படப்பிடிப்பில் தனியாக உட்கார்ந்து அழுவேன்...ஸ்டண்ட் மாஸ்டர் பீட்டர் ஹைன் பகிர்வு

அன்பில் அவன் படப்பிடிப்பு தளத்தில் தான் தனியாக உட்கார்ந்து பலமுறை அழுததாக ஸ்டண்ட் மாஸ்டர் பீட்டர் ஹைன் தெரிவித்துள்ளார்

அன்பில் அவன் , அசோக் செல்வன் , பீட்டர் ஹைன்

Source : X

அசோக் செல்வன் நடிப்பில் உருவாகியுள்ள ‘அன்பில் அவன்’ திரைப்படம் காதல், ஆக்‌ஷன் மற்றும் உணர்வுகளை மையமாகக் கொண்டு உருவாகியுள்ளது. ஆர். கார்த்திகேயன் இயக்கியுள்ள இப்படத்தில் அசோக் செல்வனுடன் ப்ரீத்தி முகுந்தன், சபுமோன் அப்துஸ்ஸமத், கதிர்பாலு, மஹா டெல்லி கணேஷ் உள்ளிட்டோர் நடித்துள்ளனர். விக்னேஷ் ராஜா கதை எழுதியுள்ள நிலையில், விக்னேஷ் ராஜா, ஆர். கார்த்திகேயன், அசோக் செல்வன் ஆகியோர் திரைக்கதையை அமைத்துள்ளனர். கோவிந்த் வசந்தா இசையமைத்துள்ளார்.

இப்படத்திற்கு பிரபல ஸ்டண்ட் மாஸ்டர் பீட்டர் ஹெய்ன் ஆக்‌ஷன் காட்சிகளை அமைத்துள்ளார். இந்நிலையில், ‘அன்பில் அவன்’ படத்தின் இசை வெளியீட்டு நிகழ்ச்சியில் கலந்து கொண்ட அவர், இப்படத்துடனான தனது அனுபவம் குறித்து மிகவும் உருக்கமாக பேசியுள்ளார்.

படப்பிடிப்பில் அழுதேன்

அன்பில் அவன் படம் குறித்து பேசிய பீட்டர் ஹைன் மாஸ்டர் "34 ஆண்டுகளாக திரைத்துறையில் பணியாற்றி வரும் நான், இதுவரை எந்தப் படத்திலும் இவ்வளவு தனிப்பட்ட முறையில் என்னை ஈடுபடுத்திக்கொண்டதில்லை . இந்தப் படத்தை என்னுடைய சொந்த நிறுவனத்தைப் போல நினைத்து முழுமையாக அர்ப்பணிப்புடன் பணியாற்றினேன். படப்பிடிப்பின்போது பல தருணங்களில் தனியாக அமர்ந்து அழுதேன். வழக்கமாக ஆக்‌ஷன் காட்சிகளை தொழில்நுட்ப ரீதியாக மட்டுமே அணுகும்  நான், இந்தப் படத்தில் அவற்றை உருவாக்கும்போது எனது மனைவி மற்றும் வாழ்க்கையை நினைத்துக்கொண்டே உணர்வுப்பூர்வமாக பணியாற்றினேன்

மேலும், ‘அன்பில் அவன்’ திரைப்படம் வெறும் ஆக்‌ஷன் படம் அல்ல; உயிர் பிழைத்தல், காதல் மற்றும் பொறுப்பு ஆகியவற்றைப் பேசும் படம் . படத்தில் இடம்பெறும் ஆக்‌ஷன் காட்சிகள் இயல்பாகவும், உண்மைக்கு நெருக்கமாகவும் இருக்க வேண்டும் என்பதில் படக்குழு கவனம் செலுத்தினேன்" என தெரிவித்தார். 

அசோக் செல்வன், அபினயா செல்வம் உள்ளிட்ட படக்குழுவினர் அனைவரும் தனக்கு குடும்பம் போன்றவர்களாகிவிட்டதாகவும், தான் இருக்கும் வரை அவர்களுக்கு ஆதரவாக இருப்பேன் என்றும் பீட்டர் ஹெய்ன் கூறியுள்ளார். இந்தப் படத்தை பார்த்த பிறகு உண்மையான வாழ்க்கை, காதல் மற்றும் பொறுப்பு ஆகியவற்றின் அர்த்தத்தை ரசிகர்கள் புரிந்துகொள்வார்கள் என்ற நம்பிக்கையையும் அவர் வெளிப்படுத்தியுள்ளார்.

‘அன்பில் அவன்’ திரைப்படம் செப்டம்பர் 25-ம் தேதி உலகம் முழுவதும் திரையரங்குகளில் வெளியாகும் என அறிவிக்கப்பட்டுள்ளது.