Rohini Theatre: தியேட்டருக்குள் வெடித்த பட்டாசு.. சிதறி ஓடிய அஜித் ரசிகர்கள்.. என்ன நடந்தது?

சென்னையில் உள்ள ரோகிணி தியேட்டரில் வழக்கம்போல ரசிகர்கள் தீனா படத்தை கொண்டாடி தீர்த்தனர். அப்போது தியேட்டருக்குள் சிலர் பட்டாசு வெடித்தனர்.

தியேட்டருக்குள் பட்டாசு வெடித்த ரசிகர்கள்

நடிகர் அஜித் பிறந்தநாள் கொண்டாட்டத்தின்போது தியேட்டருக்குள் பட்டாசு வெடித்த ரசிகர்களால் பெரும் பரபரப்பு ஏற்பட்டது. 

தமிழ் சினிமாவின் முன்னணி நடிகரான அஜித்குமார், இன்று தனது 53வது பிறந்தநாளை கொண்டாடி வருகிறார். அவருக்கு ரசிகர்கள் சமூக வலைத்தளங்கள் வாயிலாக வாழ்த்துகளை தெரிவித்து வருகின்றனர். திரையுலக பிரபலங்களும் அஜித் பிறந்தநாள் தொடர்பான பதிவுகளை வெளியிட்டு வருகின்றனர். இதனிடையே ரசிகர்கள் பல்வேறு நலத்திட்ட உதவிகளை தமிழ்நாடு முழுவதும் வழங்கி வருகின்றனர். 

இதனிடையே அஜித் பிறந்தநாளை முன்னிட்டு அவர் நடித்த தீனா, பில்லா உள்ளிட்ட படங்கள் ரீ-ரிலீஸ் செய்யப்பட்டுள்ளது. தமிழ்நாடு முழுவதும் இந்த படங்கள் வெளியாகியுள்ள நிலையில் காலை முதல் அஜித் ரசிகர்கள் தியேட்டருக்கு படையெடுத்த வண்ணம் உள்ளனர். இப்படியான நிலையில் ஏதோ புதுப்படம் ரிலீஸானதைப் போல தியேட்டர்கள் களைகட்டியுள்ளது. ஒவ்வொரு காட்சியையும் ரசிகர்கள் வீடியோ, புகைப்படமாக பதிவிட்டு வருகின்றனர். 

#Ajithkumar𓃵 #Thala #DheenaReRelease #Rohinitheatre #HBDAjithKumar pic.twitter.com/TJmk19C1JQ

— Rkö Yuvï (@Rko_Yuvi) May 1, 2024

இந்நிலையில் சென்னையில் உள்ள ரோகிணி தியேட்டரில் வழக்கம்போல ரசிகர்கள் தீனா படத்தை கொண்டாடி தீர்த்தனர். அப்போது தியேட்டருக்குள் சிலர் பட்டாசு வெடித்தனர். குறிப்பாக “வத்திக்குச்சி பத்திக்காது” பாடலின்போது பட்டாசு வெடித்ததால் ரசிகர்கள் சிதறி ஓடினர். இதனால் சிறிது நேரம் தியேட்டருக்குள் பரபரப்பு ஏற்பட்டது. 

முன்னதாக தீனா படம் கடந்த 2001 ஆம் ஆண்டு ரிலீசானது. இப்படத்தின் மூலமாக இயக்குநராக ஏ.ஆர்.முருகதாஸ் தமிழ் சினிமாவில் அறிமுகமானார். சாக்லேட் பாயாக இருந்த அஜித்தை ஆக்‌ஷன் ஹீரோவாக இப்படம் தான் மாற்றியது. இந்த படத்தின் மூலம் தான் அஜித்தை “தல” என அனைவரும் அழைக்க தொடங்கினர். தீனா படத்தில் லைலா, சுரேஷ்கோபி, மகாநதி ஷங்கர் என பலரும் நடித்திருந்தனர். யுவன் ஷங்கர் ராஜா இசையமைத்திருந்தார் என்பது குறிப்பிடத்தக்கது.