ஒரு ஓட்டுக்கு ₹5000!! ஆட்சியர் அலுவலகத்தில் அம்மன் அர்ச்சுணன் திடீர் தர்ணா...

கோவை தெற்கில் பணப்பட்டுவாடா குற்றச்சாட்டை முன்வைத்து அம்மன் அர்ச்சுணன் ஆட்சியர் அலுவலகத்தில் தர்ணா போராட்டத்தில் ஈடுபட்டார்.

அ.தி.மு.க வேட்பாளர் அம்மன் அர்ச்சுணன் தர்ணா

Source : abp nadu

கோவை தெற்கு சட்டமன்றத் தொகுதியில் பணப்பட்டுவாடா நடைபெறுவதாக குற்றம்சாட்டி, அ.தி.மு.க வேட்பாளர் அம்மன் அர்ச்சுணன், மாவட்ட ஆட்சியர் அலுவலக வளாகத்தில் திடீர் தர்ணா போராட்டத்தில் ஈடுபட்டார். அவருடன் பா.ஜ.க மற்றும் கூட்டணிக் கட்சி நிர்வாகிகளும் திரளாக பங்கேற்றதால், ஆட்சியர் அலுவலகப் பகுதியில் பரபரப்பு நிலவியது.

தேர்தலை முன்னிட்டு கோவை தெற்கு தொகுதியில் ஒரு ஓட்டுக்கு ரூ.5,000 வரை ரகசியமாக பணப்பட்டுவாடா நடைபெறுவதாக அம்மன் அர்ச்சுணன் குற்றம்சாட்டினார். இதுகுறித்து பலமுறை தேர்தல் அதிகாரிகளிடம் புகார் அளித்தும், உரிய நடவடிக்கை எடுக்கப்படவில்லை என்றும் அவர் தெரிவித்தார். அதிகாரிகள் மெத்தனமாக செயல்படுவதால் சுதந்திரமான மற்றும் நியாயமான தேர்தல் நடைபெற வாய்ப்பில்லை எனவும் கூறினார்.

இந்த நிலையில், கோவை தெற்கு தொகுதியில் நடைபெறும் தேர்தலை உடனடியாக நிறுத்தி வைக்க வேண்டும் என்பதே போராட்டத்தின் முக்கிய கோரிக்கையாக முன்வைக்கப்பட்டது. வெளி மாவட்டத்தைச் சேர்ந்தவர்கள் தொகுதிக்குள் தங்கி பணப்பட்டுவாடா செய்வதாகவும், சிசிடிவி ஆதாரங்களுடன் புகார் அளித்தும் பறக்கும் படையினர் நடவடிக்கை எடுக்கவில்லை என்றும் அவர் குற்றம்சாட்டினார்.

போராட்டம் குறித்து தகவல் அறிந்த போலீசார் சம்பவ இடத்துக்கு வந்து, அம்மன் அர்ச்சுணன் மற்றும் கட்சி நிர்வாகிகளுடன் பேச்சுவார்த்தை நடத்தினர். ஆனால், மாவட்ட ஆட்சியர் மற்றும் தேர்தல் அதிகாரி நேரில் வந்து விளக்கம் அளிக்கும் வரை போராட்டத்தை கைவிடமாட்டோம் என போராட்டக்காரர்கள் திட்டவட்டமாக தெரிவித்தனர்.

ஆட்சியர் அலுவலக நுழைவாயிலில் தர்ணா நீடித்ததால், அப்பகுதியில் பலத்த போலீஸ் பாதுகாப்பு போடப்பட்டது. தேர்தலுக்கு சில மணி நேரங்களே உள்ள நிலையில், ஒரு தொகுதியின் வேட்பாளரே தேர்தலை நிறுத்தக் கோரி போராட்டத்தில் ஈடுபட்டிருப்பது அரசியல் வட்டாரத்தில் பரபரப்பை ஏற்படுத்தியுள்ளது.