தப்பா பேசுவீங்களோ.. நாங்க பேச ஆரம்பிச்சா அவ்வளவு தான்.. மோகன் ஜியை எச்சரித்த திருநங்கைகள்!
சாதி,மதம், ஆண் - பெண் வேறுபாடுகளை கொண்டிருந்தாலும் அந்த சமூகம் திருநர் மக்களை ஒடுக்குவதில் தெளிவாக இருக்கிறார்கள். கார்த்திக் சுப்பராஜ் மோகன் ஜியை கண்டித்து வீடியோ வெளியிட்டதை வரவேற்கிறோம்.
திருநர் மக்கள் பற்றி அவமரியாதையாக பேசிய இயக்குநர் மோகன் ஜிக்கு திருநங்கைகள் கடும் கண்டனம் தெரிவித்துள்ளனர்.
கார்த்திக் சுப்பராஜ் இயக்கத்தில் கடந்த செப்டம்பர் மாதம் டோரதி படம் வெளியானது. திருநர் மக்களின் வாழ்வியலை அடிப்படையாக கொண்டு எடுக்கப்பட்ட இப்படம் மிகப்பெரிய வரவேற்பை பெற்றது. இதனிடையே ஊடக விவாதம் ஒன்றில் பங்கேற்ற இயக்குநர் மோகன் ஜி, திருநர் மக்கள் பற்றி அவமரியாதையாகவும், தரக்குறைவாகவும் சில கருத்துகளை தெரிவிக்க அது சர்ச்சையானது. இதற்கு இயக்குநர் கார்த்திக் சுப்பராஜ் கடும் கண்டனம் தெரிவித்தார். இந்த நிலையில் திருநங்கைகள் கூட்டாக சென்னையில் செய்தியாளர்களை சந்தித்தனர்.
அப்போது, “இயக்குநர் மோகன் ஜி டோரதி படம் பார்த்து விட்டு ட்வீட் போட்டிருந்தார். நேர்காணல் ஒன்றிலும் வேறு விதமாக பேசியிருந்தார். திருநர் மக்கள் ஒவ்வொரு துறையிலும் கஷ்டப்பட்டு மேலே வந்து கொண்டிருக்கிறார்கள். ஆனால் அவர் நீங்கள் பாலியல் தொழில், யாசகம் கேட்பது போன்றவற்றை செய்வதாக குறிப்பிடுகிறார்கள். தமிழ்நாடு மட்டுமல்லாமல் இந்தியா முழுவதும் வாழும் திருநர் மக்கள் பற்றிய கணக்கெடுப்பு நடந்தது இல்லை. இடஒதுக்கீடு, பாதுகாப்பு, வேலை வாய்ப்பு என திருநர் மக்களுக்காக எதுவும் கிடையாது.
ஒவ்வொருத்தரும் கீழ் மட்டத்தில் இருந்து இப்போது மேல் மட்டத்திற்கு வந்து கொண்டிருக்கிறோம். ஒவ்வொரு துறையிலும் சாதனைப் படைக்கும் திருநர் மக்களை விரல் விட்டு எண்ணி விடலாம். எங்களை யார் வேண்டுமானாலும் எது வேண்டுமானாலும் பேசி விடலாம் என நினைக்க வேண்டாம். மைக் கிடைத்து விட்டது, கேமரா முன் இருக்கிறோம் என திருநர் மக்கள் எல்லாரும் எந்த நேரமும் பாலியல் உணர்வோடு இருப்பதாக கூற வேண்டாம். இது மிகவும் கண்டிக்கத்தக்கது.
இது மோகன் ஜி கருத்து மட்டுமல்ல. இந்த சமூகத்தில் இதுபோன்று பேசும் பலருடன் தினமும் போராடி போராடி எங்களுக்கு மனநோய் வந்து விடும் போல இருக்கிறது. மிகவும் கஷ்டமாக இருக்கிறது. நாங்க அமைதியாக இருப்பதால் என்ன வேண்டுமானாலும் பேசலாம் என்பது இல்லை. எங்களுக்கு வேற மொழியிலும் பேசத் தெரியும். இருந்தாலும் கண்ணியத்தை கடைபிடிக்க விரும்புகிறோம். இதில் மோகன் ஜி மட்டுமல்ல பலரும் இதுபோன்று பேசுகிறார்கள். பாலின, பால் சார்ப்பு மக்கள் பற்றிய விழிப்புணர்வு தமிழ்நாட்டில் இல்லை.
சக மனிதர்களை வெறுக்கும் வழக்கம் ஆதி காலத்தில் இருந்து இருக்கிறது. வரலாறு, இலக்கியத்தில் திருநர், தன் பாலின ஈர்ப்பு மக்கள் வாழ்ந்துள்ளார்கள். சாதி,மதம், ஆண் - பெண் வேறுபாடுகளை கொண்டிருந்தாலும் அந்த சமூகம் திருநர் மக்களை ஒடுக்குவதில் தெளிவாக இருக்கிறார்கள். கார்த்திக் சுப்பராஜ் மோகன் ஜியை கண்டித்து வீடியோ வெளியிட்டதை வரவேற்கிறோம். டோரதி படம் எடுத்ததோடு மட்டுமல்லாமல் எங்களுக்காகவும் குரல் கொடுத்ததற்கு நன்றி தெரிவித்துக் கொள்கிறோம்” என தெரிவித்துள்ளனர்.
தலைப்பு செய்திகள்
ட்ரெண்டிங் செய்திகள்
