Idly Kadai: பாங்காக்கில் இட்லி கடை போடும் தனுஷ்! இந்த வாரமே கிளம்புறாரு - ரசிகர்களே

தனுஷ் தான் இயக்கி நடித்து வரும் இட்லி கடை படத்திற்காக படக்குழு இந்த வாரம் பாங்காக் செல்ல உள்ளனர்.

தனுஷ், நித்யாமேனன் - இட்லி கடை

Source : twitter

தமிழ் திரையுலகின் பிரபல நடிகர் தனுஷ். நடிகராக மட்டுமின்றி இயக்குனர், பாடலாசிரியர், தயாரிப்பாளர் என பன்முகம் கொண்டவர் தனுஷ். ராயன் படத்திற்கு பிறகு குபேரா என்ற படத்தில் நடித்த வருகிறார். நடிகராக மட்டுமின்றி இயக்குனரான தனுஷ் நிலவுக்கு என் மேல் என்னடி கோபம் என்ற படத்தை புதுமுகங்களை கொண்டு இயக்குகிறார்.

இட்லி கடைக்காக பாங்காக் செல்லும் தனுஷ்:

இதுதவிர இட்லி கடை என்ற படத்தையும் அவர் இயக்கி வருகிறார். அந்த படத்தில் தனுஷ் கதாநாயகனாக நடித்து வருகிறார். அவருடன் நித்யா மேனன், ராஜ்கிரண், சத்யராஜ், அருண் விஜய், ஷாலினி பாண்டே ஆகியோர் நடிக்கின்றனர்.

சிவனேசன் என்ற கதாபாத்திரத்தில் நடிகர் தனுஷ் நடிப்பதாக கூறப்படுகிறது. இந்த படத்தின் படப்பிடிப்பு 80 சதவீதம் நிறைவடைந்துள்ளது. இதற்கான படப்பிடிப்புகள் தனுஷின் சொந்த ஊரான தேனி சுற்றுவட்டார பகுதிகளில் நிறைவடைந்துள்ளது. தற்போது, எஞ்சிய 20 சதவீத படப்பிடிப்புகளை பாங்காக்கில் நடத்த படக்குழு திட்டமிட்டுள்ளது. இதற்காக படக்குழு இந்த வாரம் பாங்காக் செல்ல உள்ளதாக தகவல் வெளியாகியுள்ளது.  

ரசிகர்கள் எதிர்பார்ப்பு:

தனுஷ் இட்லி கடை படப்பிடிப்பு பரபரப்பின் மத்தியில் நிலவுக்கு என்மேல் என்னடி கோபம் படத்தின் பணிகளிலும் தீவிர கவனம் செலுத்தி வருகிறார். மேலும், குபேரா படத்திலும் தீவிரமாக நடித்து வருகிறார். இது மட்டுமின்றி, அமரன் படத்தை இயக்கிய ராஜ்குமார் பெரியசாமி இயக்கத்தில் தன்னுடைய 55வது படத்திலும் நடிக்க ஒப்பந்தம் ஆகியுள்ளார். இதுதவிர ஹாலிவுட்டிலும் படம் நடிக்க தனுஷ் பேச்சுவார்த்தை நடத்தி வருவதாக கூறப்படுகிறது.

தொடர்ந்து தனுஷ் பரபரப்பாக இயங்கி வரும் நிலையில், இட்லி கடை அடுத்தாண்டு தமிழ் புத்தாண்டு விருந்தாக உள்ளது. தனுஷ் – நித்யா மேனன் நடிப்பில் வெளியான திருச்சிற்றம்பலம் படம் மிகப்பெரிய வெற்றியை கோலிவுட்டில் பெற்றது. இதனால், இட்லி கடை படத்தின் மீதும் மிகப்பெரிய எதிர்பார்ப்பு ஏற்பட்டுள்ளது.

தோல்விக்கு முற்றுப்புள்ளி வைப்பாரா?

தனுஷ் நடிப்பில் வெளியான ராயன் படம் ஆக்‌ஷன் விருந்தாக வெளியாகி நிலையில், படம் எதிர்பார்த்த வெற்றியைப் பெறவில்லை. தனுஷ் நடிப்பில் திருச்சிற்றம்பலம் படத்திற்கு வெளியான வாத்தி படம் மட்டுமே வெற்றி பெற்றது. நானே வருவேன், கேப்டன் மில்லர், ராயன் என அவர் அடுத்தடுத்து நடித்த ஆக்‌ஷன் படங்கள் தொடர் தோல்வியைச் சந்தித்தது.

இந்த நிலையில், பக்கத்து வீட்டு பையன் போன்ற கதாபாத்திரத்திற்கு நன்றாக பொருந்தும் நபராக திகழும் தனுஷ் அதுபோன்ற கதாபாத்திரத்தில் இட்லி கடை படத்தில் நடித்திருப்பதாக கூறப்படுகிறது.