Urvashi 700: ஊர்வசியின் 700-வது படமாக உருவான ‘அப்பத்தா’ .. நேரடி ஓடிடி ரிலீஸ்.. எப்போது தெரியுமா?

தமிழ் சினிமாவின் மகத்தான நடிகையாக கொண்டாடப்படும் ஊர்வசியின் 700வது படம் ஓடிடி தளத்தில் நேரடியாக வெளியாகும் என அறிவிக்கப்பட்டுள்ளது. 

அப்பத்தா படத்தில் ஊர்வசி

தமிழ் சினிமாவின் மகத்தான நடிகையாக கொண்டாடப்படும் ஊர்வசியின் 700வது படம் ஓடிடி தளத்தில் நேரடியாக வெளியாகும் என அறிவிக்கப்பட்டுள்ளது. 

1983ஆம் ஆண்டு வெளியான முந்தானை முடிச்சு படத்தின் மூலம் தமிழ் சினிமாவில் ஹீரோயினாக அறிமுகமானவர் ஊர்வசி. அந்த ஒரு படமே ஊர்வசி யார் என்பதை ரசிகர்களுக்கு சொல்லியது. தொடர்ந்து கமல் தொடங்கி பல  முன்னணி நடிகர்களின் படங்களிலும் ஹீரோயினாக கலக்கியவர் மலையாளம், தமிழ், தெலுங்கு மற்றும் கன்னட மொழிப் படங்களிலும் நடித்துள்ளார்.  

காலத்திற்கேற்ப சினிமாவில் தன்னை மாற்றிக் கொண்டு அம்மா,குணச்சித்திர கேரக்டரில் ஊர்வசி நடித்து வருகிறார். சிவா மனசுல சக்தி, சூரரைப் போற்று, மூக்குத்தி அம்மன், வீட்ல விஷேசம் உள்ளிட்ட பல படங்கள் ஊர்வசி இயல்பிலேயே நகைச்சுவை திறன் கொண்ட அபார திறமை மிக்க நடிகை என 2கே கிட்ஸ்களுக்கு உணர்த்தியது. இப்படியான நிலையில் அவர் தனது 700வது படத்தில் நடித்து முடித்துள்ளார். இதனை முன்னிட்டு ரசிகர்கள் ஊர்வசிக்கு வாழ்த்துகளை தெரிவித்து வருகின்றனர். 

‘அப்பத்தா’ என பெயரிடப்பட்டுள்ள இந்த படத்தை பிரபல இயக்குநர் பிரியதர்ஷன் இயக்கியுள்ளார். இந்த படத்தின் ட்ரெய்லர் சில தினங்கள் முன்பு வெளியானது. அதில், கிராமத்தில் வாழும் அப்பத்தாவான ஊர்வசியை அவரது மகன் அழைப்பின் பேரில் சென்னைக்கு வருகிறார்.அங்கு வந்த பிறகு தான்  மகன் குடும்பத்துடன் சுற்றுலா செல்வதால், வீட்டில் வளர்க்கும் நாயை பார்த்துக் கொள்ள தான் அழைக்கப்பட்டிருப்பது அறிந்து அதிர்ச்சியடைகிறார். ஆனால் அப்பத்தாவுக்கோ நாய்கள் என்றாலே பயம். அதையும் மீறி அந்த நாயுடன் ஊர்வசி படும் பாடு தான் படத்தின் கதையாக காமெடி மற்றும் உணர்வுப்பூர்வமான காட்சிகளுடன் அமைக்கப்பட்டுள்ளது. 

முன்னதாக பட விழாவில், சென்டிமெண்ட் கலந்த காட்சிகள் அனைவரையும் கவரும் என ஊர்வசி நம்பிக்கை தெரிவித்திருந்தார்.இப்படியான நிலையில் அப்பத்தா படம் ஜூலை 28 ஆம் தேதி ஜியோ சினிமா ஓடிடி தளத்தில் நேரடியாக வெளியாகும் என அறிவிக்கப்பட்டுள்ளது.