Maamannan: 'உள்ளம் சேர்ந்தா எல்லாம் மாறும்' : மாமன்னன் ட்ரெய்லர் குறித்து வெளியான முக்கிய அறிவிப்பு..

நடிகர் உதயநிதி ஸ்டாலின் நடித்துள்ள மாமன்னன் படத்தின் ட்ரெய்லர் குறித்த முக்கிய அறிவிப்பு அதிகாரப்பூர்வமாக அறிவிக்கப்பட்டுள்ளது. 

மாமன்னன் படம்

நடிகர் உதயநிதி ஸ்டாலின் நடித்துள்ள மாமன்னன் படத்தின் ட்ரெய்லர் குறித்த முக்கிய அறிவிப்பு அதிகாரப்பூர்வமாக அறிவிக்கப்பட்டுள்ளது. 

பரியேறும் பெருமாள், கர்ணன் படங்களை இயக்கிய மாரி செல்வராஜ்  இயக்கத்தில் உதயநிதி ஸ்டாலின் ‘மாமன்னன்’ படத்தில் நடித்துள்ளார். வடிவேலு, கீர்த்தி சுரேஷ், ஃபஹத் ஃபாசில், லால், சுனில் உள்ளிட்ட பலரும் இந்த படத்தில் நடித்துள்ள நிலையில் ஏ.ஆர்.ரஹ்மான் இசையமைத்துள்ளார். ஒட்டுமொத்த தமிழ் சினிமாவும் மாமன்னன் படத்தை எதிர்பார்த்து காத்துக் கொண்டிருக்கிறது. 

கடந்த ஜூன் 1 ஆம் தேதி மாமன்னன் படத்தின் ஆடியோ வெளியீட்டு விழா நடைபெற்றது. சென்னை நேரு உள்விளையாட்டரங்கில் நடைபெற்ற இந்த விழாவில் தமிழ் சினிமாவின் முக்கிய பிரபலங்கள் பலரும் கலந்து கொண்டனர். இந்த படம் நடிக்கும் போது நடிகர் உதயநிதி ஸ்டாலின் தமிழ்நாடு அரசின் விளையாட்டு மற்றும் இளைஞர் நலத்துறை அமைச்சராக பதவியேற்றார். இதனைத் தொடர்ந்து தான் இனி படங்களில் நடிக்க மாட்டேன் எனவும், மாமன்னன் தான் கடைசிப் படம் எனவும் தெரிவித்திருந்தார். 

இதனால் ஆடியோ வெளியீட்டு விழாவில், நடிகர்கள் கமல்ஹாசன்,  கவின், சிவகார்த்திகேயன், சூரி ஆகியோரும், தயாரிப்பாளர்கள் கே.ராஜன், தேனாண்டாள் முரளி, கலைப்புலி எஸ்.தாணு, கே.ஆர். உள்ளிட்டோரும், இயக்குநர்கள் வெற்றிமாறன், கே.எஸ்.ரவிக்குமார், மிஸ்கின், விஜய் ஆண்டனி, தியாகராஜா குமாரராஜா, ஏ.எல்.விஜய், ரவிகுமார், பிரதீப் ரங்கநாதன், விக்னேஷ் சிவன் உள்ளிட்டோரும் பங்கேற்றனர். இந்த ஆடியோ வெளியீட்டு விழாவில் தமிழ்நாடு முழுவதும் இருந்து உதயநிதியின் ரசிகர்கள் பங்கேற்றனர். 

இந்த நிகழ்ச்சி வரும் ஜூன் 18 ஆம் தேதி சன் டிவியில் நண்பகல் 12 மணிக்கு ஒளிபரப்பாகும் என தெரிவிக்கப்பட்டுள்ளது. இதனிடையே படத்தில் இருந்து ‘கொடி பறக்குற காலம்’ பாடலின் வரிகள் அடங்கிய வீடியோ நேற்று வெளியாகி ரசிகர்களை கவர்ந்தது. மாமன்னன் படம் வரும் ஜூன் 29 ஆம் தேதி திரைக்கு கொண்டு வர படக்குழுவினரால் திட்டமிடப்பட்டுள்ளது. இதனால் படத்தின் ப்ரோமோஷன் பணிகள், அப்டேட்டுகள் அடுத்தடுத்து வெளியாகி வருகின்றன. 

அந்த வகையில் மாமன்னன் படத்தின் ட்ரெய்லர் குறித்த அறிவிப்பு வெளியாகியுள்ளது. அதன்படி நாளை ட்ரெய்லர் வெளியாகும் என தெரிவிக்கப்பட்டுள்ளது. இதனால் ரசிகர்கள் மகிழ்ச்சியடைந்துள்ளனர்.