Alphonse Puthren : அமைச்சர் உதயநிதி ஸ்டாலினுக்கும், முதல்வர் ஸ்டாலினுக்கும் எச்சரிக்கை.. வதந்திகளை கிளப்பும் அல்ஃபோன்ஸ் புத்திரன்..
அமைச்சர் உதயநிதி ஸ்டாலினுக்கு பிரேமம் படம் இயக்குநர் அல்ஃபோன்ஸ் புத்திரன் எழுதியுள்ள கடிதம் பெரும் சர்ச்சையை ஏற்படுத்தியுள்ளது.
அல்ஃபோன்ஸ் புத்திரன்
பிரேமம் படத்தின் மூலம் பிரபலமானவர் இயக்குநர் அல்ஃபோன்ஸ் புத்திரன். சமீப காலங்களில் தொடர்ச்சியாக சர்ச்சைக்குரிய கருத்துக்களையும் ஆதாரங்களற்ற தகவல்களையும் இணையதளத்தில் பதிவிட்டு வருகிறார். சில மாதங்கள் மூன்பு தனக்கு டவுன் சிண்ட்ரோம் என்கிற குறைபாடு பிரச்னை இருப்பதாக தனது இன்ஸ்டாகிராம் பக்கத்தில் பதிவிட்டிருந்தார். இந்த உண்மையைதானே கூகிள் செய்து கண்டுபிடித்ததாக அவர் தெரிவித்து இனிமேல் தான் சினிமா எடுக்கப் போவதில்லை என்றும் கூறியிருந்தார். எந்த விதமான மருத்துவ ஆலோசனையும் இல்லாமல் இப்படி கூறியதற்கு அவர்மீது கடுமையான விமர்சனங்கள் வரத் தொடங்கின. இதைத் தொடர்ந்து இந்த பதிவை தனது இன்ஸ்டாகிராம் பக்கத்தில் இருந்து நீக்கினார்.
உதயநிதிக்கு எச்சரிக்கை
சமீபத்தில் அல்ஃபோன்ஸ் புத்திரன் நிதியமைச்சர் நிர்மலா சீதாராமன் குறித்து கருத்து தெரிவித்திருந்தது இணையதளத்தில் சர்ச்சையானது. இதனைத் தொடர்ந்து இன்று திமுக அமைச்சர் உதயநிதி அவர்களை குறிப்பிட்டு மிகவும் சர்ச்சைக்குரிய பதிவை பகிர்ந்துள்ளார் அல்ஃபோன்ஸ் புத்திரன் . இந்த பதிவில் அவர் ”அன்புள்ள உதயநிதி அண்ணா, நான் முன்னதாகவே கேரளாவில் இருந்து ரெட் ஜயண்ட் நிறுவனத்திற்கு உங்களை சந்திக்க வந்திருக்கிறேன். அப்போது நான் உங்களை அரசியலுக்கு வர வலியுறுத்தினேன். அதே நேரத்தில் கலைஞர் கருணாநிதி மற்றும் ஜெயலலிதா ஆகிய இருவரை கொலை செய்தவர்களை கண்டுபிடிக்குமாறு கேட்டுக் கொண்டேன். இப்போது நீங்கள் நடிகர் விஜயகாந்த் அவர்களை கொலை செய்தவரையும் கண்டுபிடிக்க வேண்டும். ஏற்கனவே முதலமைச்சர் ஸ்டாலின் அவர்களையும் இந்தியன் படப்பிடிப்புத் தளத்தில் கமல்ஹாசனையும் கொலை செய்ய முயற்சிகள் நடந்திருக்கின்றன. இதற்கு மேலும் காலம் தாழ்த்தினால் அவர்களின் அடுத்த டார்கெட் நீங்கள்தான். நேரம் படம் பார்த்தபோது உங்களுக்கு படம் பிடித்திருந்தது . வெறும் 15 நிமிடங்களில் ஆப்பிள் ஷோரூமுக்கு ஃபோன் செய்து எனக்கு ஒரு புதிய ஐஃபோனை நீங்கள் வாங்கிக் கொடுத்தீர்கள். இந்த கொலையாளிகளைக் கண்டுபிடிப்பது அதைவிட எளிமையானதுதான்“ என்று அவர் பதிவிட்டுள்ளார்.
அஜித் குமார்
இதனைத் தொடர்ந்து நடிகர் அஜித் குமாருக்கும் ஒரு கடிதத்தைப் பகிர்ந்துள்ளார் அல்ஃபோன்ஸ் புத்திரன். அதில் “ வணக்கம் அஜித்..உங்களது மகள் அனோஷ்காவிற்கு பிரேமம் படம் பிடித்திருந்ததால் நீங்கள் நடிகர் நிவின் பாலியை உங்கள் வீட்டிற்கு அழைத்து பேசினீர்கள். அப்போது அவரிடம் நீங்கள் விரைவில் அரசியலுக்கு வருவதாக தெரிவித்ததாக நான் நிவின் பாலி மற்றும் சுரேஷ் காமாட்சியிடம் இருந்து தெரிந்துகொண்டேன். இதை சொல்லி இத்தனை வருடங்களாகியும் நீங்கள் இன்னும் அரசியலுக்கு வரவில்லை என்றால், நீங்கள் அதை மறந்திருக்க வேண்டும் அல்லது உங்களுக்கு எதிராக யாராவது சதி செய்திருக்க வேண்டும். எந்த காரணமும் இல்லை என்றால் நீங்கள் தனிப்பட்ட முறையில் எனக்கு விளக்கமளித்து கடிதம் எழுத வேண்டும் ஏனென்றால் நான் உங்களை நம்புகிறேன் . மக்கள் உங்களை நம்புகிறார்கள்” என்று குறிப்பிட்டுள்ளார்
தலைப்பு செய்திகள்
ட்ரெண்டிங் செய்திகள்
