Kodi Parakura Kaalam: 'நம்ம கொடி பறக்குற காலம் வந்தாச்சு’ .. மாஸாக வெளியான மாமன்னன் படத்தின் பாடல் வீடியோ..!

மாரி செல்வராஜ் இயக்கியுள்ள ‘மாமன்னன்’ படத்தில் இருந்து ‘கொடி பறக்கும் காலம்’ பாடலின் வரிகள் அடங்கிய வீடியோ வெளியாகியுள்ளது. 

கொடி பறக்குற காலம் பாடலில் கீர்த்தி சுரேஷ்

மாரி செல்வராஜ் இயக்கியுள்ள ‘மாமன்னன்’ படத்தில் இருந்து ‘கொடி பறக்கும் காலம்’ பாடலின் வரிகள் அடங்கிய வீடியோ வெளியாகியுள்ளது. 

நடிகரும், அமைச்சருமான உதயநிதி ஸ்டாலின் கடைசிப் படமாக ‘மாமன்னன்’ படம் உருவாகியுள்ளது. பரியேறும் பெருமாள், கர்ணன் படங்களை இயக்கிய மாரி செல்வராஜ் இப்படத்தை இயக்கியுள்ளார்.  வடிவேலு, கீர்த்தி சுரேஷ், ஃபஹத் ஃபாசில், லால், சுனில் உள்ளிட்ட பலரும் இதில் நடித்துள்ளனர். தேனி ஈஸ்வர் ஒளிப்பதிவு செய்துள்ள நிலையில், ஏ.ஆர்.ரஹ்மான் இசையமைத்துள்ளார். இந்த படத்தை ஒட்டுமொத்த தமிழ் சினிமாவும் எதிர்பார்த்துக் காத்துக் கொண்டிருக்கிறது. 

இதற்கிடையில் கடந்த ஜூன் 1 ஆம் தேதி  மாமன்னன் படத்தின் இசை வெளியீட்டு விழா சென்னை நேரு உள்விளையாட்டரங்கில் நடைபெற்றது. இந்த படத்துக்காக தமிழ்நாடு முழுவதும் இருந்து உதயநிதியின் ரசிகர்கள் அழைக்கப்பட்டிருந்தனர். மேலும் உதயநிதி ஸ்டாலினின் கடைசிப்படம் என்பதால்  தமிழ் சினிமா பிரபலங்கள் பலரும் கலந்து கொண்டனர். நடிகர்கள் கமல்ஹாசன்,  கவின், சிவகார்த்திகேயன், சூரி, இயக்குநர்கள் வெற்றிமாறன், கே.எஸ்.ரவிக்குமார், மிஸ்கின், விஜய் ஆண்டனி, தியாகராஜா குமாரராஜா, ஏ.எல்.விஜய், ரவிகுமார், பிரதீப் ரங்கநாதன், விக்னேஷ் சிவன், தயாரிப்பாளர்கள் கே.ராஜன், தேனாண்டாள் முரளி, கலைப்புலி எஸ்.தாணு, கே.ஆர். உள்ளிட்ட பலரும் கலந்து கொண்டனர். 

பிரமாண்டமாக நடைபெற்ற இசை வெளியீட்டு விழாவானது வரும் ஜூன் 18 ஆம் தேதி நண்பகல் 12 மணிக்கு சன் டிவியில் ஒளிபரப்பு செய்யப்படுகிறது. இதனால் ரசிகர்கள் மிகப்பெரிய அளவில் மகிழ்ச்சியடைந்துள்ளனர். மேலும் மாமன்னன் படம் ஜூன் 29 ஆம் தேதி திரைக்கு வரும் என சொல்லப்படுகிறது. இந்த நிலையில் படத்தில் இருந்து முன்னதாக ராசா கண்ணு, ஜிகு ஜிகு ரயில் பாடல் வீடியோ வெளியாகி ரசிகர்களிடையே வரவேற்பை பெற்றது. 

இந்நிலையில் தற்போது ‘கொடி பறக்கும் காலம்’ பாடலின் வரிகள் அடங்கிய வீடியோ வெளியாகியுள்ளது. யுகபாரதி எழுதியுள்ள இப்பாடலை கல்பனா ராகவேந்தர், ரக்‌ஷிதா சுரேஷ், தீப்தி சுரேஷ், அபர்ணா ஹரிகுமார் ஆகியோர் இணைந்து பாடியுள்ளனர். படத்தில் இப்பாடல் கீர்த்தி சுரேஷ் படிக்கும் கல்லூரி விழாவில் இடம் பெறுவது போல காட்சிப்படுத்தப்படுத்தப்பட்டுள்ளது.