் பயணிக்கும். அப்போது நிலவில் உள்ள நீராதாரம்,  கனிம வளங்கள், நிலவின் அமைப்பு, தோற்றம் மற்றும் நிலவின் வளிமண்டலம் என பல்வேறு விவகாரங்கள் தொடர்பாக ஆராயப்பட உள்ளன.