King Of Kotha : திரும்பும் பக்கமெல்லாம் ரோலக்ஸ்...துல்கர் சல்மான் படத்தில் கேங்ஸ்டராக வரும் சூர்யா

துல்கர் சல்மான் நடிப்பில் உருவாகியிருக்கும் கிங் ஆஃப் கோதா திரைப்படத்தில் சூர்யா உட்பட இன்னும் பல நடிகர்கள் சிறப்பு கதாபாத்திரங்களில் நடித்துள்ளதாக கூறப்படுகிறது

சூர்யா, துல்கர் சல்மான். image source: twitter

துல்கர் சல்மான் நடித்துள்ள கிங் ஆஃப் கோதா திரைப்படத்தில் பல்வேறு முக்கியமான  நடிகர்கள் கெளரவ தோற்றத்தில் நடித்துள்ளதாக பல்வேறு தகவல்கள் இணையதளத்தில் வைரலாகி வந்தன. விக்ரம் படத்தில் ரோலக்ஸாக தோன்றிய சூர்யா இந்த முறை புதிய கதாபாத்திரம் ஒன்றில் இந்தப் படத்தில் தோன்றலாம் என்றும் எதிர்பார்க்கப்படுகிறது.

கிங்க் ஆஃப் கோதா

கிட்டத்தட்ட ஓராண்டு காலத்துக்குப் பிறகு துல்கர் சல்மான் நடித்து வெளியாக இருக்கும்  திரைப்படம் கிங் ஆஃப் கோதா. கடந்த ஆண்டு வெளியான சீதா ராமம் படத்துக்கு பின் துல்கர் சல்மான்  நடிப்பில் வெளியாக இருக்கும் கேங்ஸ்டர் திரைப்படம் இது. அபிலாஷ் ஜோஷி இயக்கத்தில் இப்படத்தை ஜீ ஸ்டுடியோஸ் மற்றும் வேஃபேரர் ஃபிலிம்ஸ் இணைந்து இப்படத்தை தயாரித்துள்ளது.

ஜேக்ஸ் பிஜாய் மற்றும் ஷான் ரஹ்மான் இணைந்து  இப்படத்திற்கு இசையமைத்துள்ள நிலையில், இப்படத்திற்கு நிமிஷ் ரவி ஒளிப்பதிவு செய்துள்ளார். 1980-களில் நடைபெறும் பீரியட் படமாக உருவாகியுள்ள 'கிங் ஆஃப் கோதா திரைப்படத்தில், நடிகர் சுரேஷ் கோபியின் மகன் கோகுல் சுரேஷ் லீடிங் ரோலில் நடித்துள்ளார். வருகின்ற  ஆக்ஸ்ட் 24 ஆம் தேதி அன்று இந்தப்  படம் திரையரங்குகளில் வெளியாக இருக்கிறது. 

சிறப்புத் தோற்றத்தில் சூர்யா

துல்கர் சல்மானின் கரியரில் மிகப்பெரிய படமாக உருவாகியிருக்கும் இந்தப் படத்தில் பல்வேறு நடிகர்கள் சிறப்பு கதாபாத்திரங்களில் நடித்துள்ளதாக கூறப்படுகிறது. மலையாள நடிகர்கள் ப்ரித்விராஜ், டொவினோ தாமஸ் ஆகிய இருவரும் இந்தப் படத்தில் முக்கியமான சில கதாபாத்திரங்களில் நடித்துள்ளதாக கூறப்பட்டது. மேலும்  நடிகர் விக்ரமின் மகனான த்ரூவ் விக்ரம் இந்தப் படத்தில் நடித்திருப்பதாகவும் மேலும் மிக முக்கியமான கதாபாத்திரம் ஒன்றில் நடிகர் சூர்யா நடித்திருப்பதாகவும் இணை வட்டாரங்களில் கூறப்படுகிறது. இது படத்தின் மீதான எதிர்பார்ப்பை பலமடங்கு அதிகரித்துள்ளது.

ஏற்கனவே லோகேஷ் கனகராஜ் இயக்கிய விக்ரம் படத்தில் ரோலக்ஸ் கதாபாத்திரத்தில் தோன்றிய சூர்யா ரசிகர்களை மிரளவைத்திருக்கும் நிலையில் தற்போது இந்தப் படத்தில் எந்த மாதிரியான கதாபாத்திரத்தில் அவர் வரப்போகிறார் என்பதை தெரிந்துகொள்ள ரசிகர்கள் ஆர்வமாக இருக்கிறார்கள்.

சூர்யா

சிறுத்தை சிவா இயக்கி வரும் கங்குவா திரைப்படத்தில் தற்போது நடித்து வருகிறார் சூர்யா. இந்தப் படத்தைத் தொடர்ந்து சூரரைப்போற்று படத்தை இயக்கிய சுதா கொங்கராவுடன் இரண்டாவது முறையாக இணைய இருக்கிறார். இதனைத் தொடர்ந்து வெற்றிமாறன் இயக்கும் வாடிவாசல் படத்தில் நடிக்கும் சூர்யா. இந்த படங்களுக்குப் பிறகு ரசிகர்கள் எதிர்பார்த்து காத்திருக்கும் ரோலக்ஸ் கதாபாத்திரத்தை மையமாக வைத்து லோகேஷ் கனகராஜ் இயக்க இருக்கும் படத்தில் நடிக்க இருக்கிறார்.