H. Vinoth : ”சமூக இருள் நீங்க திரை ஒளி பாய்ச்சும் தம்பி”.. இயக்குநர் எச்.வினோத்திற்கு வாழ்த்து கூறிய கமல்ஹாசன்..!

இயக்குநர் எச் வினோத் பிறந்தநாளை முன்னிட்டு அவரை வாழ்த்தி பதிவிட்டுள்ளார் நடிகர் கமல்ஹாசன்

KH233, H வினோத், கமல்ஹாசன். image source: twitter

இயக்குநர் எச். வினோத்தின் பிறந்தநாளன்று அவருக்கு தனது வாழ்த்துக்களை தெரிவித்துள்ளார் உலகநாயகன் கமல்ஹாசன்.

எச் வினோத்

சதுரங்க வேட்டைப் படத்தின் மூலம் தமிழ் சினிமாவில் இயக்குநராக அறிமுகமானவர் இயக்குநர் எச். வினோத். இந்தப் படத்தின் வெற்றியைத் தொடர்ந்து கார்த்தியை வைத்து இவர் இயக்கிய தீரன் திரைப்படம்  மிகப்பெரிய கமர்ஷியல் வெற்றியைப் பெற்றது. இந்தப் படத்தின் மூலம் வளர்ந்து வரும் நம்பிக்கை இயக்குநர்களில் ஒருவராக உருவெடுத்தார் எச் வினோத். மேலும் மிகப்பெரிய ஸ்டார் அஜித் குமாரை இயக்கும் வாய்ப்பையும் பெற்றார் அவர். அதுவும் ஒரு முறை அல்ல மூன்று முறைகள்.

நேர்கொண்ட பார்வை

தனது மூன்றாவது படமாக பாலிவுட்டில் அமிதாப் பச்சன் நடிப்பில் வெளியாகி மிகப்பெரிய வெற்றிபெற்ற பிங் திரைப்படத்தை ரீமேக் செய்தார் எச். வினோத். மிகப்பெரிய மாஸ் நடிகரான அஜித்  குமாரின் கரியரில் மாறுபட்ட கதைக்களத்தில் தனித்துவமான படமாக இந்தப் படம் அமைந்தது.

வலிமை

இதனைத் தொடர்ந்து வலிமை படத்தில் இரண்டாவது முறையாக அஜித் குமாருடன் கூட்டணி அமைத்தார் வினோத். இந்தப் படம் எதிர்பார்த்த அளவிற்கான வெற்றி பெறவில்லை. மேலும் ரசிகர்களால் கடுமையாக விமர்சிக்கப் பட்டது.

துணிவு

எச் வினோத் அஜித் குமாரை வைத்து இயக்கிய மூன்றாவது படம் துணிவு. வலிமை படத்தின் தோல்வியை இந்தப் படத்தில் வினோத் மீட்டெடுத்தார் என்று சொல்லலாம். வசூல் ரீதியாக இந்தப் படம் மிகப்பெரிய வெற்றி பெற்றது.

சமூக அக்கறையுள்ளப் படங்களை கமர்ஷியல் வடிவில் இயக்க முயற்சிப்பதே எச் வினோத் அவர்களின் தனித்துவம் என்று சொல்லலாம்.

அடுத்தது கமல்

தற்போது உலக நாயகன் கமல்ஹாசனின் 233 ஆவது படத்தை  இயக்க இருக்கிறார் எச். வினோத் . சமீபத்தில் இந்தத் தகவலை அதிகாரப்பூர்வமாக கமல் வெளியிட்டார். கமலின் ராஜ்கமல் தயாரிப்பு நிறுவனம் இந்தப் படத்தை தயாரிக்க இருக்கிறது.

வாழ்த்து தெரிவித்த கமல்ஹாசன்

சமூக இருள் நீங்க
திரை ஒளி பாய்ச்சும்
தம்பி #HVinoth அவர்களுக்கு
இனிய பிறந்தநாள் வாழ்த்துகள். pic.twitter.com/fBzbgjRX4u

— Kamal Haasan (@ikamalhaasan) September 5, 2023

 இன்று எச். வினோத் தனது 42 ஆவது பிறந்தநாளைக் கொண்டாடுகிறார். இந்த நிலையில் தனது ட்விட்டர் பக்கத்தில் வாழ்த்து தெரிவித்துள்ளார் நடிகர் கமல்ஹாசன். ” சமூக இருள் நீங்க திரை ஒளி பாய்ச்சும் தம்பி எச்.வினோத் அவர்களுக்கு பிறந்தநாள் வாழ்த்துக்கள்”  என்று அவர் பதிவிட்டுள்ளார்.

---

மேலும் படிக்க: Pa Ranjith: மனிதாபிமானமற்ற செயல்களின் வேர்தான் சனாதனம்.. அமைச்சர் உதயநிதிக்கு ஆதரவாக களமிறங்கிய பா. ரஞ்சித்!