Tughlaq Durbar Trailer: அமைதிப்படை அமாவாசையை நினைவுப்படுத்தும் விஜய் சேதுபதி! - வெளியானது துக்ளக் தர்பார் டிரைய்லர்!

Tughlaq Durbar Trailer: “ மை நேம் ஈஸ் சிங்கார வேலன் தலைவரே ” என்கிறார் விஜய் சேதுபதி. அந்த காட்சியில் விஜய் சேதுபதியில் நடிப்பு அப்படியே அமைதிப்படையில் சத்யராஜை இமிட்டேட் செய்வது போலவே உள்ளது. 

துக்ளக்_தர்பார்

டெல்லி பிரசாத் தீனதயாளன் இயக்கத்தில் விஜய் சேதுபதி நடிப்பில் உருவாகியிருக்கும் திரைப்படம் ‘துக்ளக் தர்பார்’ (Tughlaq Durbar) . அரசியல் டிராமாவாக உருவாகியிருக்கும் இந்த படத்தில் சத்யராஜ், பார்த்திபன், மஞ்சிமா மோகன், ராஷி கண்ணா, கருணாகரன் உள்ளிட்ட பலர் நடித்துள்ளனர். இந்த படம் நேரடியாக தொலைக்காட்சியில் வெளியாக உள்ளது. இதன் வெளியீட்டு உரிமையை சன் தொலைக்காட்சி பெற்றுள்ளது. இந்த படம் வருகிற  செப்டம்பர் 10-ம் தேதி விநாயகர் சதுர்த்தியை முன்னிட்டு மாலை 6:30 மணிக்கு சன் தொலைக்காட்சியிலும் , செப்டம்பர் 11-ஆம் தேதி நேரடியாக நெட்ஃபிளிக்ஸ் ஓடிடி தளத்திலும் வெளியாக உள்ளது. இந்நிலையில் இன்று (ஆகஸ்ட் 31) படத்தில் டிரைலரை வெளியிட்டுள்ளனர் படக்குழு.

டிரைலரில் இடம்பெற்றுள்ள விஜய் சேதுபதியின் காட்சிகள் நமக்கு அமைதிப்படை அமாவாசையை நினைவு படுத்துவதாக உள்ளது. அதே போல டிரைலரின் இறுதியில் விஜய் சேதுபதி மற்றும் சத்யராஜ் பேசிக்கொள்வது போல காட்சிகள் அமைந்துள்ளது. அதில் சத்ய ராஜ் “ ஆமா உனக்கு இந்தி தெரியுமா” என இந்தியிலேயே கேட்க, கைகளை கட்டிக்கொண்டு , உடல் நெளிவுகளுடன் “ மை நேம் ஈஸ் சிங்கார வேலன் தலைவரே ” என்கிறார் விஜய் சேதுபதி. அந்த காட்சியில் விஜய் சேதுபதியில் நடிப்பு அப்படியே அமைதிப்படையில் சத்யராஜை இமிட்டேட் செய்வது போலவே உள்ளது. 

முன்னதாக வெளியான டீசரில் சீமானின் நாம் தமிழர் கட்சி கொடியின் நிறம் பயன்படுத்தப்பட்டிருப்பதாக சர்ச்சைகள் எழுந்தன. அதில் வில்லனாக நடிக்கும் பார்த்திபன் பெயரும் ராசிமான் என்று வைத்திருந்தார்கள். அப்போது நாம் தமிழர் கட்சி பிரமுகர்கள் திரைப்படத்தை கடுமையாக எதிர்த்தனர். திரைப்படக் குழு, இது உள்நோக்கத்துடன் செய்யப்பட்டது அல்ல, தெரியாமல் நடந்ததென்று விளக்கம் அளித்தனர். விஜய் சேதுபதியும் அதனை கவனிக்கவில்லை என்று கூறியிருந்தார். ஆனால் சீமானோ அது குறித்த கேள்விகளை லாவகமாக எதிர்கொண்டார். அது குறித்து பேசி திரைப்படத்துக்கு விளம்பரம் தர விரும்பாமல், திரைப்படம் மூலம் தனக்கு விளம்பரமாக இருக்கட்டும் என்று எளிதாக எதிர்கொண்டார். அதனால் திரைப்படத்திற்கு வழக்குகள் எதையும் எதிர்கொள்ள வேண்டிய நிலை வரவில்லை. படத்தில் 'காமி காமி'  மற்றும்  'அண்ணாத்த சேதி'  என இரண்டு பாடல்கள் வெளியான நிலையில் தற்போது டிரைலர் வெளியிடப்பட்டுள்ளது. துக்ளக் தர்பார் படத்திற்கு '96' புகழ் கோவிந்த் வசந்தா இசையமைத்துள்ளார். படத்தை லலித் குமார் தயாரிக்கிறார். இந்த படம் தவிர்த்து விஜய் சேதுபதி நடிப்பில் லாபம், கடைசி விவசாயி, அனபெல் சேதுபது என இன்னும் மூன்று படங்கள் இந்த மாத வெளியீட்டிற்கு தயாராக இருப்பது குறிப்பிடத்தக்கது.