JanaNayagan Prebooking : ஒரு கோடி பேர் பார்த்தும் மவுசு குறையாத ஜனநாயகன்...டிக்கெட் புக்கிங் நிலவரம் என்ன?

JanaNayagan Box Office Prediction : ஜனநாயகன் திரைப்படம் முதல் நாளில் உலகளவில் எத்தனை கோடி வசூல் செய்யும் என்பதை மாநில வாரியாக பார்க்கலாம்

ஜனநாயகன் , முதல்வர் விஜய் , ஜனநாயகன் முன்பதிவு

Source : X

முதலமைச்சர் விஜயின் கடைசி திரைப்படமான 'ஜன நாயகன்' திரைப்படம் வரும் ஜூலை 23 ஆம் தேதி உலகம் முழுவதும் பிரம்மாண்டமாக வெளியாக உள்ளது. படம் வெளியாக இன்னும் சில நாட்களே உள்ள நிலையில், காலதாமதம் , சட்டவிரோதமாக படம் இணையத்தில் கசிந்தது. படத்திற்கு A சான்றிதழ் வழங்கப்பட்டது என பல்வேறு காரணங்கள் இப்படத்தின் வசூலை பாதிக்கும் என எதிர்பார்க்கப்பட்டது. ஆனால் அவை அனைத்தையும் தாண்டி தற்போது வெளியாகியுள்ள முன்பதிவு தகவல்கள் படத்தின் மீதான எதிர்பார்ப்பு எந்த அளவுக்கு உள்ளது என்பதை காட்டுகின்றன.

இணையத்தில் ஒரு கோடி பேர் பார்த்த ஜனநாயகன்

ஜனநாயகன் திரைப்படம் கடந்த ஏப்ரல் மாதம் இணையத்தில் சட்டவிரோதமாக வெளியிடப்பட்டது. அந்த கசிந்த பதிப்பை இதுவரை ஒரு கோடிக்கும் மேற்பட்டோர் பார்த்துள்ளதாக கூறப்படுகிறது. மேலும், தற்போது வரை அந்த வீடியோ முழுமையாக இணையத்தில் இருந்து நீக்கப்படவில்லை.

A சான்றிதழால் வசூல் பாதிக்குமா?

'ஜன நாயகன்' திரைப்படத்திற்கு தணிக்கைக் குழு A சான்றிதழ் வழங்கியுள்ளது. இதனால் 18 வயதுக்கு குறைவானவர்கள் படத்தை திரையரங்குகளில் பார்க்க அனுமதி கிடையாது. பொதுவாக குடும்ப ரசிகர்கள் அதிகம் கொண்ட விஜய் படங்களுக்கு இது ஒரு பின்னடைவாக அமையலாம் என்று கூறப்பட்டது.

ஆனால் தற்போது வெளியாகியுள்ள முன்பதிவு நிலவரத்தை பார்க்கும்போது, அந்த பாதிப்பு ஆரம்ப கட்டத்தில் பெரிய அளவில் தெரியவில்லை என கூறப்படுகிறது.

சென்னையில் சில நிமிடங்களில் ஹவுஸ்ஃபுல்

தமிழகத்தில் 'ஜன நாயகன்' திரைப்படத்திற்கான முன்பதிவு ஜூலை 19 அன்று தொடங்கியது. குறிப்பாக சென்னையில் புக்கிங் தொடங்கிய சில நிமிடங்களிலேயே பெரும்பாலான திரையரங்குகளில் முதல் நாள் காட்சிகளுக்கான டிக்கெட்டுகள் விற்றுத் தீர்ந்துள்ளன,

புக் மை ஷோ தளத்தில் ஒரு மணி நேரத்திற்கு சராசரியாக 8 ஆயிரம் டிக்கெட்டுகள் பதிவு செய்யப்பட்டு வருவதாகவும் கூறப்படுகிறது. இதனால் வெளியீட்டு நாளை நெருங்கும் நிலையில் முன்பதிவு மேலும் வேகமெடுக்கும் என எதிர்பார்க்கப்படுகிறது.

தமிழகத்தில் ரூ.10 கோடி... வெளிநாடுகளில் ரூ.11 கோடி

முன்பதிவு தொடங்கியதிலிருந்து தமிழகத்தில் மட்டும் சுமார் ரூ.10 கோடி மதிப்பிலான டிக்கெட் விற்பனை நடைபெற்றுள்ளதாக தகவல்கள் வெளியாகியுள்ளன. அதேபோல் வெளிநாடுகளில் மட்டும் இதுவரை ரூ.11 கோடி வரை முன்பதிவு வசூல் கிடைத்துள்ளதாகவும் கூறப்படுகிறது.

இந்த எண்ணிக்கைகள் தொடர்ந்து அதிகரித்து வருவதால், வெளியீட்டுக்கு முன்பே 'ஜன நாயகன்' பல சாதனைகளை படைக்கும் வாய்ப்பு இருப்பதாக திரையுலக வட்டாரங்கள் கருதுகின்றன.

முதல் நாள் வசூல் எவ்வளவு?

தற்போதைய முன்பதிவு வேகத்தை அடிப்படையாகக் கொண்டு வெளியாகியுள்ள தோராயமான கணிப்பின்படி, 'ஜன நாயகன்' திரைப்படத்தின் முதல் நாள் உலகளாவிய வசூல் ரூ.130 கோடி வரை செல்லக்கூடும் என கூறப்படுகிறது. 

முதல் நாள் வசூல் கணிப்பு:

• தமிழ்நாடு – ரூ32 முதல் ரூ35 கோடி
• ஆந்திரா / தெலங்கானா – ரூ7 முதல் ரூ8 கோடி
• கர்நாடகா – ரூ12 கோடி
• கேரளா – ரூ10 கோடி
• வட இந்தியா – ரூ3 முதல் ₹5 கோடி
• வெளிநாடுகள் – ரூ50 கோடி
• உலகளாவிய மொத்த வசூல் – சுமார் ரூ130 கோடி

சர்ச்சைகளை தாண்டி சாதனை படைக்குமா 'ஜன நாயகன்'?

படம் இணையத்தில் கசிந்தது, A சான்றிதழ் வழங்கப்பட்டது போன்ற காரணங்களால் வசூலில் தாக்கம் இருக்கும் என ஆரம்பத்தில் கூறப்பட்டாலும், தற்போதைய முன்பதிவு நிலவரம் வேறொரு படத்தை காட்டுகிறது. குறிப்பாக விஜய் ரசிகர்களின் ஆர்வம் குறையவில்லை என்பதையே டிக்கெட் விற்பனை வெளிப்படுத்துகிறது.

பின்குறிப்பு : வசூல் குறித்த தகவல்கள் தோராயமான கணிப்புகளே அதிகாரப்பூர்வ தகவல்கள் அல்ல.