TNPSC தேர்வில் முதல் முயற்சியிலேயே வெல்வது எப்படி? நாகப்பட்டினத்தில் ஆட்சியரின் மாஸ் பிளான்!

நாகப்பட்டினம் மாவட்ட வேலைவாய்ப்பு மையம் சார்பாக TNPSC Group 1, 2, 4 தேர்வுகளுக்கு இலவச மாதிரித் தேர்வுகள் நடைபெற உள்ளது.

கோப்பு படம்

Source : abp

நாகப்பட்டினம்: தமிழ்நாடு அரசுப் பணியாளர் தேர்வாணையம் (TNPSC) நடத்தும் பல்வேறு போட்டித் தேர்வுகளுக்குத் தயாராகும் நாகப்பட்டினம் மாவட்டத்தைச் சேர்ந்த மாணவ, மாணவிகள் மற்றும் தேர்வர்கள் பயனடையும் வகையில், நாகப்பட்டினம் மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தின் சார்பில் இலவச மாதிரித் தேர்வுகள் நடத்தப்பட்டு வருகின்றன. இந்த வாய்ப்பினைப் பயன்படுத்தி அரசுப் பணிக் கனவை நனவாக்கிக் கொள்ளுமாறு நாகப்பட்டினம் மாவட்ட ஆட்சியர் கே.ஜே. பிரவீன்குமார்,  கேட்டுக்கொண்டுள்ளார்.

அரசுப் போட்டித் தேர்வுகளுக்கு மாதிரித் தேர்வுகள்

தமிழக அரசால் அறிவிக்கப்படும் பல்வேறு போட்டித் தேர்வுகளில் நாகப்பட்டினம் மாவட்டத்தைச் சேர்ந்த கிராமப்புற மற்றும் நகர்ப்புற இளைஞர்கள் அதிக எண்ணிக்கையில் தேர்ச்சி பெற வேண்டும் என்பதை முதன்மை நோக்கமாகக் கொண்டு, மாவட்ட நிர்வாகம் மற்றும் வேலைவாய்ப்புத் துறை சார்பில் பல்வேறு சிறப்பு முயற்சிகள் மேற்கொள்ளப்பட்டு வருகின்றன. அதன் ஒரு பகுதியாக, நாகப்பட்டினம் மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தில் செயல்பட்டு வரும் ‘தன்னார்வ பயிலும் வட்டம்’ (Voluntary Study Circle) மூலமாக, போட்டித் தேர்வுகளுக்குத் தயாராகும் மாணவர்களுக்குத் தேவையான இலவசப் பயிற்சி வகுப்புகள் மற்றும் மாதிரித் தேர்வுகள் தொடர்ந்து வழங்கப்பட்டு வருகின்றன.

தற்போது, தமிழ்நாடு அரசுப் பணியாளர் தேர்வாணையத்தால் (TNPSC) அறிவிக்கப்பட உள்ள மற்றும் நடத்தப்படவுள்ள குரூப்-I, குரூப்-II, குரூப்-II (A) மற்றும் குரூப்-IV உள்ளிட்ட பல்வேறு முதன்மைப் போட்டித் தேர்வுகளுக்காக, மாநில அளவிலான தரத்தில் மாதிரித் தேர்வுகளைத் திட்டமிட்டு நடத்த மாவட்ட நிர்வாகம் நடவடிக்கை எடுத்துள்ளது.

மாதிரித் தேர்வுகள் நடைபெறும் விவரம் மற்றும் நேரங்கள்

போட்டித் தேர்வர்கள் எளிதாகக் கலந்துகொண்டு பயன்பெறும் வகையில், மாவட்டத்தின் முக்கியப் பகுதிகளில் இந்த மாதிரித் தேர்வுகள் ஒழுங்கு செய்யப்பட்டுள்ளன. தேர்வுகளுக்கான அட்டவணை மற்றும் மைய விவரங்கள் வருமாறு;

1. நாகப்பட்டினம் மைய விவரம்:
 இடம்: மாவட்ட வேலைவாய்ப்பு மற்றும் தொழில்நெறி வழிகாட்டும் மையம், நாகப்பட்டினம்.
நாட்கள்: ஒவ்வொரு வாரமும் செவ்வாய்க்கிழமை மற்றும் வெள்ளிக்கிழமை.
நேரம்: காலை 11.00 மணி முதல் பிற்பகல் 01.00 மணி வரை.

2. வேதாரண்யம் மைய விவரம்:
இடம்: அரசு கலை மற்றும் அறிவியல் கல்லூரி, வேதாரண்யம்.
நாள்:ஒவ்வொரு வாரமும் சனிக்கிழமை.
நேரம்: காலை 10.00 மணி முதல் 11.00 மணி வரை.
குறிப்பு: மாதிரித் தேர்வுகள் அனைத்தும் உண்மையான TNPSC தேர்வுகளின் வினாத்தாள் தரத்திற்கும், நேரக் கட்டுப்பாட்டிற்கும் ஏற்றவாறு வடிவமைக்கப்பட்டுள்ளன. இதன் மூலம் மாணவர்கள் தேர்வு பயத்தைப் போக்கி, நேர மேலாண்மையைச் சரியாகக் கையாளப் பழக முடியும்.

தேர்வின் சிறப்பம்சங்கள் மற்றும் வழிகாட்டுதல்கள்

கட்டணமில்லா சேவை: இந்த மாதிரித் தேர்வுகள் முற்றிலும் இலவசமாக நடத்தப்படுகின்றன.
பாடத்திட்டத்தின்படி தேர்வுகள்: TNPSC வெளியிடும் தற்போதைய புதிய பாடத்திட்டம் (Syllabus) மற்றும் வினாத்தாள் அமைப்பின் அடிப்படையில் வினாக்கள் தயாரிக்கப்படுகின்றன.
பயிற்சிப் புத்தகங்கள் மற்றும் நூலக வசதி: மாவட்ட வேலைவாய்ப்பு மையத்தில் இயங்கும் தன்னார்வ பயிலும் வட்டத்தில் போட்டித் தேர்வுகளுக்கான அனைத்து வகையான வழிகாட்டிப் புத்தகங்கள், முந்தைய ஆண்டு வினாத்தாள்கள் மற்றும் நாளிதழ்கள் மாணவர்களின் பயன்பாட்டிற்காகப் பராமரிக்கப்பட்டு வருகின்றன.
சந்தேக நிவர்த்தி: மாதிரித் தேர்வுகள் முடிவடைந்த பின், வினாக்களுக்கான விடைகள் மற்றும் சந்தேகங்களுக்கு அனுபவமிக்க வல்லுநர்களைக் கொண்டு தெளிவான விளக்கங்கள் அளிக்கப்படும்.

மாவட்ட ஆட்சியரின் கோரிக்கை

இது குறித்து நாகப்பட்டினம் மாவட்ட ஆட்சித்தலைவர் கே.ஜே. பிரவீன்குமார், வெளியிட்டுள்ள செய்திக் குறிப்பில் தெரிவித்திருப்பதாவது:
"அரசுப் பணிகளில் சேர வேண்டும் என்ற இலக்கோடு தீவிரமாகப் படித்து வரும் நாகப்பட்டினம் மாவட்டத்தைச் சேர்ந்த இளைஞர்களுக்கு இந்த மாதிரித் தேர்வுகள் ஒரு சிறந்த பயிற்சித் தளமாக அமையும். தொடர்ந்து மாதிரித் தேர்வுகளை எழுதிப் பார்ப்பதன் மூலம், மாணவர்கள் தங்களின் பலம் மற்றும் பலவீனங்களைத் தெரிந்துகொண்டு, தங்களை முழுமையாகத் தயார்படுத்திக் கொள்ள முடியும். எனவே, நாகப்பட்டினம் மாவட்டத்தைச் சேர்ந்த மாணவ, மாணவிகள் மற்றும் போட்டித் தேர்வர்கள் அனைவரும் இந்த வாய்ப்பினைப் பெருமளவில் பயன்படுத்தி, அரசுத் தேர்வுகளில் அதிக அளவில் தேர்ச்சி பெற்று மாவட்டத்திற்குப் பெருமை சேர்க்க வேண்டும்." இப்போட்டித் தேர்வுகளில் கலந்துகொள்ள விருப்பமுள்ள மாணவர்கள் மற்றும் தேர்வர்கள், நாகப்பட்டினம் மாவட்ட வேலைவாய்ப்பு மற்றும் தொழில்நெறி வழிகாட்டும் மையத்திற்கு நேரடியாக வருகை தந்தோ அல்லது மையத்தின் அலுவலர்களைத் தொடர்புகொண்டோ தங்களது பெயர்களைப் பதிவுசெய்து கொள்ளுமாறு அறிவுறுத்தப்படுகிறார்கள்.