ஜனநாயகன் பிரச்சனை குறித்து உண்மையை பேச மறுத்த எச் வினோத்...வெளுத்து வாங்கிய அமீர்
ஜனநாயகன் திரைப்படம் இணையத்தில் கசிந்ததற்கு பின்னிருக்கும் காரணத்தை இயக்குநர் எச் வினோத் வெளிப்படையாக பேச வேண்டும் என இயக்குநர் அமீர் தெரிவித்துள்ளார்
விஜயின் ஜனநாயகன் திரைப்படம் சட்டவிரோதமாக இணையத்தில் கசிந்தது குறித்தான படத்தின் இயக்குநர் எச் வினோத் சர்ச்சைக்குரிய கருத்து ஒன்றை தெரிவித்துள்ளார். படம் இணையத்தில் கசிந்ததற்கான காரணத்தை வெளிப்படையாக சொல்லாமல் எச் வினோத் தயக்கம் காட்டுவதில் தனக்கு உடன்பாடு இல்லை என இயக்குனர் தனது அதிருப்தியை வெளிப்படுத்தி உள்ளார்.
எச் வினோத் இயக்கத்தில் விஜய் நடித்துள்ள ஜனநாயகன் திரைப்படம் தணிக்கை சான்றிதழுக்காக காத்திருந்த சமயத்தில் அப்படம் இணையத்தில் சட்டவிரோதமாக வெளியிடப்பட்டது. இந்த சம்பவம் தமிழ் திரையுலகினர் இடையே பெரும் அதிர்வலைகளை ஏற்படுத்தியது. படத்தில் பணியாற்றிய எடிட்டர்களில் ஒருவர் ஜனநாயகன் படத்தை இணையத்தில் வெளியிட்டதாக விசாரணையில் தெரியவந்தது. ஆனால் இன்றுவரை படம் இணையத்தில் வெளியானதற்கான நோக்கம் குறித்து படக்குழு தரப்பில் இருந்து எந்த வித விளக்கமும் அளிக்கப்படவில்லை.
ஜனநாயகன் லீக் குறித்து எச் வினோத் சர்ச்சை கருத்து
ஜனநாயகன் பட லீக் குறித்து அப்படத்தின் இயக்குனர் எச் வினோத் அண்மையில் சர்ச்சைக்குரிய கருத்து ஒன்றை பகிர்ந்தார். ஜனநாயகன் படம் கசிந்ததற்கான காரணம் குறித்து கேட்கையில் அவர் " அதை சொல்லும் அளவிற்கு எனக்கு தைரியம் இல்லை. சொன்னால் அதை வெளியிடுவதற்கு உங்களுக்கு தைரியம் இல்லை ' என்று எச் வினோத் தெரிவித்திருந்தார். ஜனநாயகன் பட இணையத்தில் கசிந்தது தொடர்பாக பல்வேறு யூகங்கள் முன்வைக்கப்பட்டன. அன்று ஆளும் கட்சியாக இருந்த திமுக மற்றும் பாஜக எல் முருகன் இணைந்து படத்தை கசியவிட்டதாக ஆதவ் அர்ஜூனா குற்றம்ச்சாட்டி இருந்தார். விஜய்க்கு ஆதரவு திரட்ட ஜன நாயகன் படக்குழுவே இந்த படத்தை இணையத்தில் வெளியிட்டதாக மற்றொரு தரப்பினர் வாதிட்டனர். இப்படியான சூழலில் எச் வினோத் அவர்களின் கருத்து மேலும் குழப்பத்தையே ரசிகர்களிடம் ஏற்படுத்தியுள்ளது
எச் வினோத் மீது அமீர் விமர்சனம்
எச் வினோத் கருத்து குறித்து இயக்குநர் அமீர் தனது கண்டனத்தை பதிவு செய்துள்ளார். சென்னையில் பத்திரிகையாளர்களை சந்தித்தபோது " எச் வினோத் அவர்களின் கருத்தில் எனக்கு உடன்பாடு இல்லை. இந்த சமூகத்தில் நீங்கள் பார்க்கக் கூடிய நீங்கள் எதிர்கொள்ளக் கூடிய அநீதியை நீங்கள் சொல்ல தயங்கினால் பின் யார்தான் சொல்வார். ஜனநாயகன் படத்தின் நாயகனாக இருக்கக் கூடிய விஜய் இன்று ஒரு மாநிலத்தின் முதல்வராகிவிட்டார். அப்படி இருக்கையில் உங்கள் படத்தில் என்ன நடந்தது என்று நீங்கள் சொல்லுங்கள். யார் தப்பு செய்தார்கள் என்று நமக்கு தெரிய வேண்டாமா. ஜனநாயகன் படம் கசிந்தபோது இன்று அமைச்சராக இருக்கக் கூடிய ஆதவ் அர்ஜூன மத்திய ஒன்றிய அமைச்சராகிய எல். முருகன் மற்றும் உதயநிதி இணைந்து இந்த படத்தை வெளியிட்டார்கள் என்று தேர்தல் பிரச்சாரத்தின் போது குற்றசாட்டை வைத்துவிட்டு அதை கடந்துவிட்டார். எனக்கு அதில் உடன்பாடு கிடையாது. அது ஒரு தேர்தல் பிரச்சார யுக்தியாக பேசியது. அதில் உண்மை இல்லாததால் தான் உங்களால் அதை நிரூபிக்க முடியவில்லை . அப்படி இருக்கையில் என்ன நடந்தது என்று நீங்கள் சொல்ல மறுத்தால் யார் தான் சொல்வார். மக்களுக்கு எதுதான் செய்தி? உண்மையை எப்படி கண்டடைவது ? மக்கள் என்ன நிலைப்பாட்டை எடுப்பது? அதனான் எனக்கு அந்த கருத்தில் உடன்பாடு இல்லை. " என அமீர் பேசியுள்ளார்.
தலைப்பு செய்திகள்
ட்ரெண்டிங் செய்திகள்
