விஜய் பற்றி தவறாக பேசிய நடிகரை தனது படத்திலிருந்து தூக்கிய அஜித்!

தேர்தலின் போது தவெக தலைவர் விஜய் குறித்து தவறாக பேசிய துணை நடிகரை நடிகர் அஜித் தனது படத்தில் இருந்து நீக்கச் சொன்னதாக தகவல்கள் வெளியாகி வருகின்றன

அஜித் , விஜய்

Source : X

அஜித் குமார் அடுத்து நடிக்கும் ஏகே 64 படத்தில் இந்த நடிகர் நடிக்க இருந்ததாகவும் தேர்தல் பிரச்சாரத்தின் போது இந்த நடிகர் தொடர்ச்சியாக விஜய் குறித்து தவறாக பேசியதால் அவரை தனது படத்தில் இருந்து நீக்கும்படி அஜித் இயக்குநர் ஆதிக் ரவிச்சந்திரனிடம் கேட்டுக்கொண்டதாக சமூக வலைதளத்தில் தகவல்கள் பரவி வருகின்றன. 

கோலிவுட் திரையுலகில் கிட்டதட்ட ஒரே சமயத்தில் நடிக்க வந்தவர்கள் அஜித் மற்றும் விஜய். இவர்கள் இருவரது படங்கள் ஒரே நாளில் வெளியானாலே திரையரங்குகள் படாதபாடு பட்டுவிடும். கடைசியாக வாரிசு மற்றும் துணிவு ஆகிய இரு படங்களும் ஒரே நேரத்தில் வெளியாகின. அஜித் விஜய் இடையில் யார் அடுத்த சூப்பர்ஸ்டார் என்று போட்டி நிலவி வந்த நிலையில்தான் விஜய் சினிமாவை விட்டு அரசியலுக்குள் நுழைந்தார். மறுபக்கம் அஜித் தனது ரேஸிங் கரியரை மீண்டும் துவங்கினார் . தற்போது சினிமாவைக் காட்டிலும் ரேஸிங்கில் அதிக கவனம் செலுத்தி வருகிறார் அஜித் . அதே  நேரம் விஜய் சினிமாவை முழுவதுமாக ஒதுக்கிவைத்து அரசியல் பயணத்தை தொடங்கியுள்ளார். 

சினிமாவில் இருவருக்கும் இடையில் நீடித்து வந்த போட்டி இல்லாத காரணத்தினாலேயே தற்போது இருவரது ரசிகர்களிடையே ஒரு நல்லுறவு உருவாகியுள்ளது. குறிப்பாக கரூர் விபத்தில் அஜித் விஜய்க்கு ஆதரவாக பேசியது விஜய் ரசிகர்களிடையே அஜித்திற்கு பெரிய மரியாதையை ஏற்படுத்தி தந்தது. மற்ற நடிகர்கள் வெளிப்படையாகவே விஜயை நேரடியாக விமர்சித்து வரும் நிலையில் அஜித் விஜய் குறித்து எந்த வித கருத்தையும் இதுவரை தெரிவிக்கவில்லை. 

விஜய் பற்றி தவறாக பேசிய நடிகர் நீக்கம் 

தமிழ்நாட்டில் கடந்த ஏப்ரல் 23 ஆம் தேதி சட்டமன்ற தேர்தல் வாக்குப்பதிவு நடைபெற்று முடிந்தது. தேர்தலை முன்னிட்டு அனைத்து கட்சியினரும் கடும் பிரச்சாரங்கள் மேற்கொண்டன. இதில் விஜய்க்கு எதிராக ஒருசில திரைப்பட நடிகர்கள் தொடர்ச்சியாக பிரச்சாரம் செய்து வந்தனர். நடிகர் சத்யராஜ் , பிரகாஷ் ராஜ் ஆகிய நடிகர்கள் விஜயை நேரடியாக விமர்சித்தனர். அப்படி விஜயை விமர்சித்த துணை நடிகர் ஒருவரை நடிகர் அஜித் தனது படத்தில் இருந்து நீக்கியுள்ளதாக இன்று காலை முதல் சமூக வலைதளத்தில் தகவல் பரவி வருகிறது

அஜித் அடுத்தபடியாக ஆதிக் ரவிச்சந்திரன் இயக்கத்தில் Ak64 படத்தில் நடிக்க இருக்கிறார். இந்த நடிகர் சமீபத்தில் விஜய் குறித்து தவறாக பேசியதால் அவர் தனது படத்தில் நடிக்க வேண்டாம் என அஜித் ஆதிக்கிடம் கேட்டுக்கொண்டதாக வலைப்பேச்சு யூடியுப் சேனல் தெரிவித்துள்ளது. 

இதையும் படிக்க

விஜய் அண்ணா ஜெயிக்கனும்...மாமன் பட நடிகை ஐஸ்வர்யா லக்‌ஷ்மி பகிர்வு